គីម ជុងអ៊ុន ថ្លែងសុន្ទរកថាសរសើរជីតារបស់ខ្លួន មុនប្រារព្ធខួបលើកទី៨០របស់បក្សកាន់អំណាច

យោងតាមប្រព័ន្ធផ្សព្វផ្សាយរដ្ឋ KCNA មេដឹកនាំកូរ៉េខាងជើង លោក គីម ជុងអ៊ុន បានសរសើរស្ថាបនិករបស់គណបក្សពលករកូរ៉េ (WPK) ដែលកំពុងកាន់អំណាច ជាពិសេសជីតារបស់លោក នៅមុនខួបលើកទី ៨០របស់គណបក្សនេះ នៅថ្ងៃទី១០ ខែតុលា។

នៅក្នុងសុន្ទរកថានៅឯសារមន្ទីរស្ថាបនិកបក្សក្នុងទីក្រុងព្យុងយ៉ាង លោក គីម ជុងអ៊ុន បានសរសើរជីតារបស់លោកគឺលោក គីម អ៊ីលស៊ុង ដែលបានបង្កើតកូរ៉េខាងជើង និងជាអ្នកបដិវត្តន៍ដំបូងរបស់ប្រទេសrរួមជាមួយវីរៈជនផ្សេ។ លោក​បាន​និយាយ​ថា ពួកគេ​បាន​ជួយ​បង្កើត​គ្រឹះ​ដ៏​រឹងមាំ​ដែល​រក្សា​គណបក្ស​កាន់​អំណាច​អស់​រយៈពេល ៨០ ឆ្នាំ​។

លោក គីម បានប្រាប់មនុស្សជំនាន់នេះថា ពួកគេត្រូវតែស្មោះត្រង់នឹងគោលដៅដើមរបស់គណបក្ស ហើយបន្តធ្វើការដើម្បីសង្គមនិយម ដូចបុព្វបុរសរបស់ពួកគេបានធ្វើ។ លោក​ក៏​បាន​ជំរុញ​ពួកគេ​ឲ្យ​ការពារ​ជំនឿ និង​ទំនៀមទម្លាប់​របស់​គណបក្ស ដោយ​រក្សា​ភាពស្មោះត្រង់ និង​មិន​ផ្លាស់ប្តូរ​តាម​ពេលវេលា​។

ការប្រារព្ធពិធីមានការចូលរួមពីមន្រ្តីបរទេសជាន់ខ្ពស់ រួមមាននាយករដ្ឋមន្ត្រីចិន លោក Li Qiang ប្រធានគណបក្សកាន់អំណាចរបស់រុស្ស៊ី លោក Dmitry Medvedev និងប្រធានបក្សកុម្មុយនិស្តវៀតណាមលោក To Lam ដែលជាការកត់សម្គាល់ដំណើរទស្សនកិច្ចលើកដំបូងរបស់មេដឹកនាំគណបក្សវៀតណាមទៅកាន់កូរ៉េខាងជើងក្នុងរយៈពេលជិត ២០ ឆ្នាំមិនធ្លាប់មាន។ ទីក្រុងហាណូយបានអះអាងថា កិច្ចព្រមព្រៀងសហប្រតិបត្តិការត្រូវបានរំពឹងទុកក្នុងអំឡុងដំណើរទស្សនកិច្ចនេះ។

គួររម្លឹកថាកាលពីខែមុន លោក គីម បានបង្ហាញខ្លួនជាមួយប្រធានាធិបតីចិនលោក ស៊ី ជីនពីង និងលោកវ៉្លាឌីមៀរ ពូទីនប្រធានាធិបតីរុស្ស៊ីនៅឯព្យុហយាត្រាយោធាក្នុងទីក្រុងប៉េកាំង ដោយបង្ហាញពីទំនាក់ទំនងដែលកំពុងរីកចម្រើនក្នុងចំណោមប្រទេសទាំងបី។ ខណៈពេលដែលទីក្រុងព្យុងយ៉ាងមិនបានបញ្ជាក់ថាតើខ្លួននឹងរៀបចំក្បួនដង្ហែរផ្ទាល់ខ្លួនក្នុងខួបនេះឬអត់ទេ ប៉ុន្តែមន្ត្រីកូរ៉េខាងត្បូងជឿថាការត្រៀមរៀបចំកំពុងដំណើរការ។

ព្រឹត្តិការណ៍នេះគូសបញ្ជាក់ពីកិច្ចខិតខំប្រឹងប្រែងរបស់លោក គីម ក្នុងការគូសបញ្ជាក់ពីប្រវត្តិសាស្រ្តរបស់គណបក្ស ពង្រឹងសម្ព័ន្ធភាពក្នុងតំបន់ និងគម្រោងការរួបរួមជាតិ ចំពេលខ្លួមមានភាពឯកោដោយសារទណ្ឌកម្មអន្តរជាតិ៕

អត្ថបទ៖ ប៊ុន សុភាព