ចរាចរណ៍

សង្ស័យស្រវឹង បើករថយន្តបុកម៉ូតូពីក្រោយរបួសស្រាលម្នាក់ រួចគេចទៅបុកម៉ូតូ ១ គ្រឿងទៀត ស្លាប់មនុស្សម្នាក់

បានផុស

១ year មុន

នៅ

ថ្ងៃអាទិត្យ ១៩ មករា ២០២៥

ដោយ

ជនជាតិបរទេសម្នាក់ សង្ស័យស្រវឹង បើករថយន្តបុកម៉ូតូ ១ គ្រឿង ពីក្រោយ បណ្ដាលឲ្យម្ចាស់ម៉ូតូរងរបួសស្រាល រួចបន្តបើករត់គេចទៅបុកម៉ូតូ ១ គ្រឿងទៀត ស្លាប់មនុស្សម្នាក់ ទើបឃាត់ជនបង្កបាន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ហេតុការណ៍នេះបានកើតឡើងកាលពីវេលាម៉ោង ១០ យប់ ថ្ងៃទី ១៨ ខែមករា ឆ្នាំ ២០២៥ ស្ថិតតាមបណ្ដោយផ្លូវភ្នំពេញហាណូយ សង្កាត់ឃ្មួញ ខណ្ឌសែនសុខ រាជធានីភ្នំពេញ។

ប្រភពព័ត៌មានពីប្រជាពលរដ្ឋក្បែរទីតាំងកើតហេតុបានឲ្យដឹងថា គេឃើញបុរសម្នាក់ បើករថយន្ត CHANGAN HUNTER ពាក់ស្លាកលេខ ភ្នំពេញ 2CB-8950 តាមបណ្ដោយមហាវិថី មិត្តភាព ភ្នំពេញ-ហាណូយ ក្នុងល្បឿនលឿន។ ស្របពេលមកដល់ចំណុចច្រកចូលបុរី ហ្គ្រេនភ្នំពេញ រថយន្តបានជ្រុលបុកបុរសម្នាក់ជិះម៉ូតូហុងដាឌ្រីម ពាក់ស្លាកលេខ ភ្នំពេញ 1CI-7399 បណ្ដាលឲ្យរងការខូចខាត និងម្ចាស់ម៉ូតូរងរបួសស្រាល។ ភ្លាមៗ នោះ ជនបង្កបានព្យាយាមបើករត់គេចខ្លួនរហូតមកបុកជាមួយម៉ូតូហុងដាឌ្រីម ១ គ្រឿងទៀត ពាក់ស្លាកលេខ កំពង់ចាម 1V-3653 បណ្ដាលឲ្យម្ចាស់ម៉ូតូស្លាប់នៅនឹងកន្លែង។ ខណៈនោះ ជនបង្កបានព្យាយាមបើករថយន្តទៅមុខរហូតដល់ស្តុប ៩២ ទើបសមត្ថកិច្ចឃាត់បានទាំងរថយន្ត និងជនបង្កជាជនជាតិបរទេស។

ក្រោយពេលកើតហេតុ សមត្ថកិច្ចជំនាញចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ ចុះមកធ្វើការវាស់វែងយករថយន្ត និងម៉ូតូទាំងពីរគ្រឿង ទៅរក្សាទុក រង់ចាំការដោះស្រាយនៅពេលក្រោយ។ ចំណែកឯសពជនរងគ្រោះ ប្រគល់ជូនសាច់ញាតិយកទៅធ្វើបុណ្យតាមប្រពៃណី៕

អត្ថបទ ៖ រដ្ឋា