ខេត្តក្រចេះរងឥទ្ធិពលភ្លៀងកក់ខែ អាចធ្វើឱ្យមាន​ប៉ះពាល់ដល់ផលដំណាំ

ខេត្តក្រចេះ ជាខេត្តមួយក្នុងចំណោមបណ្តាខេត្តស្ថិតនៅភាគឦសានប្រទេសកម្ពុជា ដែលជាតំបន់ខ្ពង់រាប នឹងត្រូវរងឥទ្ធិពលភ្លៀងកក់ខែ ចាប់ពីថ្ងៃទី២៦ ខែកុម្ភៈ ដល់ថ្ងៃទី៣ ខែមីនា ឆ្នាំ២០២៦។ នេះបើយោងតាមសេចក្តីជូនដំណឹងរបស់ក្រសួងធនធានទឹក និងឧតុនិយម នាថ្ងៃទី២៥ ខែកុម្ភៈ ឆ្នាំ២០២៦។

ខេត្តនៅតំបន់ខ្ពង់រាបក្នុងនោះរួមមាន ខេត្តក្រចេះ កំពង់ស្ពឺ ប៉ៃលិន ឧត្តរមានជ័យ ព្រះវិហារ ស្ទឹងត្រែង រតនគិរី មណ្ឌលគិរី តំបន់ជួរភ្នំក្រវាញ និងជួរភ្នំដងរែក អាចមានភ្លៀងកក់ខែធ្លាក់លាយឡំជាមួយបាតុភូត​ផ្គររន្ទះ និងខ្យល់កន្ត្រាក់គ្របដណ្តប់លើផ្ទៃដី ៤០%។

នៅតំបន់វាលទំនាបរួមមាន៖ ខេត្តបន្ទាយមានជ័យ បាត់ដំបង ពោធិ៍សាត់ សៀមរាប កំពង់ធំ កំពង់ឆ្នាំង កំពង់ចាម ត្បូងឃ្មុំ ព្រៃវែង ស្វាយរៀង កណ្តាល តាកែវ និងរាជធានីភ្នំពេញ អាចមានភ្លៀងកក់ខែធ្លាក់លាយឡំជាមួយបាតុភូត ផ្គររន្ទះ និងខ្យល់កន្ត្រាក់គ្របដណ្តប់លើផ្ទៃដី ៣០%។

នៅតំបន់មាត់សមុទ្រ រួមមាន៖ ខេត្តកោះកុង ព្រះសីហនុ កំពត កែប និងជួរភ្នំបូកគោ អាចមានភ្លៀងកក់ខែធ្លាក់ លាយឡំជាមួយបាតុភូតផ្គររន្ទះ និងខ្យល់កន្ត្រាក់គ្របដណ្តប់លើផ្ទៃដី ៤០%។

រលកសមុទ្រមានកម្ពស់មធ្យមអប្បបរមា ០,២៥ម៉ែត្រ និងកម្ពស់មធ្យមអតិបរមា ១,០០ម៉ែត្រ។

ផ្អែកលើស្ថានភាពធាតុអាកាសភ្លៀងកក់ខែនេះ អាចធ្វើឱ្យមានការប៉ះពាល់ដល់ផលដំណាំ ដូចជា ដំណាំស្វាយចន្ទី ជាដើម៕

អត្ថបទ៖ ប្រុញ វិធិន