ប្រមុខការទូត​​​ក្រិក ស្នើកម្ពុជាគាំទ្របេក្ខភាពក្រិកនៅក្នុងអង្គការអន្តរជាតិ

នៅក្នុងជំនួបទ្វេភាគីជាមួយលោក ប្រាក់ សុខុន រដ្ឋមន្ត្រីការបរទេសកម្ពុជា នៅថ្ងៃទី២ ខែសីហា ឆ្នាំ ២០២២ រដ្ឋមន្ត្រីការបរទេសក្រិក លោក Nikos Dendian បានស្នើសុំកម្ពុជាគាំទ្របេក្ខភាពរបស់ប្រទេសក្រិកនៅក្នុងអង្គការអន្តរជាតិមួយចំនួន។ ខណៈលោក ប្រាក់ សុខុន បានអះអាងថា កម្ពុជានឹងពិចារណាយ៉ាងយកចិត្តទុកដាក់ចំពោះសំណើនេះ។

ជាមួយគ្នានេះ លោក ប្រាក់ សុខុន និងលោក Nikos Dendian បានរំលឹកឡើងវិញដោយក្ដីពេញចិត្តចំពោះការបង្កើតយន្តការពិគ្រោះយោបល់ទ្វេភាគី តាមរយៈការចុះអនុស្សារណៈនៃការយោគយល់គ្នា កាលពីថ្ងៃទី៨ ខែកក្កដា ឆ្នាំ២០២១ ដោយប្រមុខការទូតទាំងពីរ បាន​ឯកភាពគ្នាបន្តកិច្ចប្រជុំពិគ្រោះយោបល់ទ្វេភាគីនេះឲ្យទៀងទាត់ ដើម្បីជំរុញទំនាក់ទំនង និងកិច្ចសហប្រតិបត្តិការឲ្យកាន់តែរឹងមាំ។ ទន្ទឹមនឹងគ្នា ភាគីទាំងពីរ ក៏បានឯកភាពសម្រាប់ការបង្កើតទំនាក់ទំនងរវាងធុរកិច្ច និងធុរកិច្ច ដើម្បីសំដៅពង្រឹងទំនាក់ទំនងសេដ្ឋកិច្ច និងស្វែងរកលទ្ធភាពសម្រាប់ការជំរុញកិច្ចសហប្រតិបត្តិការទេសចរណ៍រវាងប្រទេសទាំងពីរ កម្ពុជា-ក្រិក។

ឆ្លៀតឱកាសនោះដែរ ប្រមុខការទូតកម្ពុជា លោក ប្រាក់ សុខុន បានបង្ហាញការអបអរសាទប្រទេសក្រិកចំពោះការចូលជាសមាជិកនៃសន្ធិសញ្ញាមិត្តភាព និងកិច្ចសហប្រតិបត្តិការនៅក្នុងតំបន់អាស៊ីអាគ្នេយ៍។ លោកគូសបញ្ជាក់ថា ក្នុងនាមជា​ប្រធានអាស៊ាននៅឆ្នាំនេះ កម្ពុជាប្ដេជ្ញាចិត្តយ៉ាងមុតមាំ ក្នុងការធ្វើការជាមួយភាគីក្រិក ដើម្បីពង្រឹងទំនាក់ទំនងកាន់តែជិតស្និទ្ធរវាងអាស៊ាន-ក្រិក និងអាស៊ាន-សហភាពអឺរ៉ុប ផងដែរ៕

ដោយ ៖ ធឿន វ៉ាន់សុង