មកស្គាល់សេដ្ឋីអារ៉ាប់ ៥ នាក់ មានជាងគេបំផុតលើពិភពលោក

យោងតាម​ទស្សនាវដ្ដី Forbes ទើបតែបញ្ចេញបញ្ជីឈ្មោះមហាសេដ្ឋីអារ៉ាប់ដែលមានជាងគេបំផុតនៅលើពិភពលោក គិតត្រឹមឆ្នាំ២០២៣។​ ទំព័រ Forbes Middle East បញ្ចាក់ទៀតថា​ មានការថយចុះនៃតម្លៃទ្រព្យសម្បត្តិ​សម្រាប់​មហាសេដ្ឋីអារ៉ាប់ ៩ នាក់ក្នុងចំណោម ២១នាក់ បើធៀបនឹងឆ្នាំ ២០២២ ខណៈខាងក្រោមនេះ​គឺជា​មហាសេដ្ឋីអារ៉ាប់ ៥ នាក់​ដែលមានជាងគេបំផុតក្នុងពិភពលោកឆ្នាំ២០២៣។

១ Nassef Sawiris

Nassef Sawiris គឺជាអ្នកវិនិយោគ និងជាកូនចៅនៃគ្រួសារអ្នកមាននៅប្រទេស​អេហ្ស៊ីប។ យោងតាម​ទស្សនាវដ្តី Forbes Middle East ទ្រព្យសម្បត្តិរបស់គាត់មានចំនួន ៧.៤ ពាន់លាន​ដុល្លារ។ Nassef មានភាគហ៊ុន ៦ ភាគរយនៅក្នុងក្រុមហ៊ុន​សំលៀកបំពាក់​កីឡា Adidas។ មិនត្រឹមតែប៉ុណ្ណោះ នៅឆ្នាំ២០២០គាត់បានទិញភាគហ៊ុន ៥ ភាគរយនៅក្នុងក្រុមហ៊ុន​ដែល​បាន​ចុះ​បញ្ជី​នៅ New York Madison Square Garden Sports ។ Nassef ដំណើរការអាជីវកម្ម OCI ដែលជាអ្នកផលិតជី​អាសូតដ៏ធំបំផុតមួយរបស់ពិភពលោក​ជាមួយនឹងរុក្ខជាតិនៅរដ្ឋតិចសាស់ និងអាយអូវ៉ា។

២​ Issad Rebrab

Issad Rebrab បានគ្រប់គ្រងទ្រព្យសម្បត្តិចំនួន ៤.៦ ពាន់លានដុល្លារនៅឆ្នាំ ២០២៣។ លោកបាន​បង្កើត Cevital និងបម្រើការជា CEO អស់រយៈពេលជាង ៥០ឆ្នាំ។ Cevital គឺជាក្រុមហ៊ុនឯកជនដ៏ធំបំផុត​នៅក្នុងប្រទេសអាល់ហ្សេរី ដែលមានរោងចក្រចម្រាញ់​ស្ករដ៏ធំបំផុតមួយក្នុង​ពិភពលោក មានសមត្ថភាពផលិត២ លានតោនក្នុងមួយឆ្នាំ។ នៅខែកក្កដាឆ្នាំ ២០២២​គាត់បានតែងតាំងកូនប្រុសរបស់គាត់ឈ្មោះ Malik ជានាយកប្រតិបត្តិនៃ Cevital ។

៣ Hussain Sajwani

Hussain Sajwani គឺជាអ្នកអភិវឌ្ឍន៍អចលនទ្រព្យដែលមានមូលដ្ឋាននៅទីក្រុងឌូបៃ ឈ្មោះ DAMAC Properties។ នៅក្នុងឆ្នាំ ២០១៣ ក្រុមហ៊ុន DAMAC Properties បានសហការជាមួយលោក Donald Trump ដើម្បីបង្កើតទីលានវាយកូនហ្គោលម៉ាក Trump ចំនួនពីរនៅក្នុងទីក្រុងឌូបៃ។ Hussain Sajwani ត្រូវគេស្គាល់ថាជាយុទ្ធសាស្រ្តទីផ្សារដ៏ឆ្នើមរបស់គាត់។ ពេលខ្លះគាត់ផ្តល់ជូនរថយន្ត Lamborghini ដោយឥតគិតថ្លៃសម្រាប់អ្នកទិញផ្ទះល្វែង។ លើសពីនេះ វាមាន​ដៃគូសហការជាមួយម៉ាក Bugatti និង Versace ថែមទៀតផង ។

៤ Mohamed Mansour

នៅឆ្នាំ ២០២៣ ទ្រព្យសម្បត្តិ​ដែលគ្រប់គ្រងដោយ Mohamed Mansour នឹងកើនឡើងដល់ ៣.៦ ពាន់លានដុល្លារអាមេរិក។ គាត់គឺជាអ្នកគ្រប់គ្រងក្រុមហ៊ុន Mansour Group ដែលបង្កើតឡើង​ដោយឪពុកចុង​របស់គាត់ Loufy ក្នុងឆ្នាំ ១៩៥២។ លើសពីនេះ Mohamed Mansour បាន​បង្កើតក្រុមហ៊ុនចែកចាយ General Motors នៅក្នុងប្រទេសអេហ្ស៊ីបក្នុងឆ្នាំ ១៩៧៥។ ក្រោយមក ក្រុមហ៊ុន General Motors បានក្លាយជាក្រុមហ៊ុន​ចែកចាយដ៏ធំបំផុតមួយ​នៅក្នុងពិភពលោក។ Mansour Group ក៏មានសិទ្ធិចែកចាយផ្តាច់មុខសម្រាប់ឧបករណ៍ Caterpillar នៅក្នុងប្រទេសអេហ្ស៊ីប និងនៅក្នុងប្រទេសអាហ្វ្រិកចំនួនប្រាំពីរ។

៥ Naguib Sawiris

Naguib Sawiris គឺជាកូនចៅនៃគ្រួសារអ្នកមាននៅប្រទេសអេហ្ស៊ីប និងជាបងប្រុសរបស់មហាសេដ្ឋី Nassef Sawiris ។ នៅឆ្នាំ ២០២៣ ទ្រព្យសម្បត្តិរបស់គាត់មាន ៣.៣ ពាន់លានដុល្លារ ខណៈលោក Naguib បានកសាងទ្រព្យសម្បត្តិរបស់គាត់នៅក្នុងវិស័យទូរគមនាគមន៍។ ក្នុងឆ្នាំ ២០១១ គាត់បានលក់ Orascom Telecom ទៅឲ្យក្រុមហ៊ុនទូរគមនាគមន៍រុស្ស៊ី VimpelCom (បច្ចុប្បន្ន Veon) សម្រាប់ប្រតិបត្តិការតម្លៃរាប់ពាន់លានដុល្លារ។

លោក Naguib ក៏បម្រើការជាប្រធានក្រុមហ៊ុន Orascom TMT Investments ដែលមានភាគហ៊ុននៅក្នុងប្រទេសអេហ្ស៊ីប ក៏ដូចជាក្រុមហ៊ុនអ៊ីនធឺណិតអ៊ីតាលី Italiaonline ផងដែរ។ Naguib ក៏បានបង្កើតរមណីយដ្ឋានប្រណិត Silversand នៅលើកោះ Caribbean ផងដែរ៕

ប្រែសម្រួល៖ សាង ស្រីល័ក្ខ

ចុចអាន៖ប្រទេសមហាសេដ្ឋីអារ៉ាប់រួម រើសបានប្រធានាធិបតីថ្មី