កូរ៉េខាងជើងលួចរូបិយបណ្ណគ្រីបតូ តម្លៃ​២ពាន់​លានដុល្លារ ក្នុង​ឆ្នាំ​២០២៥

អ្នកស្រាវជ្រាវបាននិយាយថា ក្រុមហេគឃ័រ (Hacker) កូរ៉េខាងជើងបានលួចរូបិយបណ្ណគ្រីបតូ ក្នុងតម្លៃជាប្រវត្តិសាស្ត្ររហូតដល់ ២ពាន់​លានដុល្លារក្នុងឆ្នាំ២០២៥ ដែលកើនឡើងជាង៥០%​ធៀបនឹងឆ្នាំមុន។ នេះបង្ហាញឲ្យឃើញកាន់តែច្បាស់ពីសមត្ថភាពដែលកំពុងកើនឡើងរបស់ទីក្រុងព្យុងយ៉ាង ក្នុងការអនុវត្តការលួចតាមប្រព័ន្ធឌីជីថលខ្នាតធំ។

យោងតាមក្រុមហ៊ុនវិភាគទិន្នន័យ Blockchain Chainalysis ទឹកប្រាក់ភាគច្រើនបានមកពីការវាយប្រហារលើបណ្តាញជួញដូរ Bybit កាលពីខែកុម្ភៈ ដែលជាការប្លន់គ្រីបតូដ៏ធំបំផុតមិនធ្លាប់មានក្នុងប្រវត្តិសាស្ត្រ ដោយក្រុមហេគឃ័របានលួចយកប្រាក់អស់ ១,៥​ពាន់​លានដុល្លារ។ ការលួចនេះ បានរុញច្រានចំនួនទឹកប្រាក់គ្រីបតូសរុបដែលកូរ៉េខាងជើងទទួលបាន កើនឡើងដល់យ៉ាងហោចណាស់ ៦,៧៥ពាន់​លានដុល្លារ គិត​ចាប់តាំងពី Chainalysis ចាប់​ផ្ដើម​ការ​តាមដានមក។

ក្រុមហ៊ុន Chainalysis បានបញ្ជាក់ថា កូរ៉េខាងជើងបានក្តោបក្តាប់ទឹកប្រាក់ភាគច្រើននៃចំនួនប្រាក់សរុបប្រហែល ៣,៤ពាន់​លានដុល្លារដែលត្រូវបានលួចពីឧស្សាហកម្មគ្រីបតូនៅទូទាំងពិភពលោកក្នុងឆ្នាំនេះ ទោះបីជាពួកគេអនុវត្តការវាយប្រហារចំនួនតិចជាងមុន ប៉ុន្តែមានលក្ខណៈស្មុគស្មាញជាងមុនក៏ដោយ។ អ្នកស្រាវជ្រាវបានបន្ថែមថា ទីក្រុងព្យុងយ៉ាងបានបង្កប់បុគ្គលិកផ្នែកព័ត៌មានវិទ្យា (IT) របស់ខ្លួនកាន់តែច្រើនឡើងនៅក្នុងក្រុមហ៊ុនគ្រីបតូ ដើម្បីទទួលបានសិទ្ធិចូលប្រើប្រាស់កម្រិតខ្ពស់។

Chainalysis បានបន្តថា ថវិកាដែលលួចបានទាំងនេះ ជួយផ្តល់ហិរញ្ញប្បទានដល់របបដឹកនាំ និងកម្មវិធីសព្វាវុធរបស់កូរ៉េ​ខាង​ជើង ដោយបន្ថែមថា ក្រុមហេគឃ័រ​របស់​ក្រុង​ព្យុងយ៉ាង បច្ចុប្បន្នបានប្រើប្រាស់បច្ចេកទេសលាងលុយកម្រិតខ្ពស់ ដើម្បីផ្ទេរប្រាក់ក្នុងចំនួនដ៏ច្រើនសន្ធឹកសន្ធាប់ដោយមិនឲ្យគេរកឃើញ៕

ប្រែសម្រួល៖ ឈាង