លោកត្រាំ ប្រកាស​ដក​អាមេរិកចេញពីអង្គការអន្តរជាតិជាង​៦០​ស្ថាប័ន

ប្រធានាធិបតី​អាមេរិក លោក ដូណាល់ ត្រាំ កាលពីថ្ងៃពុធ​ទី​៧​ខែ​មករា​ឆ្នាំ​២០២៦​ បានចុះហត្ថលេខាលើបទបញ្ជាប្រតិបត្តិមួយ ដើម្បីផ្អាកការគាំទ្ររបស់​ក្រុង​វ៉ាស៊ីនតោន​ចំពោះអង្គការ ភ្នាក់ងារ និងគណៈកម្មការអន្តរជាតិចំនួន​៦៦ ដែលនេះជាការបង្ហាញពីការដកថយយ៉ាងខ្លាំងរបស់រដ្ឋបាលលោក ពីកិច្ចសហប្រតិបត្តិការពហុភាគីពិភពលោក។

យោង​តាមទីភ្នាក់ងារ​ព័ត៌មាន AP បទបញ្ជានេះធ្វើឡើងបន្ទាប់ពីសេតវិមានបានត្រួតពិនិត្យយ៉ាងល្អិតល្អន់លើការផ្តល់មូលនិធិអន្តរជាតិ ដោយផ្តោតគោលដៅលើស្ថាប័ននានាដែលចំណុះឲ្យអង្គការសហប្រជាជាតិ ក៏ដូចជាអង្គការឯករាជ្យផ្សេងៗទៀត។ ក្នុងចំណោមស្ថាប័នដែលត្រូវដកខ្លួនចេញ រួមមានអនុសញ្ញាក្របខ័ណ្ឌអង្គការសហប្រជាជាតិស្តីពីការប្រែប្រួលអាកាសធាតុ (UNFCCC) ដែលជាសន្ធិសញ្ញាមូលដ្ឋានសម្រាប់កិច្ចចរចាអាកាសធាតុពិភពលោក និងមូលនិធិអង្គការសហប្រជាជាតិសម្រាប់ប្រជាជន ដែលផ្តល់សេវាសុខភាពបន្តពូជនៅទូទាំងពិភពលោក។

រដ្ឋ​មន្ត្រី​ក្រសួងការបរទេស លោក Marco Rubio បានការពារសេចក្តីសម្រេចនេះ ដោយលើកឡើងថា ស្ថាប័នទាំងនោះមានភាពស្ទួនគ្នា ការគ្រប់គ្រងមិនបានល្អ ឬផ្ទុយពីអធិបតេយ្យភាព និងផលប្រយោជន៍ជាតិរបស់​អាមេរិក។

រដ្ឋបាលលោកត្រាំ បានបញ្ជាក់ថា ខ្លួនមានបំណងបង្វែរថវិកាដែលបានពីអ្នកជាប់ពន្ធ ទៅពង្រឹងឥទ្ធិពលអាមេរិកក្នុងគំនិតផ្តួចផ្តើមដែលកំណត់ស្តង់ដារអន្តរជាតិ ជាទីដែលអាមេរិកត្រូវប្រកួតប្រជែងដោយផ្ទាល់ជាមួយប្រទេសចិន ដូចជាវិស័យទូរគមនាគមន៍ និងបទប្បញ្ញត្តិដែនសមុទ្រជាដើម។ ការផ្លាស់ប្តូរនេះ គឺជាការដើរចេញពីយុទ្ធសាស្រ្តការទូតបែបប្រពៃណីរបស់រដ្ឋបាលមុនៗ ហើយបានបង្ខំឲ្យអង្គការសហប្រជាជាតិចាប់ផ្តើម កាត់បន្ថយបុគ្គលិក និងកម្មវិធីរបស់ខ្លួនជាបន្តបន្ទាប់។

ការដកខ្លួនចេញពី UNFCCC បានរងការរិះគន់យ៉ាងខ្លាំងពីអ្នកជំនាញផ្នែកអាកាសធាតុ និងអតីតមន្ត្រីរដ្ឋាភិបាល ដោយពួកគេបានព្រមានថា ទង្វើនេះនឹងធ្វើឲ្យ​អាមេរិកស្ថិតក្នុងភាពឯកោ និងធ្វើឲ្យប៉ះពាល់ដល់កិច្ចខិតខំប្រឹងប្រែងជាសកលក្នុងការកាត់បន្ថយផល​ប៉ះពាល់​នៃ​​ឧស្ម័នផ្ទះកញ្ចក់។ អ្នករិះគន់បានអះអាងថា ការចាកចេញពីសន្ធិសញ្ញាឆ្នាំ១៩៩២នេះ ធ្វើឲ្យអាមេរិកបាត់បង់ឥទ្ធិពលលើការវិនិយោគពិភពលោករាប់ទ្រី​លានដុល្លារ ហើយអាចជាលេសឲ្យប្រទេសដទៃទៀតពន្យារពេលការប្តេជ្ញាចិត្តផ្នែកបរិស្ថានរបស់ពួកគេ៕

ប្រែសម្រួល៖ ឈាង