ចរាចរណ៍

រថយន្តសណ្ដោងកន្ទុយដឹកទូកុងតឺន័រ បើកលឿន បួងចង្កូតរង្វង់មូល ក្រឡាប់ផ្ងារជើង

បានផុស

៤ ខែ មុន

នៅ

ថ្ងៃសុក្រ ២០ ធ្នូ ២០២៤

ដោយ

រថយន្តសណ្ដោងកន្ទុយដឹកទូកុងតឺន័រ ១ គ្រឿង បើកលឿនដល់ចំណុចរង្វង់មូលមិនបន្ថយល្បឿន បួងចង្កូតខ្លាំង បណ្ដាលឲ្យក្រឡាប់ផ្ងារជើង សំណាងល្អអ្នកបើកបរលូនចេញតាមបង្អួចកញ្ចក់ទ្វាររងរបួសស្រាល ហើយគេចខ្លួនបាត់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ហេតុការណ៍នេះបានកើតឡើងកាលពីវេលាម៉ោង ៤ និង ៣០ នាទីរសៀល ថ្ងៃទី ១៩ ខែធ្នូ ឆ្នាំ ២០២៤ ស្ថិតតាមបណ្ដោយផ្លូវមហាវិថីស៊ីជីពីង ត្រង់ចំណុចរង្វង់មូលគល់ស្ពានអាកាស ភូមិជម្ពូវ័ន ១ សង្កាត់ចោមចៅទី ៣ ខណ្ឌពោធិ៍សែនជ័យ រាជធានីភ្នំពេញ។

បើតាមប្រភពព័ត៌មាននៅកន្លែងកើតហេតុបានឲ្យដឹងថា នៅមុនពេលកើតហេតុគេបានឃើញរថយន្តសណ្ដោងកន្ទុយកុងតឺន័រ ១ គ្រឿង ពណ៌ស ពាក់ស្លាកលេខភ្នំពេញ 3D-8501 ធ្វើដំណើរតាមបណ្ដោយផ្លូវមហាវិថីស៊ីជីពីង ទិសដៅពីត្បូងទៅជើង លុះដល់ចំណុចកើតហេតុ ដោយសារដឹកធ្ងន់ពេក ហើយអ្នកបើកបរបើកលឿន បួងចង្កូតខ្លាំងពេក ក៏បណ្តាលឲ្យក្រឡាប់ទៅខាងស្តាំដៃផ្ងារជើង។ សំណាងល្អ អ្នកបើកបរលូនចេញតាមបង្អួចកញ្ចក់ទ្វារ គ្រាន់តែរងរបួសស្រាល ហើយគេចខ្លួនបាត់។

ប្រភពបានបន្តឲ្យដឹងថា ក្រោយកើតហេតុសមត្ថកិច្ចផ្នែកជំនាញមូលដ្ឋាន បានចុះទៅដល់កន្លែងកើតហេតុទាក់ទងទៅសមត្ថកិច្ចជំនាញ នៃការិយាល័យចរាចរណ៍ជើងគោករាជធានីភ្នំពេញ ធ្វើការវាស់វែងយករថយន្តរក្សាទុក រង់ចាំដោះស្រាយគ្នានៅពេលក្រោយ៕

អត្ថបទ ៖ សុខា