វិវាទការងារ​រួមនៅ​ក្រុមហ៊ុន​ណាហ្គាវើលដ៍​នៅមិនទាន់​ដោះស្រាយ​បញ្ចប់​នៅ​ឡើយទេ

រហូតមកដល់​រសៀលថ្ងៃទី ២១​ ខែមីនានេះ វិវាទការងាររួមនៅ​ក្រុមហ៊ុនណាហ្គាវើលដ៍មិនទាន់​ដោះស្រាយ​បញ្ចប់នៅ​ឡើយទេ ខណៈដែលភាគី​កម្មករនិយោជិត​ និងភាគីក្រុមហ៊ុនសន្យា​ថា នឹងបន្តដោះ​ស្រាយវិវាទនេះ​នៅរសៀលថ្ងៃទី ២៣ ខែមីនាឆ្នាំ២០២២ជាបន្តទៀត។

សេចក្តីជូនដំណឹង​អំពីវឌ្ឍនភាពនៃការដោះស្រាយវិវាទការងាររួមនៅក្រុមហ៊ុនណាហ្គាវើលដ៍របស់​ក្រសួងការងារ បានឱ្យដឹងថា​ នៅរសៀលថ្ងៃ​ទី ២១ ខែមីនា ឆ្នាំ២០២២ នេះក្រសួងបានបន្តដឹកនាំកិច្ចប្រជុំសម្របសម្រួល វិវាទការងារវាងអតីតបុគ្គលិក និងក្រុម​ហ៊ុនណាហ្គាវើលដ៍ ជាលើកទី៤ ដែលកិច្ចប្រជុំនេះធ្វើឡើងក្រោមវត្តមានរបស់លោក ទេស ​រុក្ខាផល អគ្គលេខាធិការ នៃអគ្គលេខាធិការដ្ឋាន គ.ក.ប. តំណាងកម្មករចូលរួមប្រជុំនេះមានដូចជា លោកស្រី ឈឹម ស៊ីថរ លោកស្រី ឈឹម សុខន លោកស្រី រី សុវណ្ណឪ លោកស្រី សុន ស្រីពេជ្រ និងលោកស្រី ហៃ សុភាព។

ចំណែកតំណាងនិយោជកមានលោក Hein Dames លោក ហយ វលាភ លោកស្រី ឌី សីហា លោកស្រី រស់ ប៊ុនឡេង និងលោកស្រី ចន្ទ រក្សា។

ភាគីនិយោជិត​បានស្នើឱ្យ​លើកយក​ចំណុច​ទាមទារ​យកចូល​ធ្វើការ​វិញ មកពិភាក្សា​មុននឹងឈានទៅពិភាក្សាចំណុច វិវាទផ្សេងទៀត ដោយស្នើឱ្យនិយោជកផ្តល់ចម្លើយ​តបចំពោះការ​ទាម​ទារនេះ។ ប្រសិនបើភាគីនិយោជកមិនព្រមយកចំណុចនេះមកពិភាក្សាគ្នាទេ នឹងនាំឱ្យ​ការចរ​ចានេះ ជាប់គាំងបន្តទៀត។

រហូតមកដល់ពេលនេះ នៅសល់កម្មករនិយោជិតប្រហែល ២០០នាក់ ដែលបន្តទាមទារ​យកចូល​ធ្វើការវិញ ខណៈដែល​ម្មករនិយោជិតកំពុងធ្វើការប្រហែល ៣០០នាក់ យល់​ព្រមលាឈប់ ពីការងារ ដើម្បីធ្វើការដោះដូរជាមួយកម្មករនិយោជិតប្រហែល២០០នាក់ ដែល​ទាមទារចូលធ្វើការវិញ។

ជម្រើសនេះ អាចឱ្យនិយោជកសម្រេចគម្រោងកាត់បន្ថយបុគ្គលិករបស់ខ្លួនផង និងអាចឱ្យកម្មករនិយោជិតដែល​ទាមទារចូលធ្វើការវិញ អាចចូលធ្វើការវិញផងដែរ។ ដូច្នេះ ស្នើឱ្យភាគីនិយោជកពិចារណាអំ​ពីជម្រើស​នៃការដោះដូរ កម្មករនិយោជិតនេះ។

ភាគីនិយោជិត មានការសោកស្តាយ ដែលភាគីនិយោជកមិនជជែកពីជម្រើសនៃដំណោះ​ស្រាយនៃ​ការដោះដូរ។ តំណាងកម្មករនិយោជិត នឹងបន្តដាក់សំណើនេះជាលាយ​លក្ខណ៍អក្សរ​ទៅភាគី​និយោជក ដើម្បីទទួលបានចម្លើយ បន្ថែមទៀត។ប្រសិនបើភាគីនិយោជកមិនមានដំណោះស្រាយទៅនឹងសំណើដោះដូរទេ ភាគីតំណាងកម្មករ​និយោ​ជិត នឹងមិនអាចមកចូលរួមប្រជុំបន្តទៀតទេ។

​ចំណែកតំណាង​ក្រុមហ៊ុន ណាហ្គាវើលដ៍បានស្នើលើកយកចំណុចវិវាទទី៣ និងទី៤ នៃសេចក្តី​បង្គាប់​អាជ្ញាកណ្តាល​លេខ០១២/២១ ចុះថ្ងៃទី១០ ខែកញ្ញា ឆ្នាំ២០២១ មកជជែកជាមុន ដែលវានឹង​ផ្តល់​អត្ថប្រយោជន៍ច្រើនដល់បុគ្គលិកភាគច្រើន ជាជាងចំណុច ទី១ ដែលពាក់ព័ន្ធតែក្រុម​បុគ្គលិក​មួយចំនួនតូច។

ប៉ុន្តែប្រសិនបើភាគីតំណាងកម្មករនិយោជិតនៅតែបន្តលើក យកចំណុចវិវាទទី១ មកពិភាក្សាមុន ភាគីនិយោជកយល់ព្រមពិភាក្សា។

ក្នុងគម្រោងរៀបចំរចនាសម្ព័ន្ធផ្ទៃក្នុង ក្រុមហ៊ុនបានត្រួតពិនិត្យអំពីលក្ខខណ្ឌជាច្រើន និងជាក់លាក់ ហើយក្រុមហ៊ុនប្រើឆន្ទានុសិទ្ធិរបស់ខ្លួនក្នុងការសម្រេចដោយឆ្លងកាត់ការប្រឹក្សាយោបល់តាមច្បាប់ស្តីពីការងារ។

រីឯការលើកឡើងរបស់ភាគីតំណាងកម្មករនិយោជិត មានន័យហាក់ដូច​ជាសហជីព​ចង់​ដើរតួជាអ្នកទទួលខុស ត្រូវអំពីដំណើរការអាជីវកម្មជំនួសក្រុមហ៊ុនទៅវិញ។

បច្ចុប្បន្ននេះ មានកម្មករនិយោជិតដែលកំពុងបម្រើការងារប្រហែល ៦០០នាក់ នៅតែជាចំនួនដែល លើសពីតម្រូវការជាក់ស្តែង។ ដូចនេះ ប្រសិនបើអ្នកទាំង ៣០០នាក់ ដែលចង់លាឈប់នោះ អាច​សម្រេចចិត្ត ដាក់ពាក្យលាឈប់បាន ហើយក្រុមហ៊ុននឹងទូទាត់ប្រាក់បំណាច់តាមការលាឈប់ពីការងារដោយស្ម័គ្រចិត្ត។

ដូច្នេះហើយ ទើបភាគីនិយោជកនៅតែចង់លើកយកចំណុចផ្សេងទៀត ដែលមានក្នុងសេចក្តីបង្គាប់អាជ្ញាកណ្តាល មកពិភាក្សា ព្រោះវាមានអត្ថប្រយោជន៍មិនត្រឹមតែចំពោះកម្មករនិយោជិតដែលត្រូវបានបញ្ឈប់ទេ តែក៏មាន អត្ថប្រយោជន៍ចំពោះកម្មករនិយោជិតដែលកំពុងធ្វើការផងដែរ។

ចំពោះជម្រើសនៃការដោះដូររវាងកម្មករនិយោជិតដែលចង់លាឈប់ពីការងារ និងកម្មករនិយោជិត​ដែល ទាមទារចូលធ្វើការវិញ គឺភាគីនិយោជកនឹងមិនពិចារណាទេ។

ក្រោយពីការពិភាក្សាគ្នាយ៉ាងផុសផុល និងការធ្វើបទបង្ហាញអំពីទិដ្ឋភាពច្បាប់ពាក់ព័ន្ធនឹងការទូទាត់ប្រាក់ បំណាច់បញ្ចប់កិច្ចសន្យា​ការងារ​របស់អធិការការងារ ភាគីទាំងពីរបានឯកភាពគ្នាកំណត់កាលបរិច្ឆេទប្រជុំបន្ទាប់ នៅថ្ងៃពុធ ទី២៣ ខែមីនា ឆ្នាំ២០២២ វេលាម៉ោង ១៤:៣០នាទី។

បើទោះបីជាមិនទាន់មានការឯកភាពគ្នាក៏ក្រសួងការងារ នឹងបន្តធ្វើការសម្របសម្រួល និងកំណត់​កាលបរិច្ឆេទ ប្រជុំបន្តបន្ទាប់ទៀត ស្របតាមតួនាទីដែលកំណត់ដោយច្បាប់ ក៏ដូចជាការ​ទាមទារ​របស់គូភាគី។

ជាថ្មីម្តងទៀត ក្រសួងស្នើឱ្យភាគីទាំងពីរមានការយោគ​យល់គ្នាខ្ពស់ក្នុងការ​ចូលរួមដោះស្រាយ​បញ្ចប់វិវាទ ការងារនេះ បន្តសហការជិតស្និទ្ធជាមួយអាជ្ញាធរមានសមត្ថកិច្ច និងភាគីពាក់ព័ន្ធ​ដោយសន្តិវិធី និងថែរក្សាសន្តិសុខ សណ្ដាប់ធ្នាប់សាធារណៈ។

យោងតាមនីតិវិធីច្បាប់ ប្រសិន​បើការចរចានៅតែមិនអាចមានដំណោះស្រាយបាន នីតិវិធីបន្ទាប់ គឺភាគីទាំងពីរអាចដាក់​ពាក្យ​បណ្តឹង​ទៅតុលាការដើម្បីរកដំណោះស្រាយចុងក្រោយ៕

អត្ថបទ៖ សំអឿន