អាជ្ញាធរខេត្តបាត់ដំបង បិទផ្សារណាត់មួយចំហៀង បន្ទាប់ពីរកឃើញជាងកាត់ដេរម្នាក់វិជ្ជមានកូវីដ-១៩

នៅព្រឹកថ្ងៃទី១៦  ខែមិថុនា  ឆ្នាំ២០២១ នេះ  លោកអភិបាលខេត្ត និងលោកអភិបាលក្រុងបាត់ដំបង បានសម្រេចចុះ​បិទទីតាំងផ្សារណាត់ មួយចំហៀងខាងកើត មួយរយៈ ដែលមានទីតាំងចំកណ្តាលក្រុងបាត់ដំបង បន្ទាប់ពីបានរកឃើញមានអ្នកផ្ទុកជំងឺកូវីថ-១៩ កាលពីល្ងាចមិញរួចមក ។

លោក ផេង សិទ្ធី  អភិបាលក្រុងបាត់ដំបង បានបញ្ជាក់ថា  នៅល្ងាចថ្ងៃទី១៥ ខែមិថុនា ម្សិលមិញនេះ អាជ្ញាធរបានរក
ឃើញមានជាងកាត់ដេរ១នាក់  ដែលមានតូបនៅប៉ែកខាងត្បូងផ្សារណាត់ មានផ្ទុកជំងឺកូវីដ-១៩  ដោយបានបញ្ជូនទៅសម្រាកព្យាបាលនៅក្នុងមន្ទីរពេទ្យបង្អែកខេត្តរួចហើយ  ដោយឡែកផ្ទះរបស់ជាងដេរក៏ត្រូវបានបិទខ្ទប់  និងបានយកក្រុមគ្រួសារសាច់ញាតិទៅពិនិត្យសំណាក់រួចហើយដែរ  ដើម្បីធ្វើចត្តាឡីស័ក ។

នៅព្រឹកថ្ងៃទី១៦នេះ លោកអភិបាលខេត្តសម្រេចបិទផ្សារណត់មួយចំហៀងប៉ែកខាងកើតមួយរយៈជាបណ្តោះអាសន្ន  ហើយលោកក៏បានសំណូមពរដល់អាជីវករទាំងអស់ដែលនៅក្បែរ មេត្តាសហការណ៍ចូលរួមទៅពិនិត្យសំណាកទាំងអស់គ្នា ដើម្បីចូលរួមទប់ស្កាត់ការឆ្លង រីករាលដាលនូវជំងឺកូវីដ-១៩ នេះ  នៅក្នុងសហគមន៍ ៕

អត្ថបទ ៖ សោ និយមរ័ត្ន