មន្ត្រីជំនាញក្រសួងការងារ កំពុងជួយអន្តរាគមន៍ករណីគ្រោះថ្នាក់ចរាចរណ៍នៅស្វាយរៀង បណ្តាលឱ្យកម្មករ ២៧នាក់រងរបួស

លោក ស៊ុន មេសា អ្នកនាំពាក្យ ក្រសួងការងារ និងបណ្តុះបណ្តាលវិជ្ជាជីវៈ បានឱ្យដឹងថា មន្ត្រីជំនាញរបស់ក្រសួងដែលមានទាំងមន្ទីរការងារ និងបេឡាជាតិសន្តិសុខសង្គម (ប.ស.ស.) រួមជាមួយអាជ្ញាធរមូលដ្ឋានពាក់ព័ន្ធបាននិងកំពុងជួយអន្តរាគមន៍ជួយបញ្ជូនកម្មករ-កម្មការនីដែលរងគ្រោះថ្នាក់ទៅកាន់មន្ទីរពេទ្យ។

លោក ស៊ុន មេសា អ្នកនាំពាក្យ ក្រសួងការងារ និងបណ្តុះបណ្តាលវិជ្ជាជីវៈ

បើតាមអ្នកនាំពាក្យរូបនេះ បានបញ្ជាក់ថា គ្រោះថ្នាក់ចរាចរណ៍ដែលកើតឡើងក្នុងភូមិថ្មី ឃុំស្វាយចេក ស្រុករំដួល ខេត្តស្វាយរៀង បណ្តាលមកពីការដាច់ហ្វ្រាំង ដែលធ្វើឱ្យក្រឡាប់ និងធ្វើឱ្យកម្មករចំនួន ២៧នាក់រងរបួស ក្នុងនោះរបួសធ្ងន់៥នាក់ និងស្រាល ២២នាក់។

នេះបើតាមលោក ស៊ុន មេសា ក្នុងស្មារតីយកចិត្តទុកដាក់ដល់កម្មករ-កម្មការិនី ក្រុមការងារជំនាញរបស់ក្រសួងបន្តយកចិត្តទុកដាក់តាមដាន និងសម្របសម្រួល ជាមួយមន្ទីរពេទ្យជាប្រចាំ។

ជាមួយគ្នានេះ លោក ស៊ុន មេសា អ្នកនាំពាក្យ ក្រសួងការងារ និងបណ្តុះបណ្តាលវិជ្ជាជីវៈបានអំពាវនាវយ៉ាងទទួចឱ្យគោរពច្បាប់ចរាចរណ៍ ពិនិត្យលក្ខណៈបច្ចេកទេសយានយន្តមុនពេលធ្វើដំណើរ និងយោគយល់គ្នាជាទីបំផុតលើដងផ្លូវ ដើម្បីកុំឱ្យកម្មករដែលជាអ្នកប្រើប្រាស់សេវាបន្តក្លាយជាជនរងគ្រោះ៕