លោក Koji បាន​ចាត់​ទុក​កម្លាំង ជាបញ្ហាធំរបស់កីឡាករ​កម្ពុជា ថ្ងៃនេះ

គ្រូបង្គោលរបស់ជម្រើសជាតិ កម្ពុជា លោក Koji Gyotoku បានលើកឡើងអំពីរឿង «កម្លាំង» ជាបញ្ហាធំសម្រាប់ក្រុមលោកថ្ងៃនេះ បន្ទាប់ពីបរាជ័យក្រោមថ្វីជើងក្រុមភ្ញៀវ តាហ្ស៊ីគីស្ថាន។

នាល្ងាចថ្ងៃ ព្រហស្បតិ៍ ទី ៥ ខែ មិថុនា នេះ ក្រុមជម្រើសជាតិ កម្ពុជា បានប្រកួតមិត្តភាពចាញ់ក្រុមភ្ញៀវ តាហ្ស៊ីគីស្ថាន ក្នុងលទ្ធផល ២-១ នៅពហុកីឡដ្ឋានជាតិ អឡាំពិក។ ក្នុងនោះ ២ គ្រាប់របស់ តាហ្ស៊ីគីស្ថាន គឺរកបាននៅវគ្គទី ២ ទាំង ២ គ្រាប់។ ចំណែក ១ គ្រាប់របស់ កម្ពុជា វិញ គឺរកបានដោយខ្សែបម្រើ មិន រតនៈ នៅនាទីទី ៧១។

ក្រោយការប្រកួតបញ្ចប់ គ្រូបង្គោលលោក Koji បានមានប្រសាសន៍នៅក្នុងសន្និសីទសារព័ត៌មានថា៖ «បញ្ហារបស់កីឡាករយើង គឺដោយសារពួកគាត់ខ្វះកម្លាំង។ ទាក់ទងជាមួយការលេងរបស់ពួកគេ ប្រសិនបើពួកគេឆ្លងកាត់ការលេងដោយគុណភាពខ្ពស់មួយឆ្នាំពេញ ពួកគេប្រហែលជាអាចលេងបានល្អជាងហ្នឹង។ តួយ៉ាងដូចកីឡាករគេ ទោះបីជាពួកគេបានបញ្ចប់រដូវកាលក៏ពិតមែន ប៉ុន្តែពួកគេនៅតែអាចលេងបាន ដោយកម្លាំងពួកគេនៅមានពេញ និងអាចលេងបាន។ សម្រាប់ខ្ញុំ គឺចង់បានកីឡាករ ដែលមានកម្លាំងពេញអាចលេងបានបែបហ្នឹង»។

គួរឱ្យដឹងថា សមាសភាពកីឡាកររបស់ កម្ពុជា ទាំង ២៣ នាក់នៅក្នុងការប្រកួតទល់នឹងក្រុម តាហ្ស៊ីគីស្ថាន គឺភាគច្រើនសុទ្ធតែជាកីឡាករអាយុក្រោម ២៣ ឆ្នាំ ពោលគឺមាន ១៦ នាក់ឯណោះ។ យ៉ាងណា លោក Koji បានបញ្ជាក់នៅក្នុងសន្និសីទសារព័ត៌មានមុននេះរួចហើយ អំពីកូនក្រុមរបស់លោកថ្ងៃនេះ គឺមានបញ្ហាធំនៅត្រង់កម្លាំង។ ជាក់ស្តែងការរបូតគ្រាប់បាល់ ២ គ្រាប់របស់ កម្ពុជា គឺសុទ្ធតែនៅក្នុងវគ្គទី ២។ តាមប្រសាសន៍របស់លោក Koji ខាងលើ លោកក៏បានសង្កត់ធ្ងន់ផងដែរ ថាកីឡាករ ដែលលោកចង់បាន គឺកីឡាករដែលមានកម្លាំងអាចលេងបានពេញ ៩០ នាទី៕

អត្ថបទ៖ សេម កុសល