និស្សិតស្រីម្នាក់ជិះម៉ូតូបុកបង្គោលភ្លើងស្លាប់ទាំងព្រឹកនៅខណ្ឌឬស្សីកែវ

នារីជានិស្សិតសាកលវិទ្យាល័យកម្ពុជាម្នាក់បានបោលក្បាលស្លាប់នៅកន្លែងកើតហេតុ ខណៈពេលជិះម៉ូតូមកពីធ្វើការពេលយប់ជ្រុលទៅមុខបង្គោលភ្លើងបំភ្លឺផ្លូវកាលពីវេលាម៉ោង៥និង៤៥នាទីព្រឹកថ្ងៃទី២៧ ខែមេសា ឆ្នាំ២០២៥ នៅចំណុច ផ្លូវ១៨០០ ក្នុងភូមិទួលពពែ សង្កាត់ទួលសង្កែទី២ ខណ្ឌឬស្សីកែវ​ រាជធានីភ្នំពេញ​។

ជនរងគ្រោះដែលស្លាប់បាត់បង់ជីវិតឈ្មោះ សាង គីមឡាង ភេទស្រី អាយុ២៨ឆ្នាំ ជានិស្សិតសាកលវិទ្យាល័យកម្ពុជាស្នាក់នៅផ្ទះ២F ផ្លូវបេតុង ភូមិគោលគោ សង្គាត់គីឡូម៉ែត្រ៦ ខណ្ឌឬស្សីកែវ រាជធានីភ្នំពេញ ជិះម៉ូតូម៉ាក HONDA scoopy-i ពណ៌ស ពាក់ស្លាកលេខ ភ្នំពេញ១IF-៦២៨១សេរី២០១២។

តាមសាក្សីនៅកន្លែងកើតហេតុ មុនពេលកើតហេតុជនរងគ្រោះបានជិះម៉ូតូតែម្នាក់ឯងធ្វើដំណើរតាមបណ្ដោយផ្លូវ ១៨០០ ក្នុងទិសដៅពីលេច ទៅកេីត។ ពេលមកដល់ចំណុចកើតហេតុខាងលេីក៏រេចង្កូតទៅខាងស្តាំដៃបុកបង្គោលភ្លេីងបំភ្លឺផ្លូវពេញទំហឹងបណ្ដាលឲ្យបោកក្បាលស្លាប់នៅនឹងកន្លែងកើតហេតុតែម្ដង។ ដោយឡែកប្រភពពីអ្នកស្គាល់ថា នៅមុនពេលកើតហេតុជនរងគ្រោះបានផឹកស្រាបៀរអស់៣កំប៉ុង នៅកន្លែងធ្វើការហាងចិនមួយកន្លែង រួចក៏ធ្វើដំណើរទៅផ្ទះក៏បានជួបគ្រោះអកុសលតែម្តង។

បច្ចុប្បន្នសពនារីរងគ្រោះ និងម៉ូតូត្រូវបានសមត្ថកិច្ចប្រគល់ទៅឲ្យក្រុមគ្រួសារយកទៅធ្វើបុណ្យតាមប្រពៃណីនៅផ្ទះតាមបណ្ដោយផ្លូវ៥១ក្នុង ស្រុកឧដ្ដុង ខេត្តកំពង់ស្ពឺ៕

អត្ថបទ៖ សំណាង