១៣ថ្ងៃ រាជរដ្ឋាភិបាល​ ប្រមូល​ទិញ​មៀន​ប៉ៃលិន​ពី​កសិករ​បាន​ជាង ​១ ៧៥៨ តោន

ខេត្តបាត់ដំបង÷ ក្រោយពីប្រជាកសិករប្រឈមទីផ្សារសម្រាប់នាំចេញទៅប្រទេសថៃ ខណះប្រទេសថៃកំពុងមានវិបត្តិកូវីដ១៩ធ្ងន់ធ្ងរធ្វើឱ្យកកស្ទះកសិផលផ្លែមៀន(តាង៉ែន)ដោយរកទីផ្សារមិនបាន។

ក្នុងវបត្តិដ៏ធ្ងន់ធ្ងរ ប្រមុខ​រដ្ឋាភិបាល​បានសម្រេចចិត្តបង្កើត​ក្រុមការងារ​ចុះ​ប្រមូល​ទិញផ្លែមៀនទាំងអស់របស់ប្រជាកសិករតាមបណ្តាខេត្ត ដែលប្រឈមពិសេសក្នុងខេត្តបាត់ដំបង លើកលែងតែចម្ការរបស់លោកឧកញ៉ាឬឯកឧត្តមប៉ុណ្ណោះដែលតម្រូវឱ្យរកទីផ្សារដោយខ្លួនឯង។

លោកឈឹម វិច្ឆរ៉ា ប្រធានមន្ទីរកសិកម្មខេត្តបានឱ្យកម្ពុជាថ្មីដឹងថា ពាក់ព័ន្ធការប្រមូលទិញផ្លែមៀនប៉ៃលិន​(តាង៉ែន) និងមៀនក្រអូប (មៀនខ្មែរ) ចាប់ពីថ្ងៃទី​១៧ថ្ងៃទី១៧ខែសីហាដល់ថ្ងៃទី៣០ខែសីហា ដែលមានរយះពេល(១៣ថ្ងៃ)​ ក្រុមការងារបានចុះទិញផ្ទាល់នៅតាមស្រុកចំនួន៧ ដែលមានផ្លែមៀនប៉ៃលិន (តាង៉ែន) ​និង​មៀនក្រអូប​មានចំនួន​ ៩៨០​តោន ខណៈដែលបានទទួលទិញជំហានដំបូងនៅទីលាន​បាល់ទាត់វាលបែកចាន​ក្នុងក្រុងបាត់ដំបងបានចំនួន៧៧៨តោន ដូច្នេះសរុបលទ្ធផលប្រមូលទិញរយៈពេល១៣ថ្ងៃមានចំនួន​១៧៥៨តោន។

លោក​បន្ត​ថា យុទ្ធនាការ​ចុះប្រមូលទិញ​ផ្លែមៀនប៉ៃលិន ​(តាង៉ែន)​នៅ​ខេត្ត​បាត់ដំបង នៅ​តែ​បន្ត​ដែល​ដឹកនាំ​ដោយ​ឯកឧត្តម​នាយឧត្តមសេនីយ៌​ ហុីង ​ប៊ុនហៀង​ ប្រធាន​ក្រុម​ការងារ​ដឹកនាំក្រុមខុទ្ទកាល័យ​ ដោយសហការជាមួយ​រដ្ឋបាល​ខេត្ត​មន្ទីរ​ជំនាញ​។ ក្រៅ​ពី​​កំណត់​គោលដៅ​នៅទីលាន​​បែកចានសម្រាប់​ទទួលទិញ​​ពី​កសិករ ក៏​មាន​ការ​ដឹកនាំ​ក្រុម​ចុះទៅទិញ​ដល់​ចម្ការ​ថែម​ទៀត៕

អត្ថបទ៖ សៅ សារិទ្ធ