ជាថ្មីម្តងទៀត ប្រមុខ UN បង្ហាញក្តីបារម្ភ អំពីជម្លោះកម្ពុជា-ថៃ 

ជាថ្មីម្តងទៀត អគ្គលេខាធិការអង្គការសហប្រជាជាតិ António Guterres បានបង្ហាញក្តីបារម្ភអំពីការផ្ទុះឡើងថ្មីនៃការប្រយុទ្ធគ្នានៅព្រំដែនកម្ពុជា-ថៃ ដោយលោកអំពាវនាវឲ្យភាគីទាំងពីរ ត្រូវមានការអត់ធ្មត់ខ្លាំងបំផុត។

តាមរយៈពេលសារបង្ហោះលើបណ្តាញសង្គម X កាលពីថ្ងៃអង្គារទី៩ខែធ្នូឆ្នាំ២០២៥ ត្រូវនឹងថ្ងៃពុធទី១០ (ពេលវេលានៅកម្ពុជា), លោក Guterres សរសេរថា៖ «ខ្ញុំបារម្ភណាស់ចំពោះរបាយការណ៍នៃការប៉ះទង្គិចគ្នាជាថ្មីដោយប្រដាប់អាវុធរវាងប្រទេសកម្ពុជា និងប្រទេសថៃ។ ខ្ញុំសូមអំពាវនាវដល់ភាគីទាំងពីរឲ្យអត់ធ្មត់ និងចៀសវាងការកើនឡើងជម្លោះបន្ថែមទៀត ហើយត្រូវប្តេជ្ញាចិត្តឡើងវិញចំពោះបទឈប់បាញ់ និងប្រើប្រាស់យន្តការទាំងអស់សម្រាប់កិច្ចសន្ទនា ដើម្បីស្វែងរកដំណោះស្រាយយូរអង្វែងចំពោះជម្លោះតាមរយៈមធ្យោបាយសន្តិភាព។ UN ត្រៀមខ្លួនជាស្រេចដើម្បីគាំទ្រដល់កិច្ចខិតខំប្រឹងប្រែងទាំងអស់ដែលមានគោលបំណងលើកកម្ពស់សន្តិភាព ស្ថិរភាព និងការអភិវឌ្ឍនៅក្នុងតំបន់»។

មុននេះដែរ អ្នកនាំពាក្យ UN លោក Stephane Dujarric បានក៏បានពាំនាំសម្តីលោក Guterres ដែ​លបង្ហាញក្តីបារម្ភដូចគ្នានេះ ជាពិសេសការវាយប្រហារតាមអាកាស និងការចល័តឧបករណ៍ធុនធ្ងន់នៅតំបន់ព្រំដែន។

លោក Dujarric បាននិយាយក្នុងសេចក្តីថ្លែងការណ៍មួយថា ជម្លោះព្រំដែនកម្ពុជា-ថៃ បណ្តាលឲ្យមានជនស៊ីវិលស្លាប់និងរបួសយ៉ាងច្រើន ការខូចខាតហេដ្ឋារចនាសម្ព័ន្ធស៊ីវិល និងការផ្លាស់ទីលំនៅនៅតាមព្រំដែនទាំងពីរ។ ប្រមុខ UN បានសង្កត់ធ្ងន់ថា ភាគីទាំងពីរត្រូវតែការពារជនស៊ីវិល និងជួយសម្រួលដល់ការផ្តល់ជំនួយមនុស្សធម៌។

ងាកទៅសហរដ្ឋអាមេរិកឯណោះ ទីក្រុងវ៉ាស៊ីនតោនក៏ជំរុញឲ្យ​បញ្ឈប់​ជា​បន្ទាន់​នូវ​អរិភាព និង​ត្រឡប់​ទៅ​រក​វិធានការ​ដែល​មាន​ចែង​ក្នុង​កិច្ចព្រមព្រៀងសន្តិភាព​ទីក្រុងគូឡាឡាំពួ ថ្ងៃទី២៦ ខែតុលាវិញផងដែរ។

រដ្ឋមន្ត្រីការបរទេសអាមេរិក Marco Rubio និយាយថា៖ «អាមេរិក​ព្រួយ​បារម្ភខ្លាំងណាស់ បន្ទាប់ពីការ​ប្រយុទ្ធ​គ្នាផ្ទុះឡើងជាថ្មី ​នៅទីតាំង​មួយចំនួនតាម​បណ្តោយ​ព្រំដែន​កម្ពុជា-ថៃ បណ្តាលឲ្យមានការ​ស្លាប់មនុស្ស​និង​របួសជាច្រើននាក់»។

លោកបន្តថា៖ «យើងសូមជំរុញយ៉ាងមុតមាំឲ្យបញ្ឈប់ជាបន្ទាន់នូវអរិភាព ហើយការពារជនស៊ីវិល ដោយភាគីទាំងសងខាងត្រូវត្រឡប់ទៅរកវិធានការបន្ធូរបន្ថយភាពតានតឹង ដែលមានចែងក្នុងកិច្ចព្រមព្រៀងសន្តិភាពទីក្រុងគូឡាឡាំពួថ្ងៃទី២៦ ខែតុលា ឆ្នាំ២០២៥ ដែលចុះហត្ថលេខាដោយនាយករដ្ឋមន្ត្រីកម្ពុជា និងថៃ និងធ្វើជាសាក្សីដោយប្រធានាធិបតីអាមេរិក ដូណាល់ ត្រាំ និងនាយករដ្ឋមន្ត្រីម៉ាឡេស៊ី អាន់វ៉ា អ៊ីប្រាហ៊ីម»៕

អត្ថបទ៖ សុខ សុវណ្ណ