ក្រុម Arkadag មានខ្សែប្រយុទ្ធ ២ រូបគ្រោះ​ថ្នាក់​ខ្លាំង​សម្រាប់​ ព្រះខ័នរាជស្វាយរៀង

ក្រុម FK Arkadag មានខ្សែប្រយុទ្ធឆ្នើម ២ រូប អាចបង្កហានិភ័យដល់ក្រុមព្រះខ័នរាជស្វាយរៀង របស់កម្ពុជា នៅក្នុងការប្រកួតវគ្គផ្តាច់ព្រ័ត្រពាន AFC Challenge League​ នា​ថ្ងៃ​ទី​១០ ខែ​ឧសភា ឆ្នាំ​២០២៥។

ក្រុម FK Arkadag គឺជាក្រុមដ៏ខ្លាំងក្លាមួយរបស់ប្រទេស តួកមេនីស្ថាន ខណៈពួកគេកំពុងឡើងជើងខ្លាំងមែនទែនទាំងនៅក្នុងលីគ Ýokary Liga និង​ពានអន្តរជាតិកម្រិតអាស៊ី។ អ្វីដែលគួរឱ្យកត់សម្គាល់បំផុត សម្រាប់ការប្រកួតក្នុងលីគចំនួន ៥ ប្រកួតកន្លងមក គឺពួកគេបានឈ្នះគ្រប់ការប្រកួតទាំងអស់ ហើយស៊ុតបញ្ចូលទីគូប្រកួតសរុប ២១ គ្រាប់ និងរបូតគ្រាប់បាល់វិញត្រឹមតែ ២ គ្រាប់ប៉ុណ្ណោះ។

កត្តាដែលធ្វើឱ្យពួកគេមានភាពល្អប្រសើរបែបនេះ គឺដោយសារពួកគេមានកីឡាករល្អៗច្រើនតាំងពីលើ រហូតដល់ក្រោម ជាពិសេសគឺកីឡាករទាំងមូលមានការសហការគ្នាជាក្រុមបានល្អ។ ប៉ុន្តែក្នុងចំណោមកីឡាករទាំងអស់ ពួកគេមានខ្សែប្រយុទ្ធ ២ រូប ដែលត្រូវបានគេចាត់ទុកជាកីឡាករល្អបំផុតប្រចាំក្រុម ហើយក៏អាចជាឧបសគ្គសម្រាប់ព្រះខ័នរាជស្វាយរៀងនៅក្នុងការប្រកួតនៅពហុកីឡដ្ឋានជាតិមរតកតេជោ នាថ្ងៃទី ១០ ខែ ឧសភា​។

ខ្សែប្រយុទ្ធទាំង ២ រូបនោះ រួមមានកីឡាករម្ចាស់អាវលេខ ១១ Didar Durdyýew និងម្ចាស់អាវលេខ ១៧ Altymyrat Annadurdyýew។

Didar Durdyýew ជាកីឡាករសញ្ជាតិ តួកមេនីស្ថាន វ័យ ៣១ ឆ្នាំ។ រូបគេជាកីឡាករជំនាញជើងស្តាំ ហើយអាចលេងបានទាំងជាខ្សែប្រយុទ្ធស្លាបឆ្វេង ស្តាំ និងកណ្តាល។ ខ្សែប្រយុទ្ធកម្ពស់ ១.៨១ ម៉ែត្ររូបនេះ ជាអ្នករកគ្រាប់បាល់ច្រើនបំផុត ក្នុងឆ្នាំ ២០២៥ ប្រចាំលីគ​តួកមេនីស្ថាន ដោយរកបាន ៥ គ្រាប់ ខណៈនៅពានរង្វាន់ AFC Challenge League វិញ រូបគេរកបាន ១ គ្រាប់ផងដែរ ក្នុងចំណោមការលេង ៦ ប្រកួត។

ចំណែក Altymyrat Annadurdyýew គឺជាខ្សែប្រយុទ្ធដ៏គួរឱ្យព្រួយបារម្ភបំផុត ដោយសាររូបគេជាកីឡាករកំពុងឡើងជើងខ្លាំងរបស់ FK Arkadag។ អ្នក​នាំ​លេង​សញ្ជាតិ តួកមេនីស្ថាន វ័យ ៣២ ឆ្នាំរូបនេះ មិនត្រឹមជាខ្សែប្រយុទ្ធមុតស្រួចប៉ុណ្ណោះទេ ប៉ុន្តែគេក៏ជាអ្នកនាំលេងដ៏សំខាន់របស់ក្រុមផងដែរ។ រូបគេមានភាពប៉ិនប្រសព្វទាំងការស៊ុតបញ្ចូលទី និងបញ្ជូន​បាល់ឲ្យ​មិត្ត​រួម​ក្រុម។ នៅក្នុងលីគបច្ចុប្បន្នរូបគេរកបាន ៤ គ្រាប់ ក្នុងចំណោមការលេង ៥ ប្រកួត។ រីឯនៅ AFC Challenge League វិញ រូបគេមាន ៤ គ្រាប់កំពុងប្រជែងតំណែង ពាន​ស្បែក​ជើង​មាស​ ជាមួយ Cristian Roque និង មិន រតនៈ ដែលមាន ៤ គ្រាប់ស្មើគ្នា។

ទោះបីជាយ៉ាងណា FK Arkadag គឺនៅមានកីឡាករសំខាន់ៗមួយចំនួនទៀត ប៉ុន្តែសារព័ត៌មាន «កម្ពុជាថ្មី» សូមលើកយកតែកីឡាករ ២ នាក់ខាងលើប៉ុណ្ណោះ ដោយសារពួកគេជាកម្លាំងស្នូលដ៏សំខាន់បំផុតរបស់ក្រុម និងអាចបង្ករហានិភ័យដល់ក្រុមព្រះខ័នរាជស្វាយរៀង នៅក្នុងការប្រកួតវគ្គផ្តាច់ព្រ័ត្រពាន AFC Challenge league នាថ្ងៃទី ១០ ខែ ឧសភា ខាងមុខបានគ្រប់ពេល៕

អត្ថបទ៖ សេម កុសល