ពលរដ្ឋថៃ ជាង១០លាននាក់មានបញ្ហាសុខភាពធ្ងន់ធ្ងរ ដោយសារខ្យល់ពុល ក្នុងឆ្នាំនេះ

តួលេខដែលធ្វើឲ្យពលរដ្ឋថៃភ្ញាក់ផ្អើលបង្ហាញថា ក្នុងឆ្នាំ២០២៥ ប្រជាជនប្រទេសនេះរហូតដល់ទៅជាង ១០លាននាក់មានបញ្ហាសុខភាពធ្ងន់ធ្ងរ ដោយសារតែឥទ្ធិពលនៃខ្យល់ពុល PM2.5។

តួលេខនេះបញ្ចេញដោយវេជ្ជបណ្ឌិត Supakorn Tultrairatana នៅឯមន្ទីរពេទ្យ Nopparat Rajathanee ដែលបង្ហាញពីគ្រោះថ្នាក់ធ្ងន់ធ្ងរនៃខ្យល់ពុល គ្របដណ្តប់ប្រទេសថៃ ក្នុងមួយឆ្នាំៗ។

ផ្សាយដោយ The Nation កាលពីថ្ងៃព្រហស្បតិ៍ទី៤ខែធ្នូឆ្នាំ២០២៥ តួលេខពីលោក Supakorn បង្ហាញថា ក្នុងចំណោមមនុស្សទាំងជាង១០លាននាក់នោះ ភាគច្រើនមានបញ្ហាផ្លូវដង្ហើម ដូចជាជំងឺហឺតនិងជំងឺស្ទះសួតរ៉ាំរ៉ៃ ហើយអ្នកខ្លះមានឡើងកន្ទួលលើស្បែកនិង បញ្ហាភ្នែក។

ក្នុងករណីធ្ងន់ធ្ងរបំផុត អ្នកជំងឺផ្លូវដង្ហើមខ្លះ ត្រូវការជំនួយពីម៉ាស៊ីនដកដង្ហើមជាចាំបាច់ដើម្បីរស់ ហើយខ្លះឈានដល់ការជំងឺមហារីកសួតតែម្តង។

ការបញ្ចេញតួលេខនេះកើតឡើងស្របពេលមានការព្រមានថា ខ្យល់ពុល PM2.5 នៅភាគខាងជើងនិងកណ្តាលប្រទេសថៃ រួមទាំងទីក្រុងបាងកកផងដែរនោះ នឹងឈានដល់កម្រិតគ្រោះថ្នាក់ពណ៌ក្រហម ពោលគឺគុណភាពខ្យល់ធ្លាក់ចុះអន់បំផុត ពិបាកដកដង្ហើមនៅចុងសប្តាហ៍នេះ។

អ្វីដែលកាន់តែធ្ងន់ធ្ងរនោះគឺថា ខ្យល់ពុលក្នុងកម្រិតគ្រោះថ្នាក់ នឹងគ្របដណ្តប់រាជធានីថៃនិងខេត្តមួយចំនួនទៀត ដល់ដើមឆ្នាំក្រោយ ដូច្នេះថៃត្រូវប្រឈមនឹងទុក្ខលំបាកបន្តទៀត៕

អត្ថបទ៖ សុខ សុវណ្ណ