សម្ដេចតេជោ សង្ឃឹមថា អង្កររបស់កម្ពុជា នឹងទទួលបានការពេញនិយម សម្រាប់ប្រជាជនម៉ាល់ឌីវ

សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានថ្លែងថា ប្រទេសកម្ពុជា មានផលិតផលកសិកម្មជាច្រើន ដែលអាចនាំចេញទៅកាន់ប្រទេសម៉ាល់ឌីវ ជាពិសេសអង្ករដែលជាប់ចំណាត់ថ្នាក់ជា​អង្ករ​ល្អ​ដាច់​គេ។

សម្តេចតេជោ ហ៊ុន សែន បានថ្លែងក្នុងសន្និសីទសារព័ត៌មានរួម ពីវិមានប្រធានាធិបតីនៃសាធារណរដ្ឋម៉ាល់ឌីវ នៅថ្ងៃទី ១៦ ខែមករានេះថា កម្ពុជា និងម៉ាល់ឌីវ ពិតមានលទ្ធភាព ដើម្បីពង្រីកទំហំពាណិជ្ជកម្មរវាងប្រទេសទាំងពីរ។

សម្រាប់កម្ពុជា មានទំនិញជាច្រើនដែលអាចនាំចូលទៅកាន់ម៉ាល់ឌីវ ដូចជា អង្ករ និងផលិតផលកសិកម្មដទៃទៀត ហើយមិនមែនសម្រាប់បំពេញតម្រូវការ តែប្រជាជនម៉ាល់ឌីវនោះទេ តែថែមទាំងសម្រាប់អ្នកទេសចរបរទេស ដែលមកដើរលេងកម្សាន្ដនៅម៉ាល់ឌីវផងដែរ។

សម្ដេចតេជោ ហ៊ុន សែន បានថ្លែងបន្តថា «ដោយសារអង្ករកម្ពុជា គឺឋិតនៅក្នុងប្រភេទអង្ករដែលជាប់លេខ ១ នៅលើពិភពលោកចំនួន ៥ដង ហើយឥឡូវកំពុងឋិតនៅចំណាត់ថ្នាក់លេខ ១នៅឡើយ ដែលសង្ឃឹមថា អង្ករនេះ នឹងទទួលបាននូវការពេញនិយម សម្រាប់ប្រជាជនម៉ាល់ឌីវផង និងសម្រាប់អ្នកទេសចរ ដែលមកទស្សនកិច្ចនៅទីនេះ»។

ក្រៅពីអង្ករ កម្ពុជាក៏ផលិតផលកសិកម្មផ្សេងទៀត ដូចជាស្វាយចន្ទី ចេក និងស្វាយ ជាដើម ដែលអាចនាំចូលទៅកាន់ប្រទេសម៉ាល់ឌីវ ដើម្បីបំពេញតម្រូវការសម្រាប់ប្រជាជនម៉ាល់ឌីវផង និងសម្រាប់បម្រើឲ្យវិស័យទេសចរណ៍នៅប្រទេសម៉ាល់ឌីវផង។

ជាមួយគ្នានេះ សម្ដេចតេជោ ហ៊ុន សែន ក៏សង្ឃឹមដែរថា ប្រទេសម៉ាល់ឌីវ នឹងអាចបញ្ជាទិញផលិត​ផលសំលៀកបំពាក់ពីកម្ពុជាផងដែរ ព្រោះនៅកម្ពុជាមានរោងចក្រកាត់ដេរសំលៀកបំពាក់យ៉ាងច្រើន៕