បុរសជនជាតិចិនម្នាក់ស្រវឹងស្រាបើករថយន្ត​បុករះរថយន្ត និងម៉ូតូបណ្ដាលឲ្យប្ដីប្រពន្ធពីរនាក់របួសធ្ងន់

បុរសស្ត្រីជាប្ដីប្រពន្ធពីនាក់បានរងរបួសធ្ងន់ក្រោយជួបគ្រោះថ្នាក់ចរាចរណ៍ដោយបុរសជនជាតិចិនម្នាក់បើកបររថយន្តក្នុងសភាពស្រវឹងស្រាជ្រុលបុករះរថយន្ត និងម៉ូតូធ្វើដំណើរស្របទិសគ្នាអូសជាប់ក្រោមរថយន្ដផ្ទប់បង្គោលភ្លើង។

គ្រោះថ្នាក់ចរាចរណ៍នេះ កើតឡើងកាលពីវេលាម៉ោង៦និង២០នាទីល្ងាច ថ្ងៃទី២ ខែសីហា ឆ្នាំ២០២៤ នៅតាមផ្លូវជាតិលេខ៤ ភូមិថ្នល់បំបែក សង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ។

ជនរងគ្រោះទាំង២នាក់មានឈ្មោះ ថា ចិន្តា ភេទប្រុស អាយុ២៨ឆ្នាំ មុខរបរកម្មកររោងចក្រ ស្នាក់នៅក្រុងតាខ្មៅ ខេត្តកណ្តាល និងប្រពន្ធឈ្មោះ ព្រុំ លីកា អាយុ៣៨ឆ្នាំ មុខរបរកម្មការនីរោងចក្រ ស្នាក់នៅក្រុងតាខ្មៅ ខេត្តកណ្តាល។

តាមប្រភពបានឱ្យដឹងថា មុនកើតហេតុរថយន្តបង្កម៉ាកស្តារិច ពណ៌ស្ករពាក់ស្លាកលេខ ភ្នំពេញ 2N-5066 បើកបរដោយបុរសជនជាតិចិន ក្នុងសភាពស្រវឹងស្រា បានបើកលឿនពីលិចទៅកើត ដល់ចំណុចកើតហេតុជ្រុលបុកពីក្រោយរថយន្ត KIA Morning ពណ៌ក្រហម ពាក់ស្លាកលេខ ភ្នំពេញ 2AX-8942 ឈប់ចតចិញ្ចើមផ្លូវបណ្តាលអោយ​ខូចខាត រួចរថយន្តមិនទាន់អស់ល្បឿន បន្តទៅបុកម៉ូតូហុងដាឌ្រីម ជិះដោយជនរងគ្រោះ២នាក់ប្តីប្រពន្ធ ក្នុងដំណើរស្របទិសគ្នា ជាប់ទាំងជនរងគ្រោះ និងទាំងម៉ូតូពីក្រោមរថយន្តអូសទៅបុកផ្ទប់បង្គោលភ្លើង ទើបទៅមុខលែងរួច របួសធ្ងន់២នាក់ប្តីប្រពន្ធ អ្នកបើកបរត្រូវបានសមត្ថកិច្ចឃាត់ខ្លួនបានភ្លាមៗ។

ក្រោយកើតហេតុជនរងគ្រោះទាំង២នាក់ត្រូវបានរថយន្តសង្គ្រោះរបស់អង្គភាព៧១១ កងពលតូចលេខ៧០ ដឹកបញ្ជូនទៅមន្ទីរពេទ្យព្រះកុសុមៈ ចំណែករថយន្ត២គ្រឿង ម៉ូតូមួយគ្រឿង និងជនបើកបររថយន្តបង្កម្នាក់ ត្រូវបានប្រគល់ឱ្យការិយាល័យចរាចរណ៍ជើងគោក ស្នងការដ្ឋាននគរបាលរាជធានីភ្នំពេញ ចាត់ចែងវាស់វែងយកទៅរក្សាទុក និងកសាងសំណុំរឿងតាមនីតិវិធី៕

អត្ថបទ៖ សំណាង