សម្ដេចតេជោ ហ៊ុន សែន គូសបញ្ជាក់ថា ឆ្នាំនេះ ត្រូវប្រារព្ធពិធីបុណ្យចូលឆ្នាំថ្មី

សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានគូសបញ្ជាក់ជាថ្មីថា នៅឆ្នាំនេះ ត្រូវប្រារព្ធពិធីបុណ្យចូលឆ្នាំថ្មី ប្រពៃណីជាតិខ្មែរឲ្យបាន បន្ទាប់ពីខកខានមិនបានប្រារព្ធរយៈពេលពីរឆ្នាំ ដោយសារការរាតត្បាតនៃជំងឺកូវីដ-១៩។

នៅក្នុងពិធីសម្ពោធដាក់ឲ្យប្រើប្រាស់ជាផ្លូវការ នូវមន្ទីរពេទ្យមិត្តភាពកម្ពុជា-ចិនព្រះកុសុមៈ នាព្រឹកថ្ងៃទី ២១ ខែមីនានេះ សម្ដេចតេជោ ហ៊ុន សែន បានថ្លែងឲ្យដឹងថា ពិធីបុណ្យចូលឆ្នាំថ្មី ប្រពៃណីជាតិខ្មែរ នឹងត្រូវប្រារព្ធឡើងនាឆ្នាំនេះ។ សម្ដេចតេជោនាយករដ្ឋមន្ត្រី បានបន្តថា «ឆ្នាំនេះ ត្រូវតែចូលឆ្នាំ ខ្ញុំបញ្ជាក់សារថ្មី ត្រូវតែចូលឆ្នាំ»។

ការប្រកាស ប្រារព្ធពិធីបុណ្យចូលឆ្នាំថ្មី ប្រពៃណីជាតិខ្មែរ ពីសំណាក់សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា នាឆ្នាំនេះវិញនោះ បន្ទាប់ពីការឆ្លងរាលដាលនៃជំងឺកូវីដ-១៩ នៅកម្ពុជា ហាក់មានការថមថយជាបន្តបន្ទាប់ ហើយចំនួនប្រជាពលរដ្ឋ បានចាក់វ៉ាក់សាំងក៏មានចំនួនច្រើនលើសលប់ ផងដែរ៕

អត្ថបទ៖ ឃួន សុភ័ក្រ