ព័ត៌មានជាតិ

ប្រធានកាកបាទក្រហមកម្ពុជា ៖ យើងអាចភ្លេចកូវីដ១៩តែកូវីដ១៩ពុំទៅណាឆ្ងាយពីយើងឡើយ

បានផុស

៦ years មុន

នៅ

ថ្ងៃអាទិត្យ ៦ ធ្នូ ២០២០

ដោយ

ភ្នំពេញ ៖ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជាបានមានប្រសាសន៍ថា បើទោះបីជាកម្ពុជាទទួលបានជោគជ័យក្នុងការទប់ស្កាត់ជំងឺកូវីដ១៩ក៏ដោយក៏យើងមិនត្រូវស្កប់ស្កល់ទៅនឹងជ័យជម្នះនេះដែរ ព្រោះថាយើងអាចភ្លេចកូវីដ១៩តែកូវីដ១៩ពុំទៅណាឆ្ងាយពីយើងឡើយ។

តាមរយៈសារលិខិតអបអរសាទរ ក្នុងឱកាសទិវាអន្ដរជាតិនៃអ្នកស្ម័គ្រចិត្ត ៥ធ្នូ ឆ្នាំ២០២០ ក្រោមប្រធានបទ «ស្ម័គ្រចិត្តរួមគ្នា យើងអាចធ្វើបាន» សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែនបានមានប្រសាសន៍ថា «ថ្វីត្បិតតែយើងសម្រេចបានជោគជ័យគួរជាទីមោទនៈក្នុងការប្រយុទ្ធនឹងជំងឺកូវីដ១៩តែយើងមិនត្រូវស្កប់ស្កល់នឹងជ័យជម្នះនេះឡើយព្រោះថាយើងអាចភ្លេចកូវីដ១៩តែកូវីដ១៩ពុំទៅណាឆ្ងាយពីយើងឡើយ»។

សម្តេចកិត្តិព្រឹទ្ធបណ្ឌិតបានអំពាវនាវឲ្យគណៈកិត្តិយសសាខាអនុសាខាគណៈកម្មាធិការសាខាអនុសាខាមន្ត្រីបុគ្គលិកយុវជនអ្នកស្ម័គ្រចិត្តកាកបាទក្រហមកម្ពុជាបន្តពង្រឹងពង្រីកការអប់រំផ្សព្វផ្សាយឲ្យបានកាន់តែទូលំទូលាយថែមទៀតអំពីហានិភ័យនៃការឆ្លងជំងឺកូវីដ១៩ជាពិសេសវិធានការនានារបស់ក្រសួងសុខាភិបាលក្នុងការទប់ស្កាត់មិនឲ្យកើតមានក្នុងសហគមន៍។

ជាមួយគ្នានេះដែរ សម្តេចកិត្តិព្រឹទ្ធបណ្ឌិតសូមឲ្យបងប្អូនជនរួមជាតិដែលប៉ះពាល់ផ្ទាល់និងអ្នកវិជ្ជមានកូវីដ១៩សូមទៅធ្វើតេស្តជាបន្ទាន់និងស្ម័គ្រចិត្តធ្វើចត្តាឡីស័កឲ្យបានគត់មត់និងត្រឹមត្រូវដើម្បីបង្ការការចម្លងទៅបងប្អូនក្រុមគ្រួសារខ្លួននិងអ្នកដទៃ។

ចំណែកអ្នកដែលមានពាក់ព័ន្ធដោយប្រយោលត្រូវស្ម័គ្រចិត្តក្នុងការធ្វើចត្តាឡីស័កឲ្យបានត្រឹមត្រូវនិងគត់មត់ហើយក្នុងករណីបងប្អូនដែលខ្វះលទ្ធភាពសូមទំនាក់ទំនងជាមួយអាជ្ញាធរមូលដ្ឋានដើម្បីទទួលបានការជួយឧបត្ថម្ភពីរាជរដ្ឋាភិបាល។

សម្តេចកិត្តិព្រឹទ្ធបណ្ឌិតបានអំពាវនាវឲ្យបងប្អូនរួមជាតិទូទាំងប្រទេសរួមកម្លាំងសាមគ្គីភាពស្ម័គ្រចិត្តរួមគ្នាឈានទៅបញ្ចប់ព្រឹត្តិការណ៍២៨វិច្ឆិកានឹងបន្តសកម្មភាពប្រយុទ្ធនឹងជំងឺកូវីដ១៩ដើម្បីធានាបានលំនឹងសេដ្ឋកិច្ចសុវត្ថិភាពសង្គមនិងការអភិវឌ្ឍក្នុងប្រទេសយើងក្រោមម្លប់សន្តិភាព។

គួរបញ្ជាក់ថា គិតត្រឹមម៉ោង៧ព្រឹកថ្ងៃទី០៦ ខែធ្នូ ឆ្នាំ២០២០នេះកម្ពុជាបានរកឃើញអ្នកឆ្លងកូវីដ១៩ សុរបចំនួន ៣៤៦នាក់ ក្នុងនោះព្យាបាលជាសះស្បើយ ៣០៦នាក់និងកំពុងសម្រាកនៅមន្ទីរពេទ្យចំនួន៤០នាក់៕
ដោយ ៖ សំអឿន

Related Topics:

សេចក្ដីជូនដំណឹង៤ ថ្ងៃ ago

ក្រុមហ៊ុន Danone ប្រារព្ធទិវាកុមារអន្តរជាតិ និងយុទ្ធនាការសុវត្ថិភាពចំណីអាហារដើម្បីបន្តកាត់បន្ថយភាពស្លេកស្លាំងដោយសារកង្វះជាតិដែកក្នុងភាពជាដៃគូជាមួយក្រសួងអប់រំ យុវជន និងកីឡា