កាន់ ម៉េងហុង ធ្វើ​ការ​ធ្ងន់​នៅ​បារាំង ដណ្តើមខ្សែក្រ​វាត់ WKN ប៉ះម្ចាស់ផ្ទះម្ចាស់ខ្សែក្រ​វាត់​៣ស្ថាប័ន

កីឡាករគុនខ្មែរ កាន់ ម៉េងហុង ទទួលបានឱកាសថ្មី ដោយក្លាយជាកីឡាករ កម្ពុជា ដំបូងគេ នឹងត្រូវចេញទៅប្រទេស បារាំង ដើម្បីដណ្តើមខ្សែក្រវាត់ពិភពលោក WKN World Bantamweight នៅថ្ងៃ ទី ២២ ខែ វិច្ឆិកា ឆ្នាំ ២០២៥។

ស្ថាប័ន WKN បានប្រកាសជាផ្លូវការកាលពីថ្ងៃ ចន្ទ ទី ១៣ ខែ តុលា ឆ្នាំ ២០២៥ ថា កីឡាកររបស់ក្លិប KKIF កាន់ ម៉េង ហុង នឹងត្រូវឆ្លងទ្វីប​ទៅប្រទេស បារាំង ដើម្បីប្រកួតដណ្តើមខ្សែក្រវាត់ពិភពលោក WKN World Champions ទម្ងន់ស្រាល ទល់នឹងកីឡាករសញ្ជាតិ បារាំង Akram Hamidi។

តាមរយៈប្រវត្តិត្រួសៗ កីឡាករបារាំង Akram Hamidi អាចត្រូវបានគេចាត់ទុកជាកីឡាករជើងខ្លាំងម្នាក់នៅក្នុងប្រភេទទម្ងន់​ក្រោម​ ៥៥ គីឡូក្រាម។ បច្ចុប្បន្ន កីឡាករ​មានវ័យ ២៦ ឆ្នាំ និងកម្ពស់ ១.៧០ ម៉ែត្រ កំពុងគ្រងខ្សែក្រវាត់ពិភពលោក ៣ ស្ថាប័នធំៗ ក្នុងនោះមានខ្សែក្រវាត់ស្ថាប័ន WKN ២ ខ្សែ រួមមានខ្សែក្រវាត់ WKN European Oriental Rules និង WKN World K-1 Flyweight។ ដោយឡែក ២ ស្ថាប័នទៀតរួមមាន WBC អន្តរជាតិ និង ISKA World Flyweight។

Akram Hamidi ជាកីឡាករម្នាក់ មានជំនាញលើការប្រកួតលក្ខណៈឃីកបុកស៊ីង។ រូបគេធ្លាប់ឆ្លងកាត់ការប្រកួតអាជីពចំនួន ៣៨ ដង ឈ្នះ ៣២ ដង (ផ្តួលដៃគូឱ្យសន្លប់ ២០ ដង) ចាញ់ ៥ ដង និងស្មើ ១ ដង។ ក្នុងចំណោមការប្រកួតទាំងនោះរូបគេធ្លាប់ប្រកួតនៅសង្វៀន ONE ៤ លើក ហើយជាលទ្ធផល គឺឈ្នះ ២ និងចាញ់ ២។ ក្រៅអំពីការប្រកួត ឃីគបុកស៊ីង រូបគេក៏ធ្លាប់ប្រកួតសកលបាន ១ ដងផងដែរ ក្នុងនោះរូបគេទទួលជ័យជម្នះដោយពិន្ទុ។

ក្រឡេកមកកាន់កីឡាករ កាន់ ម៉េងហុង វិញ បច្ចុប្បន្ន ជាកីឡាករលំដាប់ A ម្នាក់របស់ កម្ពុជា ក្នុងទម្ងន់ ៥៤ គីឡូក្រាម។ កីឡាកររបស់ក្លិប KKIF រូបនេះ ក៏ធ្លាប់ចេញទៅប្រឡូកនៅក្រៅ​ប្រទេស​ច្រើនផងដែរ ក្នុងនោះមានទាំងឈ្នះ និងចាញ់ ប៉ុន្តែការប្រកួតដែលចាប់អារម្មណ៍ គឺ ម៉េងហុង ធ្លាប់ប្រកួតនៅសង្វៀន K-1 ដែលជាសង្វៀនដ៏ធំរបស់ ជប៉ុន កាលពីខែ សីហា ឆ្នាំ ២០២៤ ដែលពេលនោះរូបគេបានចាញ់កីឡាករម្ចាស់ផ្ទះ ជប៉ុន Akihiro Kaneko ដោយសន្លប់ទឹកទី ៣។

យ៉ាងណា នេះជាឱកាសថ្មីមួយទៀតសម្រាប់កីឡាករគុនខ្មែរម្ចាស់ខ្សែក្រវាត់ស្ថាប័ន IPCC Kun Khmer ដែលត្រូវចេញទៅប្រកួតនៅ អឺរ៉ុប ជាលើកដំបូង ដើម្បីដកស្រង់បទពិសោធថ្មី ក៏ដូចជាស្តារប្រជាប្រិយភាពរបស់ខ្លួននៅទីនោះ ក្នុងនាមជាកីឡាករគុនខ្មែរតំណាងឱ្យ កម្ពុជា ម្នាក់៕

អត្ថបទ៖ សេម កុសល