អ្នកខេត្តអាយុធ្យា ចេញធ្វើបាតុកម្មប្រឆាំងរដ្ឋាភិបាលថៃ ព្រោះវេទនាដោយទឹកជំនន់ខ្លាំងពេក

អ្នកខេត្តអាយុធ្យា ជាង៣០០នាក់ បាននាំគ្នាធ្វើបាតុកម្មប្រឆាំងរដ្ឋាភិបាលថៃ ព្រោះតែរដ្ឋមិនព្រមបើកទ្វារទឹករំដោះទៅតំបន់ផ្សេង ទុកឲ្យទឹកជន់លិចសហគមន៍របស់ពួកគេជាង៣ខែមកហើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការផ្សាយរបស់ The Star នៅថ្ងៃសៅរ៍ទី៨ខែវិច្ឆិកាឆ្នាំ២០២៥, ពលរដ្ឋនាំគ្នាបិទផ្លូវ Ayutthaya-Sena រង់ចាំឲ្យរដ្ឋដោះស្រាយ ដោយទាមទារឲ្យបើកទ្វារទឹក Sam Ko និង Chao Jet ជាបន្ទាន់ ដើម្បីជួយរំដោះទឹកចេញពីផ្សារ Sena និងតំបន់ក្បែរៗឲ្យហូរទៅកាន់តំបន់ Tung Ja Phaet, Tung Bang Sai និង Tung Koo Solat។

បច្ចុប្បន្ន នាយកដ្ឋានធនធានទឹកបានបញ្ចេញទឹក ២ ៧០០ម៉ែត្រគូបក្នុងមួយវិនាទី បន្ថែមពីលើទឹកជំនន់ដែលកំពុងជន់លិចស្រាប់ទៅហើយ បង្កជាទុក្ខវេទនារឹតធ្ងន់ដល់ពលរដ្ឋក្នុងស្រុកជាច្រើន។

តំបន់រងគ្រោះខ្លាំងជាងគេគឺស្រុក Sena, Bang Ban និង Phak Hai ដែលទឹកជំនន់បានបំផ្លាញផ្ទះសម្បែងជាង ៣០ ០០០ខ្នង ហើយគ្រួសារខ្លះត្រូវបង្ខំចិត្តដេកតាមចិញ្ចើមផ្លូវ។

បាតុកម្មនេះធ្វើឡើងស្របពេលខេត្តចំនួន៧នៅប្រទេសថៃ បានប្រកាសអាសន្នទឹកជំនន់ឈានដល់ពណ៌ក្រហម ដែលជាកម្រិតធ្ងន់ធ្ងរបំផុត ដោយសារតែទំនប់ ចៅប្រាយ៉ា នឹងទម្លាយទឹកយ៉ាងគំហុកព្រោះទប់លែងឈ្នះបណ្តាលមកពីភ្លៀងធ្លាក់ឥតឈប់ជាឥទ្ធិពលព្យុះបន្តបន្ទាប់។

តាមការផ្សាយរបស់ Khaosod ដែលដកស្រង់ប្រភពពី ទីភ្នាក់ងារអវកាសនិងភូមិសាស្ត្រព័ត៌មានវិទ្យាជាតិនៃប្រទេសថៃ (GISTDA) នៅថ្ងៃសៅរ៍ទី៨ខែវិច្ឆិកាឆ្នាំ២០២៥, ខេត្តទាំង៧ដូចជា Chainat, Singburi, Ang Thong, Suphanburi, Phra Nakhon Si Ayutthaya, Saraburi និង Pathum Thani សុទ្ធតែដាក់ក្នុងគ្រាអាសន្ននិងតម្រូវឲ្យមានការពិនិត្យតាមដានឲ្យដិតដល់ ខណៈទំនប់ចៅប្រាយ៉ា ទំនងជានឹងទម្លាយទឹកចេញក្នុងកម្រិត ២ ៨០០ម៉ែត្រគូបក្នុងមួយវិនាទី។

GISTDA បានចេញការព្រមានថា តំបន់ទាំង៧ខាងលើ នឹងរងការលិចលង់ធ្ងន់ធ្ងរ ជាពិសេសដីកសិកម្មនិងសហគមន៍នៅតាមដងទន្លេ៕

អត្ថបទ៖ សុខ សុវណ្ណ

ចុចអាន៖ ៧ខេត្តនៅថៃប្រកាសអាសន្នពណ៌ក្រហម ព្រោះទំនប់ ចៅប្រាយ៉ា ទប់ទឹកលែងជាប់