អគ្គិភ័យ ៣០ ករណី ក្នុងឱកាសបុណ្យកាន់បិណ្ឌ និងភ្ជុំបិណ្ឌ កើនឡើង ៦ ករណី

នាយកដ្ឋាននគរបាលបង្ការ ពន្លត់អគ្គិភ័យ នៅថ្ងៃទី២៧ ខែកញ្ញា ឆ្នាំ២០២២នេះ បានបង្ហាញបាយការណ៍សរុបករណីអគ្គិភ័យ កើតឡើងថ្ងៃបុណ្យកាន់បិណ្ឌ និងបុណ្យភ្ជុំបិណ្ឌបីថ្ងៃ ដោយកើនឡើងចំនួន ៦ ករណីបើប្រៀបធៀបឆ្នាំមុន។

នាយកដ្ឋាននគរបាលបង្ការ ពន្លត់អគ្គិភ័យ បានឱ្យដឹងថា ១. ចាប់ពី បិណ្ឌទី១ ដល់ បិណ្ឌទី១៣ ត្រូវនឹងថ្ងៃទី១១ ដល់ថ្ងៃទី២៣ ខែកញ្ញា ឆ្នាំ២០២២ អគ្គិភ័យកើតឡើងចំនួន ២៦/២០ លើក ធៀបនឹងឆ្នាំ២០២១ កើនឡើងចំនួន ៦ លើក។

អគ្គិភ័យបានបណ្ដាលឱ្យឆេះផ្ទះចំនួន ២៣ ខ្នង, បន្ទប់ ១, តូប១, និងរថយន្តចំនួន ៣ គ្រឿង ស្លាប់មនុស្ស ១ នាក់ និងរងរបួសមនុស្ស ១នាក់។

មូលហេតុមកពី ចរន្តអគ្គីសនី ១៧ លើក, ភ្លើងទានធូប ១ លើក, ភ្លើងចង្ក្រាន ២ លើក, ផ្ទុះហ្គាស ១ លើក, មនុស្សដុត ២ លើក, និងកំពុងបន្តស្រាវជ្រាវ ៣ ករណី។

នាយកដ្ឋាននគរបាលបង្ការ ពន្លត់អគ្គិភ័យ បានឱ្យដឹងទៀតថា ចាប់ពីថ្ងៃទី២៤-២៦ ខែកញ្ញា ឆ្នាំ២០២២ ពោលគឺនៅថ្ងៃបុណ្យភ្ជុំបិណ្ឌ ទាំង ៣ ថ្ងៃ មានករណីអគ្គិភ័យកើតឡើងចំនួន ៤/៤ លើក ធៀបនឹងឆ្នាំ២០២១ ចំនួនស្មើគ្នា ក្នុងនោះ ឆេះផ្ទះចំនួន៤ ខ្នង។

មូលហេតុបណ្ដាលមកពី ចរន្តអគ្គីសនី ១ លើក, ភ្លើងទានធូប ២ លើក, មនុស្សដុត ២ លើក, នឹងកំពុងបន្តស្រាវជ្រាវ ១ លើក៕