សាកសពយ៉ាងតិច ២៧ នាក់អណ្ដែតទើរលើច្រាំងឆ្នេរ លីប៊ី

អឌ្ឍចន្ទក្រហមលីប៊ីបាននិយាយកាលពីថ្ងៃអាទិត្យថា យ៉ាងហោចណាស់ជនចំណាកស្រុកចំនួន ២៧ នាក់បានលង់ទឹកស្លាប់នៅឆ្នេរសមុទ្រភាគខាងលិចប្រទេសលីប៊ី ខណៈពេលដែលព្យាយាមទៅដល់អឺរ៉ុប ។

អង្គការសប្បុរសធម៌ជំនួយសុខភាពមួយនេះបាននិយាយនៅលើប្រព័ន្ធផ្សព្វផ្សាយសង្គមថា សាកសពចំនួន ១៧ រួមទាំងទារកម្នាក់ត្រូវបានទឹកនាំទៅទើរនៅលើឆ្នេរ Al-Alous កាលពីយប់ថ្ងៃសៅរ៍ ។ ក្រោយមក សាកសព ១០ នាក់ទៀតត្រូវបានគេរកឃើញនៅកន្លែងផ្សេង ។

ទន្ទឹមនោះ ក្រុមអ្នកជួយសង្គ្រោះកំពុងភ័យខ្លាចថា ចំនួនអ្នកស្លាប់អាចនឹងកើនឡើង ដោយសារប្រតិបត្តិការស្វែងរកនៅតែបន្តរកជនរងគ្រោះ ឬអ្នកនៅរស់រានមានជីវិតបន្ថែមទៀត ។

គួរបញ្ជាក់ថា សោកនាដកម្មនេះបានបង្ហាញពីការយកចិត្តទុកដាក់លើគ្រោះថ្នាក់ដែលប្រឈមមុខដោយជនចំណាកស្រុករាប់ពាន់នាក់ដែលប៉ុនប៉ងរត់គេចពីសង្គ្រាម និងភាពក្រីក្រនៅមជ្ឈិមបូព៌ា និងអាហ្វ្រិក ។

ស្របពេលជាមួយគ្នានេះ ជនចំណាកស្រុកជាង ១៦០ នាក់បានលង់ទឹកសមុទ្រមេឌីទែរ៉ាណេកាលពីដើមសប្តាហ៍នេះ ។ ទីភ្នាក់ងារជនអន្តោរប្រវេសន៍របស់អង្គការសហប្រជាជាតិ IOM និយាយថា ចំនួនអ្នកស្លាប់លើផ្លូវទឹកនៅឆ្នាំនេះបានឡើងដល់ ១,៣០០ នាក់ហើយ ៕

ប្រែសម្រួលដោយ ៖ ជីវ័ន្ត

ប្រភព ៖ Sputnik