អាមេរិក វាយប្រហារលើទូកសង្ស័យដឹកគ្រឿង ញៀនសម្លាប់មនុស្ស ៦នាក់នៅមហាសមុទ្រប៉ាស៊ីហ្វិក

យោងតាមការចេញផ្សាយរបស់សារព័ត៌មាន CNA នៅថ្ងៃទី១១ខែ វិច្ឆិការ សហរដ្ឋអាមេរិកបានសម្លាប់មនុស្ស៦នាក់បន្ថែមទៀតនៅក្នុងការវាយប្រហារតាមអាកាសលើទូកពីរគ្រឿងដែលខ្លួនអះអាងថាកំពុងរត់ពន្ធគ្រឿងញៀននៅភាគខាងកើតមហាសមុទ្រប៉ាស៊ីហ្វិក។

រដ្ឋមន្ត្រីក្រសួងការពារជាតិអាមេរិកលោក Pete Hegseth បាននិយាយថា ការវាយប្រហារទាំងនេះបានកើតឡើងកាលពីថ្ងៃអាទិត្យ ហើយបានបំផ្លាញទូកទាំងពីរគ្រឿង ដោយសម្លាប់មនុស្សគ្រប់គ្នានៅលើទូក ហើយគ្មានកងទ័ពអាមេរិកណាម្នាក់រងរបួសទេ។

គួរបញ្ជាក់ថាការវាយប្រហារទាំងនេះគឺជាផ្នែកមួយនៃយុទ្ធនាការមួយដែលបានចាប់ផ្តើមនៅក្នុងខែកញ្ញាក្រោមការដឹកនាំរបស់ប្រធានាធិបតី ដូណាល់ ត្រាំ ប្រយុទ្ធប្រឆាំងនឹង «ក្រុមជួញដូរគ្រឿងញៀនភេរវករ» នៅអាមេរិកឡាទីន ប៉ុន្តែអ្នករិះគន់និយាយថា រដ្ឋាភិបាលអាមេរិកមិនបានបង្ហាញភស្តុតាងច្បាស់លាស់ថា ទូកទាំងនោះកំពុងដឹកគ្រឿងញៀន ឬមានទំនាក់ទំនងជាមួយភេរវករនោះទេ។ រហូតមកដល់ពេលនេះ យ៉ាងហោចណាស់មនុស្ស ៧៦ នាក់ត្រូវបានសម្លាប់ និងនាវាចំនួន ២០ គ្រឿងត្រូវបានបំផ្លាញ។

ក្រុមសិទ្ធិមនុស្ស និងអង្គការសហប្រជាជាតិបានថ្កោលទោសការវាយប្រហារទាំងនេះ ដោយហៅពួកគេថាជាការសម្លាប់ខុសច្បាប់ ឬ ក្រៅប្រព័ន្ធតុលាការ។ លើសពីនេះក្រុមគ្រួសាររបស់អ្នកដែលត្រូវបានសម្លាប់ក៏បាននិយាយដែរថា ជនរងគ្រោះមួយចំនួនគ្រាន់តែជាអ្នកនេសាទប៉ុណ្ណោះ។ អ្នករស់រានមានជីវិតពីរនាក់ដែលមកពីប្រទេសអេក្វាឌ័រ និងកូឡុំប៊ី ត្រូវបានបញ្ជូនទៅផ្ទះវិញរួចហើយ ហើយមិនត្រូវបានចោទប្រកាន់ពីបទឧក្រិដ្ឋណាមួយឡើយ។

ក្នុងពេលជាមួយគ្នានេះ យោធាអាមេរិកបានបញ្ជូននាវាកងទ័ពជើងទឹកបន្ថែមទៀតទៅកាន់តំបន់ការ៉ាប៊ីន ហើយមានគម្រោងបន្ថែមក្រុមនាវាផ្ទុកយន្តហោះដ៏ធំមួយក្នុងពេលឆាប់ៗនេះ។ សហរដ្ឋអាមេរិកនិយាយថា នេះគឺដើម្បីប្រយុទ្ធប្រឆាំងនឹងការរត់ពន្ធគ្រឿងញៀន ប៉ុន្តែប្រទេសវេណេស៊ុយអេឡាជឿថា ការបង្កើតកម្លាំងនេះពិតជាមានបំណងដាក់សម្ពាធ ឬដកមេដឹកនាំរបស់ខ្លួន គឺលោក Nicolas Maduro ចេញទៅវិញទេ៕

អត្ថបទ៖ ប៊ុន សុភាព