ជំងឺផ្សិតខ្មៅ បង្ខំឲ្យអ្នកជំងឺឥណ្ឌារាប់ពាន់នាក់ វះយកភ្នែកម្ខាងឬទាំងសងខាងចេញ បើចង់រស់

មនុស្សរាប់ពាន់នាក់ ត្រូវគ្រូពេទ្យវះយកភ្នែកចេញ បន្ទាប់ពីកើតជំងឺ “ផ្សិតខ្មៅ” នៅក្នុងប្រទេសឥណ្ឌា ដែលកំពុងរងការបំផ្លិចបំផ្លាញដោយវិបត្តិ កូវីដ-១៩។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បន្ទាប់ពីកើតមានរលកកូវីដទី២ដ៏មហន្តរាយ ការផ្ទុះឡើងនៃជំងឺ Mucormycosis ឬជំងឺ “ផ្សិតខ្មៅ” កំពុងបង្កភាពភ័យស្លន់ស្លោនៅទូទាំងប្រទេស។

យោងតាមសេចក្តីរាយការណ៍បានឲ្យដឹងថា ប្រហែល៦០ភាគរយ នៃអ្នកជំងឺដែលក្រុមគ្រូពេទ្យកំពុងព្យាបាល គឺត្រូវបង្ខំចិត្តវះយកភ្នែកម្ខាងឬភ្នែកទាំងសងខាងចេញ។

បន្ទាប់ពីត្រូវបានអនុញ្ញាតឲ្យចាកចេញពីមន្ទីរពេទ្យក្រោយជាសះស្បើយពីជំងឹកូវីដ-១៩ អ្នកជំងឺម្នាក់ឈ្មោះ Anil Wankhede មានអាការឈឺក្បាលនិងហើមភ្នែកខាងស្តាំ។

ក្រុមគ្រួសាររបស់គាត់ បាននាំគាត់ទៅជួបគ្រូពេទ្យជាច្រើននាក់ មុនពេលគាត់ត្រូវបានគេធ្វើរោគវិនិច្ឆ័យឃើញថាមានជំងឺផ្សិតខ្មៅ។

១០ថ្ងៃបន្ទាប់ពីភ្នែករបស់គាត់ឈឺ លោក Wankhede បានទៅជួបអ្នកជំនាញ។ អ្នកជំនាញប្រាប់គាត់ថា ជម្រើសតែមួយគត់គឺត្រូវវះកាត់ យកភ្នែកខាងស្តាំរបស់គាត់ចេញ ដើម្បីឲ្យជំងឺឈប់រាលដាល។

លោកវេជ្ជបណ្ឌិត Akshay Nair បានប្រាប់កាសែត The Times ថា “ប្រសិនបើយើងមិនវះកាត់យកភ្នែកចេញ រួមជាមួយជាលិកាសរសៃប្រសាទនិងត្របកភ្នែកទេនោះ ការឆ្លងអាចរាតដាលទៅដល់ខួរក្បាល។ នៅដំណាក់កាលនោះ យើងលែងអាចសង្គ្រោះជីវិតពួកគេបានហើយ”។

រដ្ឋភាគខាងលិច Gujarat ត្រូវបានវាយប្រហារយ៉ាងខ្លាំងដោយសារជំងឺនេះ ហើយរដ្ឋ Rajasthan បានប្រកាសថា ជំងឺផ្សិតខ្មៅគឺជា រោគរាតត្បាត៕

ប្រែសម្រួល៖ Vann Vann

ប្រភព៖ Daily Star

ចុចអាន៖ ឥណ្ឌា ផ្ទុះជំងឺមួយប្រភេទទៀត សាហាវជាងមេរោគ “ផ្សិតខ្មៅ”