Arsenal ទទួល​បានប្រាក់ជាង ២៣៦​លានដុល្លារ​ ពី​ការ​​ឈ្នះ​ជើងឯកលីគ​កំពូល​អង់គ្លេស

ក្លិបកាំភ្លើងធំ Arsenal រកបានប្រាក់ចំណូល និងប្រាក់រង្វាន់យ៉ាងច្រើនមហាសាលរហូតដល់​រាប់រយលានដុល្លារអាមេរិក ក្រោយឈ្នះជើងឯក Premier League នៅរដូវកាល ២០២៥-២០២៦ នេះ។

ក្រោយខកខានលើកពាន Premier League អស់រយៈពេល ២២ ឆ្នាំ ពោលតាំងពីឆ្នាំ ២០០៤ មក នៅទីបំផុតក្រុម Arsenal បានស្គាល់រស់ជាតិនៃការលើកពាននេះឡើងវិញ ក្រោយ Manchester City ភ្លាត់ស្មើក្រុម Bournemouth ក្នុងលទ្ធផល ១-១ កាលពីថ្ងៃទី ២០ ខែ ឧសភា កន្លងទៅ។

លទ្ធផលនេះ បានធ្វើឱ្យ Arsenal បន្តឈរលេខ ១ មាន ៨២ ពិន្ទុ និងកំពុងនាំមុខ Man City ដល់ទៅ ៤ ពិន្ទុ។ ការប្រកួតលីគកំពូល អង់គ្លេស នៅសល់តែ ១ ប្រកួតទៀតប៉ុណ្ណោះ។ ដូច្នេះ ទោះប្រកួតក្រោយរវាងក្រុមទាំង ២ មានមួយណាឈ្នះ ឬ ក៏ចាញ់ក៏លែងសំខាន់ទៀតដែរ។

យោងតាមសារព័ត៌មាន Express បានឱ្យដឹងថា ក្រុម Arsenal នឹងទទួលបានប្រាក់ចំណូលសរុបរហូតដល់ទៅ ២៣៦.៣០ ទៅ ២៣៩ លានដុល្លារអាមេរិកពីការឈ្នះជើងឯក Premier League រដូវកាលនេះ។

ប្រាក់ចំណូល ដែលនឹងទទួលបាននេះ ត្រូវបានគេគិតទៅលើការចែកភាគលាភរបស់ Premier League ដែលទទួលបានពីការលក់សិទ្ធផ្សាយចំនួន ១៣០ លានដុល្លារអាមេរិក, ប្រាក់រង្វាន់ពីការឈ្នះពានចំនួន ៧១.២៩ លានដុល្លារអាមេរិក និងប្រាក់ពីការលក់សិទ្ធផ្សាយរបស់ក្លិបផ្ទាល់ចំនួន ៣៣.៤៣ លានដុល្លារអាមេរិក ទៅ ៣៦.៧៩ លានដុល្លារអាមេរិក។

ប្រាក់ចំណូល Arsenal រកបាននៅរដូវកាលនេះ គឺមានចំនួនច្រើនជាង Liverpool រកបានក្រោយពីការឈ្នះជើងឯកនៅរដូវកាលមុន ដែលពេលនោះរកបានសរុបចំនួន ២៣៥ លានដុល្លារអាមេរិក៕

ប្រែសម្រួល៖ សេម កុសល
ប្រភព៖ Express