មនុស្សជិត១០០០នាក់ស្លាប់នៅទូទាំងអាស៊ីអាគ្នេយ៍ ព្រោះ​ទឹកជំនន់ និងបំណាក់ដី

ទឹកជំនន់ធ្ងន់ធ្ងរ និងការបាក់ដីដែលបង្កឡើងដោយព្យុះត្រូពិចថ្មីៗនេះ បានសម្លាប់មនុស្សយ៉ាងតិច៩៥៤នាក់ នៅទូទាំងប្រទេសឥណ្ឌូណេស៊ី ស្រីលង្កា ថៃ និងម៉ាឡេស៊ី ខណៈដែលក្រុមអ្នកជួយសង្គ្រោះកំពុងតស៊ូដើម្បីទៅដល់សហគមន៍ដាច់ស្រយាល។ នេះ​បើ​យោង​តាម​ការ​ចុះ​ផ្សាយរបស់​ Al Jazeera នាថ្ងៃ​ចន្ទ​ទី​១​ខែ​ធ្នូ​ឆ្នាំ​២០២៥។

នៅក្នុងប្រទេស​ឥណ្ឌូណេស៊ី លោកប្រធានាធិបតី Prabowo Subianto បានបំពេញទស្សនកិច្ចនៅ​កោះ​ស៊ូម៉ាត្រាខាងជើង ហើយបាននិយាយថា អាទិភាពរបស់រដ្ឋាភិបាលគឺ«ការបញ្ជូនជំនួយចាំបាច់ជាបន្ទាន់» ដោយមានឧទ្ធម្ភាគចក្រ និងយន្តហោះត្រូវបានដាក់ពង្រាយដើម្បីទៅដល់ភូមិដែលត្រូវបានកាត់ផ្តាច់។ ប្រទេសឥណ្ឌូណេស៊ីបានកត់ត្រា​​មនុស្ស​យ៉ាងហោចណាស់៤៤២នាក់ស្លាប់ ខណៈដែលមនុស្សរាប់រយនាក់នៅតែបាត់ខ្លួន ដែលជំរុញ​ឲ្យ​មានការអំពាវនាវ​ឲ្យ​លោក Prabowo ប្រកាសភាពអាសន្នថ្នាក់ជាតិកាន់តែខ្លាំងឡើង។ ទីក្រុងហ្សាកាតាបានបញ្ជូននាវាពេទ្យចំនួនពីរ និងនាវាកងទ័ពជើងទឹកចំនួនបី ដែលដឹកសម្ភារៈទៅកាន់តំបន់ដែលផ្លូវនៅតែមិនអាចឆ្លងកាត់បាន។

នៅក្នុងប្រទេសស្រីលង្កា ដែលមនុស្សយ៉ាងហោចណាស់៣៣៤នាក់​ត្រូវបានសម្លាប់ដោយព្យុះស៊ីក្លូន Ditwah លោកប្រធានាធិបតី Anura Kumara Dissanayake បានប្រកាសដាក់ប្រទេសក្នុងភាពអាសន្ន និងអំពាវនាវរកជំនួយអន្តរជាតិ។ ឧទ្ធម្ភាគចក្រយោធាបានដឹកជញ្ជូនសម្ភារៈទៅកាន់អ្នកស្រុកដែលជាប់គាំង ទោះបីជា​ភីឡុត​ម្នាក់បានស្លាប់នៅក្នុង​ហេតុការណ៍​ធ្លាក់យន្តហោះ អំឡុងពេលចុះចតជាបន្ទាន់នៅភាគខាងជើងទីក្រុង Colombo ក៏ដោយ។

ប្រទេសថៃ បានរាយការណ៍ថាមានមនុស្ស១៧៦នា​ក់បាត់បង់​ជីវិត ដោយសារទឹកជំនន់ដែលកំពុងបន្តនៅភាគខាងត្បូង ដែលអាជ្ញាធរបានរងការរិះគន់ចំពោះការឆ្លើយតបរបស់ពួកគេ។ ទីភ្នាក់ងារសារព័ត៌មាន AFP បានរាយការណ៍ថា មន្ត្រីមូលដ្ឋានពីរនាក់ត្រូវបានព្យួរការងារ។ នៅក្នុងប្រទេសម៉ាឡេស៊ី​ដែលជាប្រទេសជិតខាង ទឹកជំនន់នៅរដ្ឋ Perlis ​ក៏​បានបណ្តាល​ឲ្យ​មនុស្សពីរនាក់ស្លាប់ផង​ដែរ។

ការបំផ្លិចបំផ្លាញចុងក្រោយនេះ កើតឡើងបន្ទាប់ពីអាកាសធាតុដ៏អាក្រក់ជាច្រើនសប្តាហ៍នៅទូទាំងអាស៊ីអាគ្នេយ៍ រួមទាំងព្យុះទីហ្វុងបន្តបន្ទាប់គ្នា ដែលបានវាយប្រហារប្រទេសហ្វីលីពីនកាលពីខែមុន ដោយបានសម្លាប់មនុស្សយ៉ាងតិច២៤២នាក់។ អ្នកវិទ្យាសាស្ត្រនិយាយថា ការប្រែប្រួលអាកាសធាតុ កំពុងបង្កើនព្យុះនៅទូទាំងតំបន់ ដោយបណ្តាល​ឲ្យ​មានភ្លៀងធ្លាក់ខ្លាំង និងគ្រោះមហន្តរាយញឹកញាប់ជាងមុន៕

ប្រែសម្រួល៖ ឈាង