១០ថ្ងៃ ដំរីព្រៃបានដេញជាន់សម្លាប់មនុស្សអស់ ៥ នាក់តាមព្រំដែន​ខ្មែរ-ថៃ

យោងតាមការផ្សាយរបស់ទូរទស្សន៍ប៉ុស្តិលេខ៣ ថៃ បានបញ្ជាក់ថា នៅក្នុងរយ:ពេលប្រមាណ១០ថ្ងៃ ចុងក្រោយនេះ សត្វដំរីព្រៃដែលចេញរកចំណីតាមចម្ការរបស់ប្រជាពលរដ្ឋ ក្នុងស្រុកមួយចំនួនក្បែរព្រំដែនកម្ពុជា បានជាន់សម្លាប់មនុស្សអស់ចំនួន៥នាក់ ខណៈ​ដែល​អាជ្ញាធរបានណែនាំដល់ប្រជាពលរដ្ឋ​ឲ្យ​បង្កើនការប្រុងប្រយ័ត្ន។

ហេតុការណ៍ចុងក្រោយ បានកើតឡើងទាំងកណ្តាលថ្ងៃ នាថ្ងៃទី២៩ វិច្ឆិកា ឆ្នាំ២០២១ ក្នុងស្រុកកែងហាងម៉ែវ ខេត្តច័ន្ទបុរី ជាប់ព្រំដែនស្រុកកំរៀង ខេត្តបាត់ដំបង។

ប្រជាពលរដ្ឋបាននិយាយថា នៅមុនពេលកើតហេតុ ពួកគាត់មានគ្នា៤-៥នាក់ បាននាំគ្នាចេញទៅរកច្រូតផ្កាស្មៅដើម្បី​យក​មកធ្វើជាអំបោសលក់ ស្រាប់តែមានសត្វដំរីព្រៃ១ក្បាល បានដើរមកតាមក្រោយហើយក៏បានរត់ដេញជាន់​ ដោយ​ម្នាក់ៗប្រឹងរត់រៀងៗខ្លួន តែ​គ្នា​គេ​ម្នាក់ត្រូវដំរីជាន់កណ្តាលទ្រូងទាល់តែស្លាប់។

អាជ្ញាធរក៏​បានប្រកាសដំណឹងអោយពលរដ្ឋមានការប្រុងប្រយ័ត្ន ព្រោះនៅរដូវរងាបែបនេះ សត្វដំរីព្រៃមួយចំនួនអាចចុះប្រេង ហើយខ្លះទៀតដើរបែកហ្វូងមករកសុីផ្លែឈើតាមចម្ការរបស់ប្រជាពលរដ្ឋ ដែលមួយរយ:កន្លងមកនេះ ដំរីតែងអុកឡុកខ្លាំងនៅភាគខាងកើតដូចជា ច័ន្ទបុរី ឈុនបុរី រ៉ាក់យ៉ង ឆាក់ឈើងសៅ និងស្រះកែវជាដើម៕

អត្ថបទ៖ សោ និយមរ័ត្ន