ករណីអគ្គិភ័យឆេះនៅផ្លូវវេងស្រេងកាលពី​យប់មិញ បណ្ដាលឲ្យខូចខាតផ្ទះ៣ល្វែង រួមទាំងរថយន្ត០២គ្រឿង

អគ្គិភ័យបានលេបត្របាក់ផ្ទះល្វែងលក់សំបកកង់រថយន្ត លក់ម៉ាសុីនត្រជាក់ និងលក់ភេសជ្ជៈ ចំនួន៣ល្វែងអស់ស្ទើរទាំងស្រុង ហើយបានបណ្តាលអោយមន្រ្តីអគ្គិភ័យ០២នាក់រងរបួស។

ហេតុការណ៍នេះកើតឡើងកាលពីវេលាម៉ោង ០៨និង៣០នាទីយប់ថ្ងៃទី១៥ ខែកុម្ភៈ ឆ្នាំ២០២៦ នៅតាមបណ្តោយផ្លូវវេងស្រេង ភូមិជ្រៃកោង សង្កាត់ចោមចៅទី២ ខណ្ឌពោធិ៍សែនជ័យ រាជធានីភ្នំពេញ។

តាមការបញ្ជាក់ពីប្រជាពលរដ្ឋបានអោយដឹងថា មុនកើតមានអគ្គិភ័យឆាបឆេះយ៉ាងសន្ធោសន្ធៅបែបនេះ គេឃើញបង្គោលភ្លើងដែលនៅជាប់ផ្ទះកើតហេតុ មានការឆ្លងចរន្តអគ្គិសនីឆាបឆេះខ្សែភ្លើង។ ភ្លាមៗ ប្រជាពលរដ្ឋបង្កការឆោឡោយកបំពង់ពន្លត់អគ្គិភ័យមកជួយបាញ់ពន្លត់ដែរ តែដោយសារអណ្តាតភ្លើងលាយលំខ្យល់ឆេះលឿនខ្លាំងពេកទើបពលរដ្ឋប្រញាប់រាយការណ៍ជូនសមត្ថកិច្ចដើម្បីអន្តរាគមន៍។

អគ្គិភ័យនេះបានបង្កខូចខាតផ្ទះ ១ល្វែងអស់ទាំងស្រុង រួមទាំងបានរាលដាលដល់ផ្ទះ០២ល្វែងទៀត រួមសំបកកង់រថយន្ត ម៉ាសុីនត្រជាក់ គ្រឿងភេសជ្ជៈមួយចំនួនធំ និងសម្ភារៈអស់ស្ទើរទាំងស្រុង។ ក្នុងនោះ រថយន្តពន្លត់របស់ការិយាល័យបង្ការពន្លត់អគ្គិភ័យ និងសង្គ្រោះ រថយន្តជំនួយកងពលតូចង៧០ រថយន្តក្រសួងមហាផ្ទៃ និងរថយន្តជំនួយជាច្រើនទៀតបានមកដល់ទីតាំងជាច្រើនគ្រឿង បាញ់អោយរលត់ជាស្ថាពរ។ ចំពោះមូលហេតុ សមត្ថកិច្ចកំពុងបើកការស្រាវជ្រាវ ដើម្បីស្វែងរកមូលហេតុអោយបានច្បាស់លាស់៕

អត្ថបទ៖ រដ្ឋា