គណៈបញ្ជាការឯកភាពខណ្ឌ ៧ មករា ចាត់វិធានការក្ដៅចំពោះអ្នកយក​ផ្លូវសាធារណៈទទួលផ្ញើម៉ូតូឡាន បង្កការកកស្ទះចរាចរណ៍

កម្លាំងគណៈបញ្ជាការឯកភាពខណ្ឌ៧មករា បានបន្តចុះរៀបចំសណ្ដាប់ធ្នាប់នៅក្នុងមូលដ្ឋាន ដែលជាក់ស្ដែងនៅតាមទីកន្លែងមួយចំនួនតែងតែយកផ្លូវសាធារណៈ ដើម្បីប្រយោជន៍ផ្ទាល់ខ្លួនដោយទទួលផ្ញើរថយន្ត និងម៉ូតូ បង្កឲ្យបាត់បង់សណ្ដាប់ធ្នាប់សាធារណៈ និង បង្កការកកស្ទះចរាចរណ៍ដល់ប្រជាពលរដ្ឋអ្នកធ្វើដំណើរ។

ជាក់ស្ដែងនាព្រឹកថ្ងៃទី១៨ ខែវិច្ឆិកា ឆ្នាំ២០២៥នេះ កម្លាំងគណៈបញ្ជាការឯកភាពខណ្ឌ៧មករា ក្រោមការណែនាំពី លោក ថេង សុថុល អភិបាលខណ្ឌ៧មករា ឲ្យកម្លាំងសណ្ដាប់ធ្នាប់ចុះចាត់វិធានការការក្ដៅចំពោះទីតាំងយកផ្លូវសាធារណៈ ដើម្បីប្រយោជន៍ផ្ទាល់ខ្លួនដោយទទួលផ្ញើរថយន្ត និងម៉ូតូ នៅចំណុចផ្លូវលេខ១៦៩ កែងផ្លូវលេខ១១៤ ជាប់របងមន្ទីររៀបចំដែនដីនគរូបនីយកម្ម សំណង់ និងសុរិយោដីរាជធានីភ្នំពេញ ក្បែរស្តុបក្ដាន់២ មូលដ្ឋានសង្កាត់មិត្តភាព ខណ្ឌ៧មករា។

លោក ព្រំ ស៉ីថា អនុប្រធានសណ្ដាប់ធ្នាប់រដ្ឋបាលខណ្ឌ៧មករា បានបញ្ជាក់ឲ្យដឹងថា កន្លងមក អាជ្ញាធរខណ្ឌ៧មករា តែងចុះផ្សព្វផ្សាយណែនាំជាប្រចាំឲ្យពលរដ្ឋប្រកបអាជីវកម្មចូលរួមរក្សាចិញ្ជើមផ្លូវសាធារណៈ ដើម្បីសោភ័ណភាពដងផ្លូវ កាត់បន្ថយការកក់ស្ទះចរាចរណ៍ សូមឈប់បន្តយកផ្លូវសាធារណៈប្រកបអាជីវកម្មផ្ទាល់ខ្លួន។ ដូចទីតាំងខាងលើនេះតែងតែយកផ្លូវសាធារណៈទទួលផ្ញើម៉ូតូឡានចតពេញផ្លូវ ចតទាំងចំណុចផ្លូវកែង មិនខ្វល់ពីការលំហូរចរាចរណ៍របស់ប្រជាពលរដ្ឋអ្នកធ្វើដំណើរឡើយ។

ក្នុងការចុះចាត់វិធានការនេះ កម្លាំងអាជ្ញាធរបានយករនាំងដែកចាក់សោកង់រថយន្តដែលចតលើផ្លូវ និងម៉ូតូមួយចំនួនផងដែរ។

ពាក់ព័ន្ធសណ្ដាប់ធ្នាប់សាធារណៈនេះដែរ រដ្ឋបាលខណ្ឌ៧មករា ក្រោមការដឹកនាំរបស់លោក ថេង សុថុល អភិបាលខណ្ឌ តែងតែជំរុញដល់មន្រ្តីក្រោមឱវាទពាក់ព័ន្ធបន្តយកចិត្តទុកដាក់ជាប្រចាំដើម្បីសោភ័ណភាពតាមដងផ្លូវ កាត់បន្ថយការកកស្ទះ និងរក្សាបានចិញ្ជើមផ្លូវសម្រាប់អ្នកធ្វើដំណើរ។ បន្ថែមទៀតនោះ លោកអភិបាល បានបន្តយកចិត្តទុកដាក់ពីបញ្ហាចិញ្ជើមផ្លូវនេះគឺផ្លាស់ប្ដូរការ៉ូឡាចាស់ ដាក់ថ្មីផងដែរ៕

អត្ថបទ ៖ សុភា