កីឡាការិនី​កម្ពុជា Melanie រីក​រាយ​ក្នុង​ការ​ចូល​រួម​​ក្លិប​អារ៉ាប់រួម Banaat FC

កីឡាការិនី​ជម្រើស​ជាតិ​កម្ពុជា Melanie Joy Hoekstra ​បាន​បង្ហាញ​​អារម្មណ៍​​រីក​រាយ​ក្នុង​​ការ​ចូល​រួម​ជា​មួយ​ក្លិប​​បាល់ទាត់​នារី Banaat FC  នៅ​ប្រទេស​អារ៉ាប់រួម។

បន្ទាប់​ពី​ចូល​រួម​ជា​មួយ​ក្លិប Banaat FC កីឡាការិនី Melanie Joy Hoekstra ជា​លើក​ទី១​បាន​បង្ហាញ​ពី​អារម្មណ៍​​​ជា​មួយ​ក្លិប​នេះ។ កីឡាការិនី​​បាន​សរសេរ​ថា ៖«បង្ហាញ​ស្នាម​ញញឹម​ជា​ថ្មី​ក្នុង​ការ​វិល​មក​កាន់​ទី​លាន។ រីក​រាយ​ដែល​បាន​ចូល​រួម​ជា​មួយ​ក្រុម Banaat FC នៅ​ប្រទេស​អារ៉ាប់រួម។ សូម​តាន​ដានក្លិប Banaat FC តាម​ instagram ដើម្បី​ទទួល​បាន​ព័ត៌មាន​ថ្មី និង​កម្មវិធី​ប្រកួត​នានា»។

បន្ទាប់​ពី​ចប់​កីឡា​ស៊ីហ្គេម កាល​ពី​ឆ្នាំ​២០២៣ កីឡាការិនី​កម្ពុជា Melanie Joy Hoekstra ​បាន​ចូល​រួម​ជា​មួយ​ក្លិប​តៃវ៉ាន់ Kaohsiung Attackers ដោយ​បាន​ជួយ​ក្លិប​នេះ​ឈ្នះ​ជើង​ឯកលីគ ហើយ​កាល​ពី​ចុង​ឆ្នាំ​២០២៤ ក៏​បាន​ចាក​ចេញ​ដើម្បី​ទៅ​ចូល​រួម​ជា​មួយ​ក្លិប​នៅ​ប្រទេស​អារ៉ាប់រួម។

Melania Joy Hoekstra ត្រូវ​បាន​អ្នក​គាំទ្រ​កម្ពុជា​ស្គាល់​យ៉ាង​ច្បាស់​នៅ​ពេល​ចូល​រួម​ជា​មួយ​ក្រុម​បាល់ទាត់​នារី​កម្ពុជា​លើក​ទី​១​ក្នុង​ព្រឹត្តិការណ៍​កីឡា​ស៊ីហ្គេម ឆ្នាំ​២០២៣។ ខ្សែ​ការពារ​​រូប​នេះ​​ជា​កម្លាំង​ដ៏​សំខាន់ម្នាក់​​បាន​ជួយ​ក្រុម​បាល់ទាត់​នារី​ជម្រើស​ជាតិ​កម្ពុជា ឡើង​វគ្គ​ពាក់​កណ្តាល​ផ្តាច់​ព្រ័ត្រ កីឡា​ស៊ីហ្គេម ឆ្នាំ​២០២៣ ដែល​កម្ពុជា​ធ្វើ​ជា​ម្ចាស់​ផ្ទះ។ កាល​ណោះ ក្រុម​នារី​កម្ពុជា ឈ្នះ​ឡាវ ២-០, ឈ្នះ​សិង្ហបុរី ១-០ និង​ចាញ់​ថៃ ០-៣។ យ៉ាង​ណា នៅ​វគ្គ​ពាក់​កណ្តាល​ផ្តាច់​ព្រ័ត្រ ក្រុម​នារីកម្ពុជា​បាន​ចាញ់​វៀតណាម ០-៤៕

អត្ថបទ៖ វីរបុត្រ