ប្រមុខមហាផ្ទៃឱ្យប្រគល់រថយន្តជួលរឹបអូសពីឧក្រិដ្ឋជនឆបោកតាមអនឡាញជិះ ទៅម្ចាស់​ដើមមានឯកសារស្របច្បាប់វិញ មិនត្រូវគាបយកលុយជាថ្នូរឡើយ

ករណីជនជាតិខ្មែរជួលរថយន្តឱ្យជនបរទេស ក្រោយមកជននោះពាក់ព័ន្ធអំពើឆបោកតាមអនឡាញត្រូវសមត្ថកិច្ចបង្ក្រាប និងដកហូត, ឧបនាយករដ្ឋមន្ត្រី ស សុខា ណែនាំឱ្យសមត្ថកិច្ចប្រគល់រថយន្តនោះទៅឱ្យម្ចាស់ដើមវិញ បើម្ចាស់មានឯកសារកម្មសិទ្ធិស្របច្បាប់ និងឯកសារជួលត្រឹមត្រូវ ដោយមិនត្រូវគាបសង្កត់យកលុយជាថ្នូរប្រគល់រថយន្តឡើយ។

អ្នកនាំពាក្យឧបនាយករដ្ឋមន្ត្រី ស សុខា លើកឡើងដូច្នេះលើបណ្ដាញសង្គមហ្វេសប៊ុកផ្លូវការនាថ្ងៃទី៥ ខែឧសភា នេះ ឆ្លើយតបនឹងសំណួរ ដែលសួរថា តើរថយន្តមានឯកសារកម្មសិទ្ធិ និងលិខិតជួលត្រឹមត្រូវ ដែលជួលឱ្យជនបរទេស ពេលសមត្ថកិច្ចចុះបង្ក្រាបបទល្មើសឆបោកតាមប្រព័ន្ធបច្ចេកវិទ្យា ហើយត្រូវដកហូត រថយន្តទាំងនេះត្រូវប្រគល់ជូនម្ចាស់វិញ ឬទុកជាសម្បត្តិរដ្ឋ?

លោក រ៉េន រតនៈ អ្នកនាំពាក្យបានស្រង់សម្ដីណែនាំរបស់រដ្ឋមន្ត្រីមហាផ្ទៃទៅកាន់សមត្ថកិច្ចជំនាញ ក្នុងកិច្ចប្រជុំតាមដានវឌ្ឍនភាពការងារបង្ក្រាបបទល្មើសឆបោកតាមប្រព័ន្ធបច្ចេកវិទ្យាធ្វើឡើងនាថ្ងៃទី៤ ខែឧសភា មកសរសេរដូច្នេះ៖«ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានណែនាំក្រុមប្រតិបត្តិការបង្ក្រាបបទល្មើសឆបោកតាមប្រព័ន្ធបច្ចេកវិទ្យាទាំងអស់ ក្នុងករណីប្រជាពលរដ្ឋខ្មែរបានជួលរថយន្តឱ្យ ជនបរទេស ហើយជនបរទេស ត្រូវបានសមត្ថកិច្ចឃាត់ខ្លួនពាក់ព័ន្ធបទល្មើស ដោយមានទាំងរថយន្តជួលនោះផង គឺសមត្ថកិច្ចយើង ត្រូវរៀបចំបែបបទប្រគល់រថយន្តនោះ ឱ្យទៅម្ចាស់រថយន្តវិញ ក្នុងករណីមានឯកសារជួល និងឯកសារកម្មសិទ្ធិរថយន្តច្បាស់លាស់ ស្របតាមច្បាប់។»។

ប្រមុខមហាផ្ទៃ លោក ស សុខា សង្កត់ធ្ងន់ទៅកាន់សមត្ថកិច្ចជំនាញថា ដាច់ខាត មិនត្រូវឱ្យមានការគាបសង្កត់ទាមទារប្រាក់ជាថ្នូរ នឹងការបំពេញបែបបទប្រគល់រថយន្តជូនទៅប្រជាពលរដ្ឋដែលជាម្ចាស់រថយន្តឡើយ៕