អតីតនាយក​ FBI ​កំពុង​​ជាប់ចោទពីបទ​ផ្តល់​សញ្ញា​សម្លាប់ ​ប្រធានាធិបតី​ ដូណាល់​ ត្រាំ

អតីតនាយក FBI លោក James Comey ត្រូវបានចោទប្រកាន់ពីបទគំរាមកំហែងដល់ជីវិតរបស់ប្រធានាធិបតីសហរដ្ឋអាមេរិក លោក ដូណាល់ ត្រាំ ដែលជាការចោទប្រកាន់ជាផ្លូវការមួយកើតចេញពីរូបភាព ដែលលោកបានចែករំលែកនៅលើបណ្តាញសង្គមកាលពីឆ្នាំមុន។ នេះបើយោងតាមការចុះផ្សាយពីទីភ្នាក់ងារសារព័ត៌មាន BBC ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សេចក្តីសម្រេចក្នុងការចោទប្រកាន់នេះ ត្រូវបានធ្វើឡើងកាលពីថ្ងៃទី ២៨ ខែមេសា ដែលមានប្រភពចេញពីរូបថតមួយសន្លឹក ដែលលោក Comey បានបង្ហោះនៅលើបណ្តាញសង្គម Instagram កាលពីខែឧសភា ឆ្នាំ ២០២៥ ដែលបង្ហាញពីរូបសំបកខ្យងត្រូវបានតម្រៀបជាលេខរៀង ៨៦៤៧ នៅលើខ្សាច់ ត្រូវបានគេប្រើក្នុងន័យថា «ដកចេញ» ឬ «កម្ចាត់ចោល»។

លោក ត្រាំ បាន​ចាត់ទុក លេខ ៨៦ គឺជាពាក្យស្លោកដែលមានន័យថា «អំពើឃាតកម្ម» ខណៈដែលលេខ៤៧ សំដៅលើរូបលោក ដែលជាប្រធានាធិបតីទី ៤៧។ លោក លើក​ឡើង​ថា៖ «គេដឹងច្បាស់ណាស់ថា វាមានន័យយ៉ាងណា។ នោះមានន័យថា ការធ្វើឃាត»។

អគ្គរដ្ឋ​អាជ្ញាស្តីទី លោក Todd Blanche បាន​​ឲ្យ​ដឹង​ថា អតីតនាយកនៃការិយាល័យស៊ើបអង្កេតសហព័ន្ធ (FBI) រូបនេះ កំពុងប្រឈមមុខនឹងការចោទប្រកាន់ចំនួនពីរ​ករណី​ រួមមាន៖ ការគំរាមកំហែងដល់ជីវិត និងបង្ករបួសស្នាមលើរាងកាយប្រធានាធិបតីសហរដ្ឋអាមេរិកដោយចេតនា ក៏ដូចជាការផ្ញើសារគំរាមកំហែងក្នុងកម្រិតសហព័ន្ធផងដែរ។ បទចោទប្រកាន់នីមួយៗ អាចប្រឈមនឹងទោសជាប់ពន្ធនាគារអតិបរមារហូតដល់ ១០ ឆ្នាំ។

យោងតាមសម្តីរបស់លោក Blanche ការគំរាមកំហែងដល់ជីវិតបុគ្គលណាម្នាក់ គឺជាទង្វើដ៏គ្រោះថ្នាក់ និងអាចចាត់ទុកថាជាអំពើឧក្រិដ្ឋ។ មន្ត្រីរូបនេះបានបញ្ជាក់ថា «ក្រសួងយុត្តិធម៌នឹងមិនអត់ឱនឲ្យជាដាច់ខាត ចំពោះទង្វើណាដែលគំរាមកំហែងដល់ជីវិតរបស់ប្រធានាធិបតីសហរដ្ឋអាមេរិក»។

ជាការឆ្លើយតបទៅនឹងការចោទប្រកាន់នេះ លោក Comey បាននិយាយនៅក្នុងសន្និសីទសារព័ត៌មានមួយថា ក្នុងនាមជាអតីតនាយកនៃទីភ្នាក់ងារលោកដឹងច្បាស់អំពីការយកចិត្តទុកដាក់ និងផលវិបាកនៃការបង្ហោះបែបនេះ។ «ខ្ញុំនៅតែគ្មានទោស ខ្ញុំនៅតែមិនខ្លាច ហើយខ្ញុំនៅតែជឿជាក់លើប្រព័ន្ធតុលាការសហព័ន្ធឯករាជ្យ»។

លោក Comey បានបម្រើការជានាយក FBI ចាប់ពីឆ្នាំ ២០១៣ ដល់ឆ្នាំ ២០១៧ ហើយត្រូវបានប្រធានាធិបតីត្រាំ ដកតំណែង បន្ទាប់ពីលោកបានចូលកាន់តំណែងក្នុងអាណត្តិដំបូងបានរយៈពេល៤ខែ។ នៅពេលនោះ FBI កំពុងធ្វើការស៊ើបអង្កេតលើការចោទប្រកាន់អំពីទំនាក់ទំនងរវាងប្រទេសរុស្ស៊ី និងយុទ្ធនាការបោះឆ្នោតប្រធានាធិបតីឆ្នាំ ២០១៦ របស់លោកត្រាំ។

នៅក្នុងខែកញ្ញា ឆ្នាំ២០២៥ លោក Comey ត្រូវបានចោទប្រកាន់ពីបទផ្ដល់សក្ខីកម្មមិនពិត (ភូតកុហក) នៅចំពោះមុខសភា និងការរារាំងដល់កិច្ចដំណើរការនីតិវិធីរបស់សភា។ ពីរខែក្រោយមក ចៅក្រមសហព័ន្ធម្នាក់បានទម្លាក់ការចោទប្រកាន់ក្នុងសំណុំរឿងនេះចោល ដោយបានអះអាងថា រដ្ឋអាជ្ញាសហព័ន្ធដែលលោកត្រាំ បានជ្រើសរើសឲ្យមកចោទប្រកាន់នោះ មិនត្រូវបានតែងតាំងតាមនីតិវិធីត្រឹមត្រូវឡើយ៕

អត្ថបទ៖ សាង ស្រីល័ក្ខ