ព័ត៌មានជាតិ

ទីប្រជុំជននិងផ្សារមានសភាពអ៊ូអរឡើងវិញ ក្រោយជំងឺកូវីដ-១៩ មានការថយចុះ

បានផុស

៥ years មុន

នៅ

ថ្ងៃអង្គារ ១៥ ធ្នូ ២០២០

ដោយ

បើពិនិត្យទៅមើលទិដ្ឋភាពនៅតាមទីសាធារណៈ និងតាមទីផ្សាររួមទាំងបេនឡាន គឺមានភាពអ៊ូអរបន្ទាប់ពីប្រទេសកម្ពុជា មានការថយចុះអ្នកឆ្លងជំងឺកូវីដ១៩ តាមសហគមន៍មកនោះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការរៀបរាប់ពីលោក ឡោ សុផល ដែលជាអ្នកគ្រប់គ្រងបេនឡានច្បារអំពៅបានប្រាប់ថា នៅថ្ងៃទី១៥ ខែធ្នូនេះ គឺនៅបេនឡានរួមទាំងផ្សារច្បារអំពៅ មានមនុស្សម្នាទៅមកយ៉ាងច្រើនខុសប្លែកក្រោយថ្ងៃ២៨ខែវិច្ឆិកា ដែលមានផ្ទុះជំងឺកូវីដ១៩ដល់សហគមន៍ ពិសេសគឺផ្តើមចេញពីអ្នករស់នៅក្រុមទី៥ ភូមិបឹងឈូក សង្កាត់និរោធ ខណ្ឌច្បារអំពៅ រាជធានីភ្នំពេញមកនោះ។

លោក សុផល បានបន្តថា មូលហេតុដែលមានមនុស្សម្នា ចេញចូលផ្សារក៏ដូចជាបេនឡានឡើងវិញនេះ គឺបន្ទាប់ពីក្រសួងសុខាភិបាលបានប្រកាសថា ចាប់ពីថ្ងៃទី១២, ១៣, ១៤ ខែធ្នូនេះ ពុំមានអ្នកឆ្លងកូវីដ១៩ នៅទូទាំងប្រទេសមកបានធ្វើឲ្យប្រជាពលរដ្ឋ ដែលធ្លាប់តែរស់នៅក្នុងផ្ទះ ព្រោះខ្លាចឆ្លងជំងឺកូវីដដល់គ្រួសារមក គឺលោកបានចេញមកផ្សារជាធម្មតាឡើងវិញ ដូចពេលកន្លងមក ប៉ុន្តែពួកគាត់បាននាំគ្នាពាក់ម៉ាសនិងដាក់ដបអាកុលតាមខ្លួន សម្រាប់លាងសំអាតដៃរាល់ពេលទិញដូរលុយពីអ្នកលក់ ហើយអ្នកលក់ក៏ប្រុងប្រយ័ត្នដោយបាញ់អាល់កុលលើលុយទៀតផង។

លោក ឡោ សុផល បានបញ្ជាក់ទៀតថា រាល់ភ្ញៀវនិងមន្ត្រីបម្រើការក្នុងបេនឡាន ក៏ដូចជាអ្នកលក់ដូរ គឺលោកបានណែនាំឲ្យពាក់ម៉ាសគ្រប់ៗគ្នា បើអ្នកមិនមានម៉ាស គឺលោកផ្តល់ជូនដោយឥតគិតថ្លៃ។ ដោយក្នុងមួយថ្ងៃ ត្រូវប្រើប្រាស់ម៉ាសរាប់រយនិងចំណាយអាល់កុល សម្រាប់ចែកជូនអ្នកលក់ដូរមិនក្រោម៥០លីត្រនោះទេ។ លោកបានសំណូមពរដល់បងប្អូនប្រជាពលរដ្ឋទាំងអស់ សូមចូលរួមអនុវត្តតាមការណែនាំពីក្រសួងសុខាភិបាលឲ្យបានគ្រប់ៗគ្នា គឺយើងទាំងអស់គ្នានឹងឈ្នះជំងឺកូវីដដ៏សាហាវនេះ៕

អត្ថបទ៖ នរា

សូមចុចអាន៖ ផ្តល់ក្របខណ្ឌរដ្ឋដល់គ្រូពេទ្យណា ស្ម័គ្រចិត្តប្រយុទ្ធប្រឆាំងកូវីដ ១៩