បញ្ហារបស់អតីតពលករមកពីថៃ៖ របាយការណ៍សង់​ត្រាល់ គ្មានសុក្រឹត្យភាពត្រឹមត្រូវ​ព្រោះវិធីសាស្ត្រ​មិន​ស្រប​តាមវិជ្ជាជីវៈស្រាវជ្រា​វ

ភ្នំពេញ ៖ ក្រោយការចេញរបាយការណ៍របស់​អង្គការ​សង់​ត្រាល់ស្តីពីបញ្ហាពលករ អ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈលោក ស៊ុន មេសា នៅ​ថ្ងៃទី២៥ ខែមីនា ឆ្នាំ២០២៦នេះ បានពន្យល់ថា របាយ​ការណ៍របស់មជ្ឈមណ្ឌលសម្ព័ន្ធភាពការងារ និង​សិទ្ធិ​មនុស្ស (CENTRAL) មិនមាន​សុក្រឹត្យ​ភាពត្រឹម​ត្រូវ​ព្រោះ​វិធីសាស្ត្រមិនស្របតាមវិជ្ជាជីវៈស្រាវជ្រាវដែលមានភាពលម្អៀងនិងមិនអាចយកទៅវាយតម្លៃនិងសន្និដ្ឋានជារួមសម្រាប់អតីតពលករកម្ពុជាមកពីថៃទាំងអស់នោះឡើយ។

លោក ស៊ុន មេសា បានអះអាងថា “របាយការណ៍របស់​សង់ត្រាល់​មិនមានសុក្រឹត្យភាពត្រឹមត្រូវ និងមិន​អាច​តំណាងឱ្យបទពិសោធន៍ជាក់ស្ដែងរបស់បងប្អូនអតីតពលករទាំងអស់ដែលវិលមកកម្ពុជាឡើយ ព្រោះវិធី​សាស្ត្រ​ជ្រើសរើសអតីតពលករមកសម្ភាសន៍ គឺធ្វើឡើង​ដោយ​ដៅយ​កមនុស្សទុកជាមុន​មិនមែនជាការ​ជ្រើសរើស​ដោយ​ចៃដន្យដែលស្របតាមវិជ្ជាជីវៈស្រាវជ្រាវនោះទេ។ ពោល​គឺមិន​ស្របតាមវិជ្ជាជីវៈ​នៃការស្ទង់​មតិដែលធ្វើ​ឱ្យលទ្ធ​ផល​មិនអាចយកទៅសន្និដ្ឋាន និងវាយតម្លៃជារួមបានទេ”។

លោកស៊ុន មេសា បន្តថា ជុំវិញបញ្ហាពលករនេះ ក្រៅពី​អង្គ​ការសង់ត្រាល់ វិទ្យាស្ថានCDRI នៅឆ្នាំ២០២៦នេះ ក៏បានបញ្ចេញរបាយការណ៍សិក្សាស្រាវជ្រាវមួយបង្ហាញថា អតីតពលករដែលមកពីប្រទេសថៃ មានការងារធ្វើ​ជាង ៦០ម៉ឺននាក់​ដែលផ្ទុយពីអ្វីដែល​អង្គការសង់​ត្រាល់​បាន​លើកឡើង។ 

គិតត្រឹម​ពេលនេះ អតីតពលករ ៦៥ម៉ឺននាក់ហើយ​មាន​ការ​ងារធ្វើ​ដោយក្នុងនោះអតីត​ពលករប្រមាណជាង ៣៣ម៉ឺន​នាក់ទទួលបានការងារធ្វើក្នុងសហគ្រាស ក្រុម​ហ៊ុន រោងចក្រ និងកសិដ្ឋានធំៗ ខណៈដែល​ជាង ៣២ម៉ឺន​នាក់​បានធ្វើការក្នុងការដ្ឋានសំណង់ សិប្បកម្ម ភោជ​នីយដ្ឋាន កសិកម្ម និងកន្លែងលក់រាយ។

ជាមួយគ្នានេះ ដើម្បីជួយអតីតពលករមកពីប្រទេសថៃ ក្រសួងការងារ និងបណ្តុះបណ្តាលវិជ្ជាជីវៈ បានសហការ​ជាមួយ​អាជ្ញាធរមូលដ្ឋាន វិស័យឯកជន និងភាគីពាក់ព័ន្ធ បានដាក់ចេញវិធាន​ការជាង៣០ចំណុច ដើម្បីជួយ​សម្រួល​អតីតពលករតាំង​ពីនៅតាមព្រំ​ដែនរហូត​ដល់​មាន​ការ​ធ្វើ។ ក្នុងនោះ ក្រសួងបានរៀបចំវេទិកា​ប្រមាណជាង ៦០០​លើក​ចាប់តាំងពីខែមិថុនា ឆ្នាំ២០២៥​មកដល់​បច្ចុប្បន្ន។ 

បន្ថែមពីនេះ ក្រសួងបានកំពុង​រៀបចំវគ្គបណ្តុះ​បណ្តាល​ជំនាញខ្លីរយៈពេល១សប្តាហ៍ និង១ខែ បន្ថែមលើ​ការ​បណ្តុះ​បណ្តាលជំនាញបច្ចេកទេស និងវិជ្ជាជីវៈ ១,៥លាន​នាក់​របស់រាជរដ្ឋាភិបាល និងការទទួល​ស្គាល់​ជំនាញ​ពី​មុនរបស់អតីតពលករ រួមទាំងការបន្តរកការងារ និង​ផ្គូរ​ផ្គងការងារដែលក្រសួង​ក៏ពុងបន្តធ្វើឥត​ដាច់​ដើម្បី​ជួយអតីតពលករ។នេះបើតាមអ្នកនាំពាក្យ​ក្រសួង​ការ​ងារដដែល៕