ករណីចោមរោមដេញវាយរថយន្ដមួយគ្រឿងនៅខណ្ឌដូនពេញ មិនមែនជាករណីបុករត់នោះទេ ខណៈម្ចាស់រថយន្ដបានដាក់ពាក្យបណ្ដឹងដើម្បី​រកយុត្តិធម៌

កម្លាំងនគរបាលប៉ុស្តិ៍នគរបាលស្រះចក នៃអធិការដ្ឋាននគរបាលខណ្ឌដូនពេញ បានធ្វើការឃាត់ម្ចាស់ និងរថយន្តមួយគ្រឿង ដែលប្រជាពលរដ្ឋបានចោមរោមវាយរថយន្ត បង្កការភ្ញាក់ផ្អើលថា រថយន្តបង្កគ្រោះថ្នាក់ចរាចរណ៍ហើយ ព្យាយាមបើករត់គេច។

ហេតុការណ៍នេះបានកើតឡើងនៅវេលាម៉ោង០៧និង៣០នាទី យប់ថ្ងៃទី១៦ ខែមេសា ឆ្នាំ២០២៦ នៃថ្ងៃចូលឆ្នាំថ្ងៃទី៣ ប្រពៃណីជាតិខ្មែរ ស្ថិតនៅចំណុចផ្លូវលេខ៩០ កែងផ្លូវព្រះស៉ីសុវត្ថិ មូលដ្ឋានសង្កាត់ស្រះចក ខណ្ឌដូនពេញ រាជធានីភ្នំពេញ។ ក្នុងហេតុការណ៍នេះ រថយន្តត្រូវបានរងការខូចខាត កញ្ចក់មុខក្រោយ, កញ្ចក់ទ្វារមុខខាងសាំង,កញ្ចក់ទ្វារក្រោយខាងឆ្វេង,កញ្ចក់មើលក្រោយខាងឆ្វេង,ស្តុបក្រោយមួយគូរ និងឆូតចំហៀងខាងឆ្វេង។

លោកវរសេនីយ៍ឯក ទៀង ច័ន្ទសារ អធិការនគរបាលខណ្ឌដូនពេញ បានបញ្ជាក់ប្រាប់ឲ្យដឹងថា កម្លាំងសមត្ថកិច្ចបានឃាត់រថយន្តមួយគ្រឿង ម៉ាក អាវតា ០៧ ពណ៌ខ្មៅ ពាក់ស្លាកលេខ កម្ពុជា MUSTA.FA ដែលមហាជនក៏ដូចបងប្អូនប្រជាពលរដ្ឋ ស្រែកឆោឡោថា បង្កគ្រោះថ្នាក់ហើយមិនឈប់ មកប៉ុស្តិ៍នគរបាលរដ្ឋបាលស្រះចក នៃអធិការដ្ឋាននគរបាលខណ្ឌដូនពេញ ដើម្បីសួរនាំ ពីហេតុការណ៍។

ក្រោយសួរនាំ ម្ចាស់រថយន្តបានប្រាប់នគរបាល ឲ្យបានដឹងពីដំណើររឿងថា នៅមុនពេលកើតហេតុ រូបខ្លួនជាមួយម្ដាយមីង និងបងប្អូនចំនួន០៥នាក់ បានធ្វើដំណើរចេញពីផ្ទះ មកដល់ផ្លូវលេខ៩០ កែងជាមួយផ្លូវ ព្រះស៉ីសុវត្ថិ ក៏មានអាជ្ញាធរ និងប៉ារ៉ាស ក៏បានបត់ស្ដាំតាមបណ្ដោយផ្លូវលេខ៩០ ក្នុងទិសដៅពីកើតទៅលិច បានពាក់កណ្ដាលផ្លូវ ស្រាប់តែស្ទះ ក៏មានម៉ូតូមួយគ្រឿង ម៉ាកសង់ឌ្រីម ពណ៌ខ្មៅ មកបុករថយន្តពីក្រោយ ពេលនោះម្ចាស់រថយន្តចុះមកមើល តែមិនឃើញម្ចាស់ម៉ូតូ ដោយម្ចាស់រថយន្តខឹងក៏លើកម៉ូតូនោះបោកផ្ដួលលើផ្លូវ។ ភ្លាមៗនោះម្ចាស់ម៉ូតូក៏មកដល់ ម្ចាស់រថយន្តបានវាយទៅលើម្ចាស់ម៉ូតូ តែមិនត្រូវ បានប្រជាពលរដ្ឋឃាត់បំបែក។ បន្ថែមទៀតនោះម្ចាស់ រថយន្តមិនចង់វែងឆ្ងាយ បានបើករថយន្តចេញ តែត្រូវបានប្រជាធ្វើដំណើរតាមផ្លូវស្រែកឆោឡោ យកដុំថ្មគប់មកលើរថយន្តរងការខូចខាត ចំណែកម្ចាស់ម៉ូតូគេចចេញពីកន្លែងហេតុបាត់ទៅ។

បច្ចុប្បន្នម្ចាស់រថយន្តបានដាក់ពាក្យបណ្ដឹង និងសូមឲ្យកម្លាំងសមត្ថកិច្ចស្រាវជ្រាវរកជនបង្កដើម្បីយកមកអនុវត្តតាមនីតិវិធី និងសងសំណងនូវការខូចខាតរបស់ម្ចាស់រថយន្ត៕

អត្ថបទ៖ សុភា