ការ​ជួសជុលព្រះវិហារបុរាណអាយុជាង ១០០ ឆ្នាំ ក្នុង​​ក្រុង​ក្រចេះបញ្ចប់​ទាំងស្រុង

ព្រះវិហារបុរាណវត្តរកាកណ្ដាល ត្រូវបានជួសជុល កែលំអ ផ្នែកមួយចំនួនដោយក្រុមមន្ត្រីជំនាញនៃក្រសួងវប្បធម៌ និងវិចិត្រសិល្បៈ ដែល​មានរយៈពេល ៣ ខែចាប់អនុវត្តពីថ្ងៃទី១ ខែមករា ឆ្នាំ២០២៦ រហូតដល់ថ្ងៃទី៣១ ខែមិនា ឆ្នាំ២០២៦ បានបញ្ចប់ការជួសជុលជាស្ថាពរ។

លោក ទេព វាសនា ប្រធានមន្ទីរវប្បធម៌ និងវិចិត្រសិល្បៈខេត្តក្រចេះបានឲ្យដឹងបន្តថា ពាក់ព័ន្ធ​ការជួសជុល ក្រុមការងារបានដូរការ៉ូ ដោយសារការ៉ូមុនបែកបាក់ ព្រោះជាការ៉ូបែបបុរាណ ក្បឿងក៏មានអាយុកាលវែង ហើយព្រំក្បឿងនិងក្បាល​នាគជ្វា បង្កង់ដៃរណែង ដោយ​ក្រុមការងារក៏បានដាក់សំណាញ់កុំឲ្យប្រជៀវចូល។ ជារួមគ្រិះធំៗនៅល្អ ប៉ុន្តែអ្វីដែល​ខូចខាតតិចតួចគឺបានប្ដូរ ដូចជា ដៃរណែង ក្បឿងដូរទាំងស្រុង ដោយ​ក្រុមការងារដាក់ក្បឿងរចនាបទបែបខ្មែរឡើងវិញ ហើយបន្ថែមថ្នាំពណ៍ជំនួយ។ ចំណែកការលាបថ្នាំប្រើថ្នាំដែលធានាបានគុណភាពយូរអង្វែង និង​ការ​គូសគំនូសបន្ថែម។

កាលពី​ថ្ងៃទី៣១ ខែមីនា ឆ្នាំ២០២៥ លោកស្រីបណ្ឌិតសភាចារ្យ ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ អមដំណើរដោយថ្នាក់ដឹកនាំក្រសួងបានអចូលរួមពិធីពុទ្ធាភិសេកព្រះពុទ្ធរូប នៅព្រះវិហារបុរាណវត្តរកាកណ្ដាល ក្រោយបញ្ចប់ការជួសជុលជាស្ថាពរ។

ព្រះវិហារបុរាណវត្តរកាកណ្ដាល ដែលមានអាយុកាលជាង ១០០ឆ្នាំ គឺជាសំណង់បេតិកភណ្ឌដ៏សំខាន់មួយដែលបង្ហាញពីស្ថាបត្យកម្ម និងសិល្បៈខ្មែរក្នុងតំបន់ ស្ថិតតាមដងទន្លេមេគង្គ ក្នុងសង្កាត់រការកណ្តាល ក្រុងក្រចេះ ខេត្តក្រចេះ ។ គំនូរនិងចម្លាក់ដែលឆ្លាក់លេីឈេីយ៉ាងប្រណីតនៃព្រះវិហារនេះ មានតម្លៃសម្រាប់ការសិក្សាស្រាវជ្រាវផ្នែកប្រវត្តិសាស្ត្រ និងស្ថាបត្យកម្មខ្មែរ។

ព្រះវិហារបុរាណនេះត្រូវបានជួសជុលដោយក្រសួងវប្បធម៌ និងវិចិត្រសិល្បៈ ចំនួន០២លើក ដោយលេីកទី១ក្នុងខែកញ្ញា ឆ្នាំ២០០២ និងលេីកទី២ ក្នុងខែធ្នូ ឆ្នាំ២០២៥៕

អត្ថបទ៖ ប្រុញ វិធិន