ឯកអគ្គរាជទូត៣រូប ត្រូវបានតែងតាំងជាអគ្គនា​យកថ្មីនៅក្រសួងការបរទេស ក្រោយចប់អាណត្តិ

កាលពីពេលថ្មីៗនេះ រាជរដ្ឋាភិបាលបានផ្លាស់ប្ដូរមន្ត្រីជាឯកអគ្គរាជទូតថ្មីរបស់កម្ពុជាប្រចាំនៅបណ្ដាប្រទេសជាមិត្តនានា ក្រោយឯកអគ្គរាជទូតចាស់បានចប់អាណត្តិបេសកកម្ម។ ក្នុងនោះ ក្រសួងការបរទេសក៏បានផ្ទេរ និងតែងតាំងតំណែងមន្ត្រីជាន់ខ្ពស់មួយចំនួនផងដែរទាំងថ្នាក់រដ្ឋលេខាធិការ អនុរដ្ឋលេខាធិការ ខណៈអតីតឯកអគ្គរាជទូតចំនួន៣រូបបានផ្ទេរ មកកាន់តួនាទីជាអគ្គនាយកថ្មី។

លោក ចឺយ វិចិត្ត អតីតឯកអគ្គរាជទូតកម្ពុជាប្រចាំនៅប្រទេសម៉ាឡេស៊ី ដែលបានចប់អាណត្តិបេសកកម្ម កាលពីខែធ្នូ ឆ្នាំ២០២២ ត្រូវបានតែងតាំងជាប្រធានវិទ្យាស្ថានជាតិការទូត និងទំនាក់ទំនងអន្តរជាតិ ជំនួសលោក ទាន សំណាង។ រីឯ លោក ទាន សំណាង ត្រូវបានផ្ទេរមកកាន់តួនាទីជាអគ្គនាយកនៃអគ្គនាយកដ្ឋានស្រាវជ្រាវ វិភាគ និងព្យាករណ៍។

ចំណែក អតីតឯកអគ្គរាជទូត និងជាតំណាងអចិន្ត្រៃយ៍កម្ពុជាប្រចាំលេខាធិការដ្ឋានអាស៊ាន លោក យៀប សំណាង បានតែងតាំងជាអគ្គនាយកនៃអគ្គនាយកដ្ឋានអាស៊ាន ជំនួសលោក ស៊ឹម វីរៈ ដែលត្រូវដំឡើងជាអនុរដ្ឋលេខាធិការក្រសួងការបរទេស ប៉ុន្តែក្រោយមក ពោល គឺនៅអំឡុងខែមករា ឆ្នាំ២០២៣ លោក ស៊ឹម វីរៈ បានផ្ទេរមកធ្វើជាអនុរដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ។

ដោយឡែក លោក ឈូក ប៊ុណ្ណា ដែលជាអតីតឯកអគ្គរាជទូតកម្ពុជាប្រចាំនៅមីយ៉ាន់ម៉ា ត្រូវបានតែងតាំងជាអគ្គនាយកនៃអគ្គនាយកដ្ឋានអឺរ៉ុប អាមេរិក និងអាហ្វ្រិក-មជ្ឈឹមបូព៌ា ជំនួសលោក ណី សំអុល។

ក្រៅពីនេះ មន្ត្រីជាន់ខ្ពស់ចំនួន ៥រូបផ្សេងទៀត នៅរក្សាតួនាទីដដែលជាអគ្គលេខាធិការ និងជាអគ្គនាយក ដែលរួមមាន៖ លោក សន ច័ន្ទរិទ្ធី ជាអគ្គលេខាធិការនៃអគ្គលេខាធិការដ្ឋានក្រសួងការបរទេស និងសហប្រតិបត្តិការអន្តរជាតិ លោក ចេង ម៉ានិត ជាអគ្គនាយកនៃអគ្គនាយកដ្ឋានសហប្រតិបត្តិការអន្តរជាតិ លោក ងួន សុខវេង ជាអគ្គនាយកនៃអគ្គនាយកដ្ឋានអាស៊ី-ប៉ាស៊ីហ្វិក លោក ថូ សំណាង អគ្គនាយកនៃអគ្គនាយកដ្ឋានកិច្ចការច្បាប់ កុងស៊ុល និងព្រំដែន និងលោក សុក ជា ជាអគ្គាធិកានៃអគ្គាធិការដ្ឋានក្រសួងការបរទេស និងសហប្រតិបត្តិការអន្តរជាតិ៕

ដោយ៖ ធឿន វ៉ាន់សុង