ពីកីឡាករគេមើលរំលង Højlund បានបំបែកកំណត់ត្រា Premier League

កីឡាករ Rasmus Højlund កំពុងធ្វើឲ្យអ្នកគាំទ្រមានការភ្ញាក់ផ្អើល បន្ទាប់ពីមួយរយៈចុងក្រោយនេះ រូបគេពិតជាធ្វើបានល្អ​ជា​មួយ​ក្លិប​បិសាច​ក្រហម Manchester United។

នៅពេលផ្លាស់មកកាន់ទឹកដីអង់គ្លេសដំបូង កីឡាករ Højlund ត្រូវបានគាំទ្រគិតថា រូបគេនឹងពិបាកសម្របខ្លួន ក្នុងការប្រកួតប្រជែងកម្រិតខ្ពស់​នៅ​ទឹក​ដី​អង់គ្លេស។ នៅ​ដើមរដូវកាល ខ្សែប្រយុទ្ធរូបនេះពិតជាពិបាក ស្វែងរកគ្រាប់មែនទែន​ដែល​ធ្វើ​ឲ្យ​​មានការិះគន់​ច្រើន។ ប៉ុន្តែ​ដល់ការប្រកួតពាក់កណ្ដាលរដូវកាលអ្វីៗក៏បានផ្លាស់ប្ដូរ រូបគេ​បានបំបែកកំណត់ត្រា ក្លាយជាកីឡាករវ័យក្មេងបំផុតដែលរកគ្រាប់បាល់ក្នុងការប្រកួត៦លើកជាប់គ្នា។ ជាពិសេសឈ្នះពានរង្វាន់កីឡាករឆ្នើមប្រចាំខែកុម្ភៈទៀត​ផង​​ដែលធ្វើ​ឲ្យ​អ្នកគាំទ្រ​នឹក​ស្មាន​មិន​ដល់។

ក្នុងពានរង្វាន់ UEFA Champions League កីឡាករ Højlund ស៊ុតបញ្ចូល៥គ្រាប់ ក្នុងការបង្ហាញខ្លួន៦លើក ប៉ុ​ន្តែរូបគេមិនអាចជួយឲ្យក្រុមបិសាចក្រហម​ឡើងទៅវគ្គបន្តទេ ក្រោយបញ្ចប់ក្នុងចំណាត់ថ្នាក់លេខ៤ក្នុងពូលA។

កាល​ពី​ថ្ងៃទី២៩ ខែកក្កដា ឆ្នាំ២០២៣ Manchester United បានយល់ព្រមលើកិច្ចព្រមព្រៀង ដើម្បីចុះហត្ថលេខានាំយកខ្សែប្រយុទ្ធ Højlund ពីក្រុម Atalanta ពីលីគកំពូលអុីតាលី ក្នុងតម្លៃ​ផ្ទេរ​ដំបូង៦៤លានផោន និង​​បូក​ថែម​៨លានផោនទៀត ជាមួយកិច្ចព្រមព្រៀងរយៈពេល៥ឆ្នាំ។

Højlund ដែល​មាន​កំណើត​នៅទីក្រុង Copenhagen ចាប់ផ្ដើមលេងលេងបាល់ទាត់ដំបូងក្នុងនាមជាយុវជនរបស់ក្រុម HUI និង Brøndby មុនពេលផ្លាស់ទៅ​ក្រុមយុវជន Copenhagen។ រូប​គេ​បានបង្ហាញខ្លួនក្នុងការប្រកួតដំបូងជាមួយក្រុម Copenhagen ក្នុងវ័យ១៧ឆ្នាំ កាលថ្ងៃទី២៥ ខែតុលា ឆ្នាំ២០២០។ រដូវកាល ២០២១-២២ រូបគេបានបង្ហាញខ្លួនជាលើកដំបូងនៅក្នុងការប្រកួតពានរង្វាន់លំដាប់ទី៣នៅទ្វីបអឺរ៉ុប UEFA Europa Conference League ហើយរកបាន៥គ្រាប់។

នៅខែមករា ឆ្នាំ២០២២  Højlund បានចូលរួមជាមួយក្លិប Austrian Bundesliga Sturm Graz ក្នុងតម្លៃខ្លួន១.៨លានអឺរ៉ូ និង​ស៊ុត​បាន​១២គ្រាប់ ក្នុងការបង្ហាញខ្លួន២១លើក។ នៅថ្ងៃទី២៧ ខែសីហា ឆ្នាំ២០២២ ខ្សែប្រយុទ្ធ រូប​នេះ​បានចុះហត្ថលេខាជាមួយក្លិប Atalanta ក្នុងលីគ​ Serie A ក្នុង​តម្លៃ​ផ្ទេរ​១៧លានអឺរ៉ូ។ រូប​គេ​បង្ហាញខ្លួន៣២លើក ស៊ុតបញ្ចូលទី៩គ្រាប់ ជួយឲ្យក្រុមឈរនៅលេខ៥ ក្នុងលីគកំពូលអុីតាលី៕

អត្ថបទ៖ ផា រតនា