កុំរំលងឱកាសមាស! ការចុះឈ្មោះប្រកួតបាល់ទាត់ Freestyle អន្តរជាតិនៅ​ភ្នំពេញ ជិតផុតកំណត់ហើយ

សល់តែប៉ុន្មានសប្តាហ៍ទៀតប៉ុណ្ណោះ ភ្នំពេញនឹងក្លាយជាម្ចាស់ផ្ទះនៃព្រឹត្តិការណ៍ប្រកួតបាល់ Freestyle កម្រិតពិភពលោក WFFA Pules Phnom Penh 2026 ដែលនឹងទាក់ទាញក្រសែភ្នែកនៃអ្នកស្នេហាកីឡាបាល់ទាត់បែប Freestyle មកពីជុំវិញសកលលោក។

ក្នុងនាមជាម្ចាស់ផ្ទះនៃព្រឹត្តិការណ៍ WFFA Pulse Phnom Penh 2026 កម្ពុជាមិនត្រឹមតែរៀបចំទីលានសម្រាប់ទទួលស្វាគមន៍កំពូលតារាបាល់ទាត់លំដាប់អន្តរជាតិប៉ុណ្ណោះទេ ប៉ុន្តែថែមទាំងបើកទ្វារយ៉ាងទូលាយសម្រាប់អ្នកមានទេពកោសល្យក្នុងស្រុក ឱ្យទទួល​បាន​ឱកាស​បញ្ចេញសមត្ថភាពនៅលើឆាកលំដាប់ពិភពលោកផងដែរ។

ដូចនេះសូមបេក្ខជនទាំងអស់ដែលគិតថា ខ្លួនមានទេពកោសល្យ និងសមត្ថភាពនៃការលេងបាល់ Freestyle សូមរួសរាន់ឡើង ហ្វឹកហាត់ និងដាក់ពាក្យប្រកួតដើម្បីបង្ហាញឱ្យពិភពលោកឃើញថា យុវជនកម្ពុជាក៏មានទេពកោសល្យមិនចាញ់បរទេសឡើយ។ ការប្រកួតបាល់ទាត់ Freestyle មិនមែនគ្រាន់តែជាការលេងបាល់នោះទេ ប៉ុន្តែវាគឺជាសិល្បៈនៃការលេងស្ទាយបាល់ដោយមានភាពឆ្នៃប្រឌិត ការប្រើប្រាស់កម្លាំង និងការផ្តោតអារម្មណ៍កម្រិតខ្ពស់។

ការចូលរួមក្នុងកម្មវិធីនេះនឹងផ្តល់ឱ្យបេក្ខជននូវ បទពិសោធកម្រិតអាជីពវាជាឱកាសមាសក្នុងការវាស់ស្ទង់សមត្ថភាពជាមួយបេក្ខជនមកពីបណ្តាប្រទេសផ្សេងៗ។ លើសពីនេះវាគឺជា ការកសាងបណ្តាញជួបផ្ទាល់ជាមួយគ្រូបង្វឹក និងកីឡាករល្បីៗ ដែលនឹងជួយពង្រីកចំណេះដឹងក្នុងវិស័យនេះ។

កុំរំលងឱកាសដ៏កម្រនេះ សូមរំលឹកដល់យុវជន យុវតី និងកីឡាករគ្រាប់ពូជបាល់ទាត់ Freestyle ទាំងអស់ថា កាលបរិច្ឆេទឈប់ទទួលពាក្យចុះឈ្មោះគឺនៅត្រឹម៖ ថ្ងៃទី ៣០ ខែ ឧសភា ឆ្នាំ ២០២៦ ខាងមុខនេះតែប៉ុណ្ណោះ។ កុំទុកឱ្យពេលវេលាដ៏មានតម្លៃនេះកន្លងផុតទៅឱ្យសោះ។

ប្រសិនបើអ្នកមានបច្ចេកទេសប្លែកៗ មានភាពច្នៃប្រឌិតក្នុងការគ្រប់គ្រងបាល់ និងមានឆន្ទៈចង់ក្លាយជាចំណែកមួយនៃប្រវត្តិសាស្ត្រកីឡារបស់កម្ពុជា នេះគឺជាពេលវេលារបស់អ្នកហើយ។

បេក្ខជនអាចស្វែងរកព័ត៌មានបន្ថែម និងទាញយកទម្រង់បែបបទតាមរយៈ៖ https://www.fsmeet.com/…/b8c91433-780a-4693-83d8… អ្វីដែលកាន់តែពិសេសទស្សនិកជន អាចអញ្ជើញចូលរួមទស្សនាដោយសេរីចាប់ពីថ្ងៃទី ៦ និងទី៧ ខែមិថុនា ឆ្នាំ ២០២៦ នៅឯ The King’s School Vattanac Ville នៃអគារវឌ្ឍនៈ រាជធានីភ្នំពេញ ចាប់ពីម៉ោង ១រសៀលតទៅ៕