រុស្ស៊ីបញ្ចេញតួលេខប្រជាជនដែលបានចាក់វ៉ាក់សាំងកូវីដ Sputnik V

រដ្ឋមន្រ្តីក្រសួងសុខាភិបាលនៃប្រទេសរុស្ស៊ីបាននិយាយកាលពីថ្ងៃសៅរ៍ថា ប្រជាជនជាង ៨០០,០០០ នាក់នៅក្នុងប្រទេសរុស្ស៊ីត្រូវបានចាក់វ៉ាក់សាំងប្រឆាំងនឹងជំងឺកូវីដ ១៩ ។

ដោយផ្តល់ព័ត៌មានលម្អិតអំពីវ៉ាក់សាំង Sputnik V នៅខេត្ត Tver លោក Mikhail Murashko រដ្ឋមន្ត្រីក្រសួងសុខាភិបាលបាននិយាយថា យុទ្ធនាការចាក់វ៉ាក់សាំងទ្រង់ទ្រាយធំនៅតែបន្តកើតមាននៅក្នុងប្រទេស ។

ប្រទេសរុស្ស៊ីបានចាប់ផ្តើមចាក់វ៉ាក់សាំងដល់មនុស្សដែលមានអាយុលើសពី ៦០ ឆ្នាំ ហើយវ៉ាក់សាំងជាង ១.៥ លានដូសត្រូវបានបញ្ជូនទៅផ្នែកផ្សេងៗនៃប្រទេស ។

កាលពីថ្ងៃទី ២ ខែធ្នូប្រធានាធិបតីរុស្ស៊ីលោក វ្ល៉ាឌីមៀ ពូទីន បានបញ្ជាឲ្យចាប់ផ្តើមការចាក់វ៉ាក់សាំងប្រឆាំងនឹងជំងឺកូវីដ ១៩ ហើយដំណើរការចាក់វ៉ាក់សាំងដែលត្រូវបានចូលរួមជាលើកដំបូងដោយប្រជាពលរដ្ឋដែលមានអាយុពី ១៨ ទៅ ៦០ ឆ្នាំបានចាប់ផ្តើមនៅថ្ងៃទី ៥ ខែធ្នូនៅទីក្រុងម៉ូស្គូ និងតំបន់ផ្សេងទៀតនៅថ្ងៃទី ១៥ ខែធ្នូ ។

គួរបញ្ជាក់ថា គិតត្រឹមពេលនេះប្រទេសរុស្ស៊ីមានករណីឆ្លងជំងឺកូវីដ ១៩ ចំនួន ៣,២១២,៦៣៧ ករណី និងមានអ្នកស្លាប់ចំនួន ៥៨,០០២ នាក់ ៕

ប្រែសម្រួលដោយ ៖ ជីវ័ន្ត

ប្រភព ៖ Anadolu