ប្រមុខការពារជាតិទាត់ចោលការចោទថា កម្ពុជាបដិសេធយន្តការទ្វេភាគី ហើយកំពុងបង្កើនទ័ព សព្វាវុធ ដើម្បីបង្កសង្គ្រាមឆាប់ៗ

ប្រមុខការពាតិជាតិកម្ពុជា នាយឧត្ដមសេនីយ៍ ទៀ សីហា បានចេញមកទាត់ចោលចំពោះការផ្សាយចោទប្រកាន់ដោយគ្មានមូលដ្ឋាននៃការពិត ពីសំណាក់ភាគីថៃមកលើកម្ពុជា ថា «រដ្ឋមន្ត្រីក្រសួងការពារជាតិកម្ពុជា បដិសេធការប្រើប្រាស់យន្តការទ្វេភាគី ព្រមទាំងកំពុងបង្កើនទ័ព និងសព្វាវុធ ដើម្បីបង្កសង្គ្រាមក្នុងពេលឆាប់ៗនេះ»។ ប្រមុខការពារជាតិកម្ពុជា ចេញមកទាត់ចោលដូច្នេះ នាព្រឹកថ្ងៃទី៩ ខែមិថុនា ឆ្នាំ២០២៦ បន្ទាប់ពីសារព័ត៌មាន និងបុគ្គលមួយចំនួនថៃព្យាយាមចោទប្រកាន់។   

ឆ្លើយតបនឹងការចោទប្រកាន់ នាយឧត្ដមសេនីយ៍ ទៀ សីហា សរសេរបញ្ជាក់ទៅភាគីថៃ តាមបណ្ដាញសង្គមហ្វេសប៊ុកផ្លូវការ៖«កម្ពុជានៅតែប្រកាន់ខ្ជាប់ជំហរដោះស្រាយបញ្ហាដោយសន្តិវិធី ដោយគោរពតាមសេចក្តីថ្លែងការណ៍រួមស្តីពីកិច្ចព្រមព្រៀងសន្តិភាព នៅទីក្រុងកូឡាឡាំពួ កាលពីថ្ងៃទី២៦ ខែតុលា ឆ្នាំ២០២៥, និងសេចក្តីប្រកាសរួមនៃកិច្ចប្រជុំពិសេសលើកទី៣ នៃគណៈកម្មាធិការព្រំដែនទូទៅកម្ពុជា-ថៃ (GBC) ថ្ងៃទី២៧ ខែធ្នូ ឆ្នាំ២០២៥ និងយន្តការនានាដែលមានស្រាប់។ »។

គួរកត់សម្គាល់ថា ការផ្សព្វផ្សាយចោទប្រកាន់របស់ប្រព័ន្ធផ្សព្វផ្សាយនៅក្នុងប្រទេសថៃកើតឡើន ស្រពពេលដែលយោធាថៃធ្វើសកម្មភាពរំលោភបទឈប់បាញ់ជាបន្តបន្ទាប់ និងបង្កភាពតានតឹងខ្លាំងនៅតាមបន្ទាត់ព្រំដែនជាមួយកម្ពុជា ហើយរដ្ឋាភិបាលរបស់អនុទីន កំពុងរងការស្ដីបន្ទោសពីសំណាក់វិភាគ ​បញ្ញាវន្តរបស់ថៃ ថាអនុទីន នាយករដ្ឋមន្ត្រីថៃ ខ្វះប្រាជ្ញាក្នុងការដោះស្រាយបញ្ហា លុបក្រោយចោល MOU២០០១។  

ស្របពេលដែលកងទ័ពថៃបង្កបញ្ហា រំលោភបទឈប់បាញ់ឥតឈប់ឈរ ប្រមុខការពារជាតិកម្ពុជា នាយឧត្ដមសេនីយ៍ ទៀ សីហា សង្ឃឹមថាកម្ពុជា-ថៃ នឹងអាចដោះស្រាយបញ្ហា ដោយសន្តិវិធី និងបញ្ចៀសឱ្យបានជាដាច់ខាត់នូវការប្រើប្រាស់កម្លាំងយោធា។

គួររម្លឹកថា ប្រមុខរាជរដ្ឋាភិបាលកម្ពុជា សម្ដេចធិបតី ហ៊ុន ម៉ាណែត ធ្លាប់បានចេញមកបញ្ជាក់ជាច្រើនលើកមកហើយថា កម្ពុជាប្រកាន់ខ្ជាប់ការដោះស្រាយបញ្ហាដោយសន្តិវិធីដោយគោរពតាមច្បាប់អន្តរជាតិ អនុសញ្ញា សន្ធិសញ្ញា កិច្ចព្រមព្រៀង និងយន្តការទ្វេភាគីដែលកម្ពុជា និងថៃមានស្រាប់ ជៀសវាងការប្រើប្រាស់កងកម្លាំង ដើម្បីដោះស្រាយបញ្ហា ហើយ កម្ពុជាមិនទទួលស្គាល់ជាដាច់ខាតការប្រើប្រាស់កងកម្លាំងកែប្រែខ្សែបន្ទាត់ព្រំដែន និងការបង្កើតអង្គហេតុសម្រេចលើទីតាំងជាក់ស្ដែង៕

ដោយ៖ ង៉ិល ណារ៉ាត់