ចរាចរណ៍

ដឹកគ្រឿងញៀនឆ្លងខេត្ត បុករះរថយន្តពីរគ្រឿង ជាប់នៅខណ្ឌច្បារអំពៅ

បានផុស

១ year មុន

នៅ

ថ្ងៃចន្ទ ១៤ វិច្ឆិកា ២០២២

ដោយ

រថយន្តនីសាន់ ពាក់ស្លាកលេខខេមរភូមិន្ទ ដឹកគ្រឿងញៀនចេញពីរាជធានីភ្នំពេញ ឆ្លងទៅខេត្តលឿនដូចហោះ ជ្រុលបុករថយន្តព្រូស បន្តទៅបុករថយន្តCRV បណ្ដាលឲ្យរងការខូចខាតយ៉ាងដំណំ សមត្ថកិច្ចចុះពិនិត្យរកឃើញថ្នាំញៀន ២០០ គីឡូក្រាម។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ហេតុការណ៍នេះបានកើតឡើងកាលពីវេលាម៉ោង ១១ និង ៣០ នាទីយប់ ថ្ងៃទី ១៣ ខែវិច្ឆិកា ឆ្នាំ ២០២២ នៅតាមបណ្ដោយផ្លូវជាតិលេខ ១ សង្កាត់វាលស្បូវ ខណ្ឌច្បារអំពៅ។

តាមប្រភពព័ត៌មានឲ្យដឹងថា មុនកើតហេតុគេបានឃើញរថយន្តម៉ាកនីសាន់ ពណ៌ត្រេអ៊ី ពាក់ស្លាកលេខខេមរភូមិន្ទ 2-1415 បើកបរតាមបណ្ដោយផ្លូវជាតិលេខ ១ ទិសដៅពីលិចទៅកើតក្នុងល្បឿនលឿនដូចហោះ ខណៈមកដល់ចំណុចកើតហេតុ ក៏រេចង្កូតបុកនឹងរថយន្តម៉ាកព្រូស ពណ៌ស ពាក់ស្លាកលេខភ្នំពេញ 2AL 1235 ដែលធ្វើដំណើរ ទិសដៅពីកើតទៅលិចពេញទំហឹង ហើយរថយន្តបង្កនៅមិនទាន់អស់ល្បឿន ក៏ជ្រុលបុករថយន្តម៉ាក CRV ពណ៌ទឹកប្រាក់ ពាក់ស្លាកលេខភ្នំពេញ 2H7699 ធ្វើដំណើរស្របជាមួយរថយន្តព្រូស បណ្ដាលឲ្យរងការខូចខាតយ៉ាងដំណំ ភ្លាមៗនោះតៃកុងរថយន្តបង្កគេចខ្លួនបាត់។

បន្ទាប់មកសមត្ថកិច្ចបានចុះទៅដល់ចំណុចកើតហេតុ ពិនិត្យក្នុងរថយន្តបង្កមានកេសបិទជិត សង្ស័យទើបយកមកត្រួតពិនិត្យជាក់ស្ដែងនៅអធិការដ្ឋាននគរបាលខណ្ឌច្បារអំពៅឃើញមានថ្នាំញៀនចំនួន ២០០ គីឡូក្រាម។

ក្រោយកើតហេតុ ភាគីខាងរថយន្តព្រូស និងរថយន្តCRV សុំយករថយន្តទៅជួសជុលដោយខ្លួនឯង។ ក្នុងនោះ ដោយសាររថយន្តបទល្មើសជាអ្នកបង្ក ទើបសមត្ថកិច្ចឲ្យភាគីរងគ្រោះយករថយន្តទៅជួសជុលខ្លួនឯង។ ដោយឡែករថយន្តបង្កមានទាំងគ្រឿងញៀន សមត្ថកិច្ចកំពុងស្រាវជ្រាវតាមចាប់ជនល្មើសយកមកដាក់ទោសតាមច្បាប់៕

អត្ថបទ ៖ សុខា