អ្នកស្លាប់ ​ដោយជំងឺកូវីដ១៩ នៅព្រៃវែង ​បូជារួចហើយ

​អ្នកស្លាប់​ដោយ​ជំងឺកូវីដ១៩ នៅមណ្ឌល​​ចត្តាឡីស័ក ចុង​ប៉ម​ ខេត្តព្រៃវែង បាន​បូជារួចហើយ ព្រឹកមិញ​នេះ។អ្នក​ជំងឺមាន​ឈ្មោះ ឡុច ផឹម ភេទប្រុស អាយុ៣៥ឆ្នាំ ដែលបានទទួលមរណភាព ដោយសារជំងឺកូវីដ-១៩ កាលពីថ្ងៃទី១៤ ខែមេសា ឆ្នាំ២០២១ វេលាម៉ោង​៦:២០នាទីព្រឹក។​ លោ​កមាន​ទីលំនៅស្ថិតក្នុងភូមិតាម៉ៅ ឃុំបឹងព្រះ ស្រុកបាភ្នំ ខេត្តព្រៃវែង ចុងក្រោយបានសម្រាកព្យាបាលនៅមន្ទីរពេទ្យបង្អែកខេត្តព្រៃវែង ក្រុងព្រៃវែង។

លោក ជា សុមេធី អភិបា​លខេត្តព្រៃវែង បានសម្ដែងនូវមរណៈទុក្ខជាមួយក្រុមគ្រួសារសពឈ្មោះ ឡុច ផឹម ភេទប្រុស អាយុ៣៥ឆ្នាំ ដែលបានទទួលមរណភាព ដោយសារជំងឺកូវីដ-១៩ និង​បានបន្តអំពាវនាវដល់ពលរដ្ឋអោយបន្តអនុវត្តគោលការណ៍ ៣ការពារ ៣កុំ ឲ្យបានគ្រប់ៗគ្នា។ ត្រូវចូលរួមសហការជាមួយអាជ្ញាធរមូលដ្ឋាន ក្នុងការរាយការណ៍អំពីជនសង្ស័យមានការប៉ះពាល់ដោយផ្ទាល់ ឬដោយប្រយោលនឹងអ្នកមានវិជ្ជមានកូវីដ-១៩ ដើម្បីអោយសមត្ថកិច្ចអន្តរាគមន៍នាំពួកគាត់មកពិនិត្យព្យាបាល និងធ្វើចត្តាឡីស័កអោយបានត្រឹមត្រូវ និងទាន់ពេលវេលា។

គិតត្រឹម​ថ្ងៃទី១៣ ខែមេសា ឆ្នាំ​២០២១ កម្ពុជាមានអ្នក​ស្លាប់​ដោយសារជំងឹកូវីដ១៩ ចំនួន ៣៣ន​ាក់ រក​ឃើញ​ករណី​ឆ្លង​កូវីដ-១៩ ចំនួ​ន ១៨១នាក់ ក្នុងនោះករណី ព្រឹត្តិការណ៍សហគមន៍ ២០កុម្ភៈ មាន១៧៨នាក់ ករណីអ្នកដំណើរចូលមកកម្ពុជា និងអ្នកឆ្លងបន្តនៅក្នុងប្រទេសមានចំនួន២នាក់ និងករណីពលករធ្វើដំណើរមកពីប្រទេសថៃចំនួន១នាក់ ខណៈករណីជាសះស្បើយមានចំនួន៤០នាក់។ ដូច្នេះមកដល់ព្រឹកនេះកម្ពុជាមានអ្នកជំងឺកូវីដ-១៩សរុបចំនួន ៤,៦៩៦នាក់ អ្នកជំងឺជាសះស្បើយសរុប ២,២៥២នាក់ អ្នកជំងឺកំពុងសំរាកព្យាបាល ២,៤០៦នាក់៕