នាយករដ្ឋមន្ត្រី​កម្ពុជា-វៀតណាម​ឯកភាព​បើក​ច្រក​ទេសចរណ៍​ឡើងវិញ​

ប្រមុខដឹកនាំរាជរដ្ឋាភិបាលកម្ពុជា និងនាយករដ្ឋមន្ត្រីវៀតណាម នៅថ្ងៃទី ១២ ខែឧសភា ឆ្នាំ ២០២២នេះ បានឯកភាព​លើការ​បើកច្រកទេសចរណ៍ផ្លូវគោក និងផ្លូវអាកាសឡើងវិញ​ក្រោយការធូរស្រាលនៃជំងឺកូវីដ១៩។

​សម្ដេចតេជោ​ ហ៊ុន សែន​ នាយករដ្ឋមន្ត្រីកម្ពុជា​ មានប្រសាសន៍នៅក្នុងពិធី​ជួបសំណេះសំណាល​ ជា​មួយនឹងសហគមន៍ខ្មែរនៅអាមេរិក និងខ្មែរនៅកាណាដានៅថ្ងៃទី ១២ ខែឧសភា ឆ្នាំ ២០២២នេះថា សម្ដេចបានស្នើឱ្យនាយករដ្ឋមន្ត្រីវៀត​ណាមបើកទេសចរណ៍ផ្លូវគោក ខណៈដែលនាយករដ្ឋ​មន្ត្រី​វៀត​ណាមក៏​ជំរុញឱ្យបើកទាំងទេសចរណ៍ផ្លូវអាកាស តែម្ដង ហើយសម្ដេចក៏ឯកភាព​ឱ្យរដ្ឋមន្ត្រី​ទេសចរណ៍​រវាងប្រទេសទាំងពីរធ្វើការងារនេះ ទទួលយកបណ្ណចាក់វ៉ាក់សាំងហើយ​ត្រូវអនុវត្តវិធាន​ការអ្វីខ្លះ។

វិធានការកម្ពុជាមិនតម្រូវឱ្យអ្នកធ្វើដំណើរចូលប្រទេសធ្វើតេស្ដនោះទេ គឺគ្រាន់តែបង្ហាញកាតចាក់វ៉ាក់សាំង អាចធ្វើដំណើរដោយសេរី ប៉ុន្តែអ្នកមិនទាន់ចាក់វ៉ាក់សាំងត្រូវធ្វើចត្តាឡីស័ក ៧ ថ្ងៃ។

សម្ដេចតេជោ ហ៊ុន សែន មានប្រសាសន៍ថា “អញ្ចឹងបានឱ្យរដ្ឋមន្ត្រីទេសចរណ៍ធ្វើការជាមួយរដ្ឋមន្ត្រីវៀតណាម ខាងវៀតណាមមកយើងមិនតម្រូវទេ ដល់កម្ពុជាចូលទៅវៀតណាមតម្រូវអ្វី? តើត្រូវការធ្វើតេស្ដ និងធ្វើចត្តាឡីស័កទេ។ប៉ុន្តែប្រសិនបើវៀតណាមមានតម្រូវការបែបនោះ ខ្មែរមួយចំនួនមិនទៅទេ ខណៈវៀតណាមនឹងមកកម្ពុជា៕