គ្រោះថ្នាក់តាមដងផ្លូវនៅប៉ាតាយ៉ាកើនឡើង ខណៈប៉ូលិសចរាចរណ៍ថៃចាប់ផាកយកលុយ តែពីជនបរទេស

គ្រោះថ្នាក់ចរាចរណ៍នៅប៉ាតាយ៉ាកំពុងកើនឡើង ប៉ុន្តែអាជ្ញាធរក្នុងតំបន់ហាក់ដូចជាផ្តោតលើការផាកពិន័យអ្នកបើកបរបរទេសជាជាងការដោះស្រាយវិបត្តិសុវត្ថិភាពចរាចរណ៍ដែលកំពុងកើនឡើងរបស់ប្រទេសថៃ។ នេះបើយោងតាមការចេញផ្សាយរបស់សារព័ត៌មាន Pattaya Mail នៅថ្ងៃទី១០ខែតុលា។

ជនបរទេសនៅប៉ាតាយ៉ាថា ខណៈពេលដែលក្មេងជំទង់ក្នុងស្រុកប្រណាំងម៉ូតូ រាំបែកស្លុយតាមផ្លូវ និងបើកបរដោយមិនពាក់មួកសុវត្ថិភាព ប៉ូលិសមិនខ្វល់នៅតែបន្តកំណត់គោលដៅលើជនបរទេសចំពោះការបំពានតិចតួច ដូចជាបាត់ឯកសារ ឬការត្រួតពិនិត្យមួកសុវត្ថិភាព។

ប្រជាពលរដ្ឋ​ចោទ​ប៉ូលិស​ថា​យក​ចំណូល​ជា​អាទិភាព​លើ​សុវត្ថិភាព ដោយ​បង្វែរ​ការ​អនុវត្ត​ច្បាប់​ចរាចរណ៍​ឲ្យ​ទៅ​ជា​ប្រព័ន្ធ​គិត​លុយ។ អ្នកស្រុកដែលជាជនជាតិបរទេសរស់នៅប៉ាតាយ៉ាយូរឆ្នាំម្នាក់បាននិយាយថា«ប៉ូលិសផាកពិន័យជនបរទេសព្រោះពួកគេដឹងថាជនបរទេសនឹងបង់ប្រាក់» ដោយកត់សម្គាល់ថាអ្នកជិះក្នុងស្រុកដែលមិនប្រុងប្រយ័ត្នតែងតែឆ្លងកាត់ប៉ុស្តិ៍ត្រួតពិនិត្យដោយគ្មានបញ្ហា។

ទោះបីជាមានការរងរបួស និងស្លាប់រាប់រយនាក់ជារៀងរាល់ខែក៏ដោយ ក៏ប៉ូលិសចរាចរណ៍ថៃផ្តល់តែយុទ្ធនាការសុវត្ថិភាពជានិមិត្តរូបជំនួសឱ្យកំណែទម្រង់ពិតប្រាកដ។ ក្រុមអ្នករិះគន់និយាយថា បញ្ហានេះធ្វើឱ្យខូចដល់ការជឿទុកចិត្តរបស់សាធារណៈជន និងព្រងើយកន្តើយចំពោះមូលហេតុឫសគល់បង្កគ្រោះថ្នាក់លើដងផ្លូវរបស់ទីក្រុងប៉ាតាយ៉ា ដូចជាការបើកបរហួសល្បឿនកំណត់ ការបើកបរក្នុងស្ថានភាពស្រវឹង និងអ្នកជិះគ្មានប័ណ្ណបើកបរ។

ពលរដ្ឋថាលុះត្រាតែអាជ្ញាធរថៃអនុវត្តច្បាប់ដោយស្មើភាព និងជាប់លាប់ ពុំនោះទេផ្លូវនានារបស់ប៉ាតាយ៉ានឹងនៅតែជាតំបន់គ្រោះថ្នាក់៕

អត្ថបទ៖ ប៊ុន សុភាព