ព្យុះខែប្រាំងបញ្ចេញឥទ្ធិពលនៅថៃ, វាយប្រហារខេត្ត Nakhon Ratchasima បង្កការបំផ្លិចបំផ្លាញ

ព្យុះខែប្រាំងនៅប្រទេសថៃ​ បានបញ្ចេញឥទ្ធិពលហើយ ដោយបង្កឲ្យមានភ្លៀងធ្លាក់ខ្លាំងនិងខ្យល់កន្ត្រាក់ វាយប្រហារខេត្ត Nakhon Ratchasima បង្កការបំផ្លិចបំផ្លាញ។

តាមការផ្សាយរបស់ Amarin កាលពីថ្ងៃចន្ទទី២៣ខែកុម្ភៈ, ព្យុះនេះបានវាយប្រហារពេញទំហឹង ខណៈបើតាមរូបភាពនិងវីដេអូបង្ហោះលើបណ្តាញសង្គម Facebook, គេបានឃើញឥទ្ធិពលព្យុះបោកបក់អំឡុងពិធីបុណ្យសពមួយនៅស្រុក Khon Buri។

ក្នុងការបង្ហោះនោះ, ខ្យល់ព្យុះបានបោកផ្តួលរោងបុណ្យ កួចកៅអី មានទាំងផ្លេកបន្ទោរនិងរន្ទះបាញ់ រួមជាមួយភ្លៀងធ្លាក់ដូចហែកមេឃ បោកបំបាក់ដើមឈើថែមទៀតផង។ យ៉ាងណា មកទល់ពេលនេះ មិនទាន់មានសេចក្តីរាយការណ៍អំពីមនុស្សស្លាប់ឬរងរបួសនោះទេ។  

ព្យុះនេះកើតឡើងបន្ទាប់ពីនាយកដ្ឋានឧតុនិយមថៃ បានចេញការព្រមានថា ខេត្តចំនួន៦០ពោលគឺសឹងតែទូទាំងប្រទេសទៅហើយ ដែលនឹងត្រូវវាយប្រហារដោយព្យុះខែប្រាំងយ៉ាងធ្ងន់ធ្ងរ ចាប់ពីដើមសប្តាហ៍នេះទៅ។

តាមការផ្សាយរបស់ The Nation ដែលដកស្រង់សេចក្តីប្រកាសរបស់នាយកដ្ឋានកាលពីថ្ងៃអាទិត្យទី២២ខែកុម្ភៈ, តំបន់ដែលនឹងរងគ្រោះធ្ងន់ធ្ងរជាងគេគឺភាគឦសាន កណ្តាល និងទីក្រុងបាងកក។

នៅភាគឦសាន ខេត្តទាំងអស់នឹងត្រូវរងគ្រោះ ចំណែកភាគកណ្តាល ព្យុះក៏នឹងវាយប្រហារគ្រប់ខេត្តផងដែរ លើកលែងតែ Phetchaburi និង Prachuap Khiri Khan ប៉ុណ្ណោះ។

តំបន់ខាងលើនឹងជួបប្រទះភ្លៀងធ្លាក់យ៉ាងគំហុក ខ្យល់បក់ខ្លាំងលាយឡំខ្យល់កន្ត្រាក់ ព្រមទាំងបាតុភូតធម្មជាតិដ៏គ្រោះថ្នាក់ផ្សេងៗ ចាប់ពីថ្ងៃចន្ទទៅ៕

អត្ថបទ៖ សុខ សុវណ្ណ