ដីព្រៃលិចទឹកកោងកាងរងការទន្ទ្រានកាន់កាប់ជាច្រើនហិកតានៅក្នុងសង្កាត់អូរក្រសារក្រុងកែប

បើតាមប្រភពព័ត៌មានពីប្រជាពលរដ្ឋរស់នៅក្នុងភូមិដំណាក់ចំបក់ សង្កាត់អូក្រសារ ក្រុងកែប ខេត្តកែប កាលពីថ្ងៃទី២៧​ខែវិច្ឆិកា ឆ្នាំ២០២២ម្សិលមិញនេះ បានលើកឡើងឲ្យដឹងថា ដីព្រៃលិចទឹកកោងកាង គឺជាដីព្រៃលិចទឹក ជាកន្លែងជម្រកត្រីពង នៅចំណុចភូមិឃុំខាងលើនេះរងការកាប់ទន្ទ្រានកាន់កាប់ជារបស់ឯកជនច្រើនហិកតា ត្រូវបានអ្នកមានលុយ និងអ្នកមានអំណាចម្នាក់បាននិងកំពុងធ្វើសកម្មភាពទន្ទ្រានកាន់កាប់ធ្វើជាកម្មសិទ្ធិ។

ប៉ុន្តែមន្ត្រីអាជ្ញាធរ សង្កាត់អូក្រសារ ក៏ដូចជាមន្ត្រីអាជ្ញាធរ ក្រុងកែប ព្រមទាំងប្រធានមន្ទីរកសិកម្ម នៅខេត្តកែប បែរជាមិនហ៊ានចាត់វិធានការទៅលើក្រុមអ្នកមានអំណាចបានកំពុងធ្វើសកម្មភាពទន្ទ្រានកាន់កាប់ដីព្រៃលិចទឹកកោងកាង យកធ្វើជាកម្មសិទ្ធិ ហេតុនេះហើយទើបប្រជាពលរដ្ឋលើកឡើងថា ទាល់តែមានការឃុបឃិតជាប្រព័ន្ធទើបសកម្មភាពទន្ទ្រានកាន់កាប់ដីព្រៃលិចទឹកនិងព្រៃកោងកាង នៅសង្កាត់អូរក្រសារ ក្រុងកែប អាចប្រព្រឹត្តទៅយ៉ាងរលូន ដោយគ្មានការទប់ស្កាត់។

ប្រជាពលរដ្ឋក្នុងសង្កាត់អូរក្រសា បានអំពាវនាវឲ្យឯកឧត្តមអភិបាលខេត្តកែប ព្រមទាំងប្រធានមន្ទីរពាក់ព័ន្ធក្នុងខេត្តកែប ចាត់វិធានការទប់ស្កាត់សកម្មភាពទន្ទ្រានកាន់កាប់ដីព្រៃកោងកាង និងព្រៃលិចទឹកតាមតាមដងព្រែកជាបន្ទាន់ប្រកប​ដោយប្រសិទ្ធភាពពិតប្រាកដ។

ដោយហេតុថា ក្នុងមួយរយៈកន្លងទៅនេះដីព្រៃលិចទឹកកោងកាងជាដែនកន្លែងជម្រកត្រីពង ជាដីព្រៃលិចទឹកមានជាច្រើនហិកតារងកាត់ទន្ទ្រានត្រូវបានវិនាស ហិនហោចអស់នាពេលឆាប់ៗខាងមុខនេះហើយ តើលោកចៅសង្កាត់ អូរក្រសារ និងលោកអភិបាលក្រុង បែរជារក្សាភាពស្ងៀមស្ងាត់ធ្វើមិនដឹងទៅវិញ៕

អត្ថបទ៖ សឹង រ៉ាត់